Ang Tanan Nato Gikinahanglan Aron Molampos ang Buluhaton
1 Ang matag tinun-an ni Jesu-Kristo kinahanglang makasabot nga ang iyang mga paningkamot sa pagpaluyo ug pagpakig-ambit sa buluhatong pagsangyaw sa Gingharian maoy hinungdanon kaayo. Si Jesus nakaamgo nga ang iyang mga tinun-an magpatunghag mga bunga sa Gingharian sa lainlaing gidaghanon. (Mat. 13:23) Bisan tuod ang dakong bahin sa buluhatong pagsangyaw ginahimo sa daghang manggibuhatong mga payunir, ang tanan kinsa maikagong mopadayon sa paghimaya sa Diyos pinaagig pagpamungag daghang bunga kutob sa maarangan pagadayegon.—Juan 15:8.
2 Ang Duyog nga mga Panikaysikay Magpalampos ug Dako: Gitagna ni Jesus nga ang tiningob nga mga panikaysikay sa tanan niyang mga tinun-an magpatunghag mga buhat nga mas dako pa kay sa iya. (Juan 14:12) Bisan kon ang atong personal nga mga kahimtang magpalimite man sa atong arang mahimo o magtugot kanato sa paggahin ug dakong panahon ngadto sa pagsangyaw sa Gingharian, ang tanan nato gikinahanglan aron molampos ang buluhaton. Kini sama gayod sa giingon ni Pablo: “Ang tibuok nga lawas, kay takdo nga pagkadugtong ug gipanagtambayayongay pinaagi sa matag lutahan nga nagahatag sa kon unsa ang gikinahanglan, sumala sa paglihok sa matag usa ka sangkap sa angay nga sukod, nagapatubo sa lawas.”—Efe. 4:16.
3 Ang uban tingali mobati nga ang ilang mga panlimbasog dili dako ang ikadugang. Apan, sa mga mata ni Jehova ang importanteng butang mao nga ang atong pag-alagad maoy bug-os kalag. Ang tanang butang nga atong himoon alang kaniya maoy bililhon ug gipabilhan.—Itandi ang Lucas 21:1-4.
4 Pabayon sa Pagpaluyo sa Buluhaton: Kitang tanan adunay pribilehiyo sa pag-amot sa materyal nga paagi sa tibuok kalibotang buluhaton. Ang uban makatabang usab pinaagig pisikal nga paghago nga nalangkit sa pagpaluyo sa buluhaton sa Gingharian. Ang matag usa makapaningkamot sa paghatag ug inandam-pag-ayong mga komento sa mga tigom ug makig-ambit sa Tunghaan sa Teokratikanhong Ministeryo. Pinaagig pagpahimulos sa mga kahigayonan sa pagdasig sa uban, kita makahimog hinungdanong amot ngadto sa espirituwalidad sa kongregasyon, ug kini magpauswag sa katakos niana sa pagpalampos sa buluhaton nga gikapiyal niana.
5 Oo, ang tanan nato gikinahanglan aron molampos ang buluhaton. Kinahanglang walay usang mobati nga wala kinahanglana. Ang atong tiningob nga mga panikaysikay, dako man ug diyutay, sa pag-alagad kang Jehova magpaila kanato ingong bugtong tinuod nga mga magsisimba sa Diyos. (Mal. 3:18) Ang matag usa nato makabaton ug makahuloganong bahin sa pagpasidungog kang Jehova ug sa pagtabang sa uban sa pag-ila ug pag-alagad kaniya.