Atua Ka ba Didto?

¹ Usa ka dugay nang Saksi kas-a miingon: “Kon imong masayloan ang unang adlaw sa kombensiyon, aw, dako gayod kaayo ang imong nasayloan!” Nganong mobati siya ug ingon niana? Tungod kay ang unang adlaw maoy sinugdan sa usa ka dagayang espirituwal nga bangkete nga gitagana sa organisasyon ni Jehova alang kanato. (Isa. 25:6) Ang atong pagkaatua didto sa pagsugod mismo nagpakita nga kita miuyon sa mga pagbati sa salmista: “Nagmaya ako sa pag-ingon nila kanako: ‘Mangadto kita sa balay ni Jehova.’”​—Sal. 122:1.

² Apan, sa miaging tuig diha sa pipila sa “Matagnaong Pulong sa Diyos” Distritong mga Kombensiyon, ang nanambong sa Biyernes ubos kaayo kay sa Sabado ug Dominggo. Nagpasabot kini nga ang dakong porsiyento sa atong mga igsoon wala makapaminaw sa mga bahin sa kombensiyon nga nagpresentar ug hinungdanong impormasyon bahin sa matagnaong pulong. Nasayloan usab nila ang makapalipay nga panag-ubanay sa mga isigkamagtutuo.

³ Ayawg Tugoti nga Mobabag ang Sekular nga Trabaho: Ang kabalaka bahin sa pagpameligro sa trabaho sa usa tingali mao ang hinungdan kon nganong ang pipila wala makatambong sa Biyernes. Bisan pa niana, daghang Saksi nakakaplag nga ang ilang mga amo andam nga makigtambayayong kanila niining butanga kon sila mohangyo nga abante pa kaayo nga dili motrabaho. Usa ka amo nakadayeg pag-ayo sa lig-ong determinasyon sa payunir nga sister sa pagtambong sa tanang tigom sa kongregasyon ug mga asembliya nga tungod niana siya migugol ug tibuok adlaw sa kombensiyon nga gitambongan sa maong sister.

⁴ Dili nimo angayng hunahunaon nga ang imong amo dili motugot nga ikaw dili motrabaho, ni angayng mohinapos ka nga ang pagsaylo ug usa ka adlaw sa kombensiyon dili hinungdanon. Uban ang kinasingkasing nga kombiksiyon, pangandam nga mataktikanhong ipakita ngadto sa imong amo gikan sa Kasulatan kon nganong ang pagtambong sa kombensiyon maoy usa ka hinungdanong bahin sa imong pagsimba. (Heb. 10:​24, 25) Dayon ibutang ang imong bug-os nga pagsalig sa mga saad ni Jehova, nga nag-ila nga bisan unsay imong gikinahanglan sa materyal nga paagi itagana kon padayon nimong unahon ang espirituwal nga mga panginahanglan sa imong kinabuhi.​—Mat. 6:​33; Heb. 13:​5, 6.

⁵ Ang yawing butang mao ang pagpabili alang sa “mas hinungdanong mga butang.” (Filip. 1:​10, 11; Sal. 27:4) Mopalihok kini kanato sa paghimog mga plano aron bug-os makakuhag kaayohan gikan niining hinungdanong tagana gikan kang Jehova. Sugdi ang paghimog tinong mga plano karon, ug magmadeterminado nga atua ka didto sa tulo ka adlaw!