Bag-ong Programa sa Adlawng Espesyal nga Asembliya
1 Bisan tuod gihimaya sa palaumagian sa balita ug sekular nga mga edukador ang materyal nga bahandi, ang Pulong sa Diyos nag-awhag kanato nga “Magmadato sa Maayong mga Buhat.” (1 Tim. 6:18) Mao kanay tema sa programa sa adlawng espesyal nga asembliya sugod sa Pebrero 2003. Unsang pagdasig ang atong madawat niining maong asembliya?
2 Ang magtatan-aw sa sirkito maghisgot kon unsay kahulogan nga “Magmadato sa Panglantaw sa Diyos,” ug iyang interbiyohon ang pipila nga nanlimbasog nga makabaton ug espirituwal nga mga bahandi. Sa iyang unang pakigpulong sa maong adlaw, hisgotan sa nagaduaw nga mamumulong kon sa unsang paagi himoon sa katawhan sa Diyos ang “Maayong mga Buhat Niining Panahon sa Ting-ani.” Ang matag usa kanato dasigon sa pagtagad kon sa unsang paagi kita makapakig-ambit pa ug dugang diha sa gisugo-sa-Diyos nga pagpangani nga ginahimo karong adlawa.
3 Pagkamalipayon nato sa dihang atong makita ang Kristohanong mga batan-on nga nangagpas sa espirituwal nga mga bahandi! Kini magahimaya kang Jehova ug magatabang sa mga batan-on nga makahimog maayong pundasyon alang sa umaabot nga mga pribilehiyo sa pag-alagad. Ang bahin nga “Dayega ang mga Batan-on Tungod sa Maayong mga Buhat sa Paghimaya Kang Jehova” magpasiugda sa maayong mga buhat nga ginahimo sa lokal nga mga batan-ong Kristohanon.
4 Unsa ang mga resulta sa pagpangagpas sa maayong mga buhat? Ang nagaduaw nga mamumulong maghisgot niini diha sa iyang kataposang pakigpulong, “Magpadayon sa Maayong mga Buhat ug Aniha ang mga Panalangin ni Jehova.” Iyang hisgotan ang upat ka bahin diin atong maani ang dagayang mga panalangin: (1) ingong mga indibiduwal, (2) ingong mga pamilya, (3) ingong kongregasyon, ug (4) ingong tibuok-kalibotang organisasyon.
5 Kadtong nakapahinungod na kang Jehova adunay kahigayonan sa pagpabawtismo. Kon andam ka na sa maong lakang, pahibaloa dayon ang nagadumalang magtatan-aw.
6 Sa dihang ipahibalo na ang petsa sa inyong asembliya, paghimo gilayon ug tinong mga plano nga makatambong. Paningkamoti nga moabot ug sayo aron makaduyog sa pangbukas nga awit ug pag-ampo. Ang pagtambong ug pagpaminaw pag-ayo sa tibuok programa sa adlawng espesyal nga asembliya mopalig-on kanato nga padayong pangagpason ang dalan nga makapadato gayod kanato sumala sa panglantaw sa atong Diyos, si Jehova.