‘Unsay Akong Mahimo?’
1 ‘Unsay akong mahimo?’ Walay duhaduha, kanang pangutanaha anaa sa hunahuna sa mga membro sa gamayng grupo sa pagtuon sa Bibliya nga giorganisar ni Charles Taze Russell sa katuigang 1870. Samtang sila miuswag sa pagsabot sa kabubut-on sa Diyos, kadtong unang mga estudyante sa Bibliya naghunahuna gayod kon unsay ilang mahimo sa pagtabang sa uban nga makakat-on bahin sa katuyoan sa Diyos. Aron maabot ang tibuok kalibotan pinaagig kahibalo sa Bibliya nga ilang nahuptan maoy sa dayag usa ka dako kaayong buluhaton.
2 Makapalipay alang kanato, ilang nadumalag maayo kanang hagita. Sa unsang paagi? Ang matag indibiduwal mihimo sa iyang daw gamayng bahin, busa karon, ang mga Saksi ni Jehova nailhan na sa tibuok kalibotan—usa ka organisasyon sa duolag unom ka milyong mga magmamantala sa Gingharian nga nag-alagad sa mga 90,000 ka kongregasyon diha sa 234 ka nasod ug mga isla sa dagat!—Isa. 60:22.
3 Ihatag ang Imong Bug-os nga Pagpaluyo: Hinungdanon alang sa matag usa kanato nga makig-ambit sa dako kaayong buluhaton nga gitagna ni Jesus nga pagabuhaton niining kataposang mga adlaw. (Mar. 13:10) Dayag nga kining buluhatona dili mahimong itugyan lamang sa limitadong gidaghanon sa mga ansiyano; ni ang kalihokang pagsangyaw ipaabaga lamang sa mga payunir. Sa pagkamatuod, ang matag dedikadong Kristohanon adunay hinungdanong papel nga dulaon. Kitang tanan makaambit man sa pipila ka paagi sa kalihokang pagsangyaw. (1 Tim. 1:12) Ngadto sa bisan unsang gilapdon nga atong mahimo kini, kita makabenepisyo sa atong kaugalingon ug ang uban.—1 Tim. 4:16.
4 Ang matag usa makahatag usab ug bug-os nga pagpaluyo sa atong Kristohanong panag-igsoonay diha sa ubang dagkong mga paagi. Kita makapaluyo sa mga tigom sa kongregasyon pinaagi sa pagtambong nga regular ug sa pagpakig-ambit nga madasigon. (Sal. 122:1, 8, 9) Kita makahimo sa atong bahin sa pagpabiling hinlo ang kongregasyon sa moral nga paagi. Kita makataganag pinansiyal nga pagpaluyo sa tibuok-kalibotang buluhaton, sumala sa atong mga kahinguhaan. Kita makaambit sa paghinlo sa Kingdom Hall. Ang matag usa makapalambo sa mainit nga espiritu sa gugma ug panaghiusa diha sa kongregasyon pinaagi sa pagtabang sa mga bag-ohan, mga batan-on, ug ingon man sa mga tigulang.—Col. 3:12, 14.
5 Busa ikaw tingali mosukna, ‘Unsay akong mahimo?’ Bisan tuod ang imong indibiduwal nga mga paningkamot mahimong gamay lang, pinaagi sa paghimo sa imong bahin, ikaw makaamot sa usa ka lig-on, aktibo, ug himsog nga kongregasyon. Busa kitang tanan adunay hinungdanong bahin sa pagpasidungog sa ngalan ni Jehova!