Edukasyon—Gamita Kana sa Pagdayeg Kang Jehova
“Siya nga nagasulti sa iyaha rang kaugalingon nagatinguha sa iyang kaugalingong himaya; apan siya nga nagatinguha sa himaya niya nga nagpadala kaniya, kini siya matuod.”—JUAN 7:18.
1. Kanus-a ug sa unsang paagi nagsugod ang palakaw sa edukasyon?
ANG edukasyon nagsugod dugay, dugay nang panahon kanhi. Maoy sa pagkahuman gayod sa paglalang ni Jehova nga Diyos, ang Dakong Edukador ug Instruktor, sa panganay niyang Anak nga nagsugod ang palakaw sa edukasyon. (Isaias 30:20; Colosas 1:15) May Usa na nga makakat-on gikan sa Dakong Edukador mismo! Sa di-maihap nga mga milenyong suod nga pagpakig-uban sa Amahan, kanang maong Anak—nga nailhang si Jesu-Kristo—nakadawat sa tuman ka bililhong edukasyon mahitungod sa mga kinaiya, mga buhat, ug mga katuyoan ni Jehova nga Diyos. Sa ulahi, isip usa ka tawo sa yuta, si Jesus nakaingon: “Ako walay bisan unsa nga ginahimo sa akong kaugalingong pagbuot; apan ingon sa gitudlo sa Amahan kanako ako nagapamulong niining mga butanga.”—Juan 8:28.
2-4. (a) Sumala sa Juan kapitulo 7, unsa ang mga sirkumstansiya nga naglibot sa pagtambong ni Jesus sa Piyesta sa mga Balongbalong sa 32 K.P.? (b) Nganong ang mga Hudiyo nalibog bahin sa katakos ni Jesus sa pagpanudlo?
2 Sa unsang paagi gigamit ni Jesus ang edukasyon nga iyang nadawat? Sa iyang katibuk-ang tulog-tunga-ka-tuig nga ministeryo sa yuta, sa kawalay-kakapoy iyang gipakig-ambit sa uban ang iyang nakat-onan. Bisan pa, kadto gihimo nga may usa ka pangunang katuyoan sa hunahuna. Ug unsa ba kana? Atong susihon ang mga pulong ni Jesus sa Juan kapitulo 7, diin iyang gipatin-aw ang sinugdanan ug katuyoan sa iyang pagpanudlo.
3 Tagda ang kahimtang. Tinghunlak niadto sa 32 K.P., duolag tulo ka tuig human sa bawtismo ni Jesus. Ang mga Hudiyo nagtigom sa Jerusalem alang sa Piyesta sa mga Balongbalong. Sa unang pipila ka adlaw sa piyesta, dihay daghang sultisulti bahin kang Jesus. Sa tungatunga na sa piyesta, misulod si Jesus sa templo ug misugod pagpanudlo. (Juan 7:2, 10-14) Ingon nga kanunayng mahitabo, iyang gipamatud-an ang iyang kaugalingon nga usa ka dakong Magtutudlo.—Mateo 13:54; Lucas 4:22.
4 Ang bersikulo 15 sa Juan kapitulo 7 nag-ingon: “Busa ang mga Judio nangatingala, nga nanag-ingon: ‘Sa unsang paagi kining tawhana nakabaton ug kahibalo sa mga sinulat, nga wala man unta siya makatuon sa mga tunghaan?’” Nasabtan mo ba kon nganong sila nalibog? Si Jesus wala makatungha sa bisan hain sa mga tunghaang rabiniko, mao nga siya dili edukado—o mao kana ang ilang paghunahuna! Bisan pa niana, si Jesus sayon nga makapangita ug makabasa sa mga bahin sa Sagradong Kasulatan. (Lucas 4:16-21) Ngani, kadtong panday nga taga-Galilea nagtudlo pa kanila sa Balaod ni Moises! (Juan 7:19-23) Sa unsang paagi naposible kadto?
5, 6. (a) Giunsa ni Jesus pagpatin-aw ang tinubdan sa iyang pagpanudlo? (b) Sa unsang paagi gigamit ni Jesus ang iyang edukasyon?
5 Si Jesus mipatin-aw, sumala sa atong mabasa sa mga bersikulo 16 ug 17: “Ang akong ginatudlo dili akoa, kundili iyaha sa nagpadala kanako. Kon ang bisan kinsa magatinguha sa pagbuhat sa Iyang kabubut-on, siya mahibalo mahitungod sa pagtulon-an kon kini gikan ba sa Diyos o ako ba nagsulti sa akoa rang kaugalingon.” Gusto nilang masayran kon kinsay nagtudlo kang Jesus, ug tin-aw niyang giingnan sila nga ang iyang edukasyon maoy gikan sa Diyos!—Juan 12:49; 14:10.
6 Giunsa paggamit ni Jesus ang iyang edukasyon? Sumala sa natala sa Juan 7:18, si Jesus miingon: “Siya nga nagasulti sa iyaha rang kaugalingon nagatinguha sa iyang kaugalingong himaya; apan siya nga nagatinguha sa himaya niya nga nagpadala kaniya, kini siya matuod, ug walay pagkadili-matarong diha kaniya.” Pagkaangay nga gigamit ni Jesus ang iyang edukasyon aron sa paghatag ug himaya kang Jehova, “ang Usa nga hingpit sa kahibalo”!—Job 37:16.
7, 8. (a) Sa unsang paagi angayng gamiton ang edukasyon? (b) Unsa ang upat ka pangunang tumong sa balanseng edukasyon?
7 Sa ingon makakat-on kitag bililhong leksiyon gikan ni Jesus—ang edukasyon angay nga gamiton, dili aron paghimaya sa kaugalingon, kondili aron paghatag ug himaya kang Jehova. Wala nay mas maayong paagi sa paggamit sa edukasyon. Nan, sa unsang paagi makagamit ka sa edukasyon aron paghatag ug himaya kang Jehova?
8 Ang pag-edukar nagkahulogang “pagbansay pinaagi sa pormal nga instruksiyon ug may-nagdumala nga pagbansay ilabina sa usa ka kahanas, pakamot nga trabaho, o propesyon.” Atong hisgotan karon ang upat ka pangunang tumong sa balanseng edukasyon ug kon sa unsang paagi ang matag usa niini magamit sa pagdayeg kang Jehova. Ang balanseng edukasyon angay nga mobulig kanato (1) sa pagbasag maayo, (2) sa pagsulat nga tin-aw, (3) sa pagtubo sa mental ug moral nga paagi, ug (4) sa pagbaton ug praktikal nga pagbansay nga gikinahanglan alang sa adlaw-adlaw nga pagkinabuhi.
Pagkat-on sa Pagbasag Maayo
9. Nganong hinungdanon ang pagkamaayong magbabasa?
9 Natala nga una mao ang pagkat-on sa pagbasag maayo. Nganong hinungdanon kaayo ang pagkamaayong magbabasa? Ang The World Book Encyclopedia nagpatin-aw: “Ang pagbasa . . . maoy paninugdan sa pagkat-on ug usa sa labing hinungdanong mga kahanas sa matag-adlaw nga kinabuhi. . . . Ang hanas nga mga magbabasa makaabag ngadto sa pagmugnag mauswagon, mabungahong katilingban. Sa samang panahon, matagamtam nila mismo ang mas tugob, mas matagbawong mga kinabuhi.”
10. Sa unsang paagi ang pagbasa sa Pulong sa Diyos mobulig kanato sa pagpahimulos sa mas tugob, mas matagbawong mga kinabuhi?
10 Kon ang pagbasa sa katibuk-an makatabang kanato aron matagamtam ang “mas tugob, mas matagbawong mga kinabuhi,” pagkalabi pang tinuod kini sa pagbasa sa Pulong sa Diyos! Ang maong pagbasa magbukas sa atong mga kaisipan ug mga kasingkasing alang sa mga panghunahuna ug mga katuyoan ni Jehova, ug ang matin-awng pagsabot niini mohatag ug kahulogan sa atong mga kinabuhi. Dugang pa, “ang pulong sa Diyos buhi ug gamhanang nagalihok,” matod sa Hebreohanon 4:12. Samtang magbasa kita sa Pulong sa Diyos ug magpalandong niini, kita mas masuod sa Awtor niini, ug kita matukmod sa paghimog mga kausaban diha sa atong mga kinabuhi aron mahimong mas kahimut-anan alang kaniya. (Galacia 5:22, 23; Efeso 4:22-24) Madasig usab kita sa pagpaambit sa uban sa bililhong mga kamatuoran nga atong gibasa. Kining tanan magdalag pagdayeg sa Dakong Edukador, si Jehova nga Diyos. Tino nga walay mas maayong paagi sa paggamit sa atong katakos sa pagbasa!
11. Unsay angay ilakip sa balanseng programa sa personal nga pagtuon?
11 Bata man o tigulang, gidasig kita sa pagtuon sa pagbasag maayo, kay ang pagbasa nagdulag usa ka hinungdanong bahin sa atong Kristohanong pagkinabuhi. Gawas pa sa regular nga pagbasa sa Pulong sa Diyos, ang balanseng programa sa personal nga pagtuon maglakip sa paghisgot sa teksto sa Bibliya gikan sa Pagsusi sa Kasulatan sa Adlaw-Adlaw, pagbasa sa Ang Bantayanang Torre ug Pagmata!, ug pagpangandam alang sa Kristohanong mga tigom. Ug komosta ang Kristohanong ministeryo? Tin-aw, ang pagsangyaw sa publiko, paghimog mga pagbalik-duaw sa mga tawong interesado, ug pagdumalag mga pagtuon sa Bibliya sa balay ngatanan nagkinahanglan sa maayong katakos sa pagbasa.
Pagkat-on sa Pagsulat nga Tin-aw
12. (a) Nganong hinungdanon ang pagsulat nga tin-aw? (b) Unsa ang kinalabwang pagsulat nga sukad nahimo?
12 Ang ikaduhang tumong mao nga ang balanseng edukasyon angay nga mobulig kanato sa pagkat-on sa pagsulat nga tin-aw. Dili lamang nga ang pagsulat magpasa sa atong mga pulong ug mga ideya kondili kini magpreserbar usab niini. Daghan, daghang siglo kanhi, mga 40 ka Hudiyong lalaki nagsulat diha sa papiro o panit sa karnero o kanding sa mga pulong nga nahimong dinasig nga Kasulatan. (2 Timoteo 3:16) Tinong kadto ang kinadak-ang pagsulat nga sukad nahimo! Sa walay duhaduha si Jehova naggiya sa pagkopya ug pagkopya pag-usab niadtong sagradong mga pulong latas sa kasiglohan, mao nga nahidangat kana kanato sa kasaligang dagway. Dili ba kita mapasalamaton nga gipasulat ni Jehova ang iyang mga pulong, inay isalig ang pagpasa pinaagi sa baba?—Itandi ang Exodo 34:27, 28.
13. Unsay nagpaila nga ang mga Israelinhon antigong mosulat?
13 Sa karaang kapanahonan, pila lamang ka pribilehiyadong mga matang, sama sa mga eskriba sa Mesopotamia ug Ehipto, ang edukado. Nga lahi kaayo sa mga nasod, ang matag usa sa Israel gidasig nga mahimong edukado. Ang sugo sa Deuteronomio 6:8, 9 nga ang mga Israelinhon magsulat diha sa mga haligi sa ilang mga balay, bisan pag morag masambingayon, nagpasabot nga sila antigong mosulat. Sa linghod nga panuigon, gitudloan na ang mga bata kon unsaon pagsulat. Ang Gezer nga Kalendaryo, usa sa kinakaraanang mga pananglitan sa sinulat nga karaang Hebreohanon, gihunahuna sa pila ka eskolar nga maoy pagbansaybansay sa memorya sa usa ka batang nagtungha.
14, 15. Unsa ang pipila ka positibo ug maayong mga paagi sa paggamit sa katakos sa pagsulat?
14 Apan sa unsang paagi makagamit kita sa mapuslanon ug maayong paagi sa katakos sa pagsulat? Sa pagkamatuod pinaagi sa paghimog mga nota panahon sa Kristohanong mga tigom, mga asembliya, ug mga kombensiyon. Ang usa ka sulat, bisan pag gisulat “sa pila ra ka pulong,” makahatag ug kadasig ngadto sa usa nga masakiton o makapahayag ug pasalamat ngadto sa usa ka espirituwal nga igsoong lalaki o babaye nga nagmaluloton o nagmaabiabihon kanato. (1 Pedro 5:12) Kon ang usa sa kongregasyon namatyag usa ka minahal, ang mubong sulat o kard “makasulting mahupayon” sa maong tawo ilis kanato. (1 Tesalonica 5:14) Ang usa ka Kristohanong sister nga namatyag inahan gumikan sa kanser misaysay: “Gisulatan ako sa usa ka higala ug nindot nga sulat. Nakatabang gayod kadto tungod kay gibalikbalik ko kadto sa pagbasa.”
15 Usa ka labing maayong paagi sa paggamit sa katakos sa pagsulat mao ang paghatag ug pagdayeg kang Jehova pinaagi sa paghimog usa ka sulat aron makasangyaw bahin sa Gingharian. Gikinahanglan tingali usahay nga makigkontak sa mga tawong bag-o pang interesado nga nagpuyo sa hilit nga mga dapit. Tingali malisdan ka sa pagbalay-balay tungod sa sakit. Ang usa ka sulat mahimong makapahayag kon unsay kasagarang isulti nimo sa personal.
16, 17. (a) Unsang kasinatian ang nagpasundayag sa bili sa paghimog sulat aron makapamatuod bahin sa Gingharian? (b) Makaasoy ka ba ug samang kasinatian?
16 Tagda ang usa ka kasinatian. Daghang tuig kanhi usa ka Saksi mihimog usa ka sulat nga nagpamatuod bahin sa Gingharian ngadto sa biyuda sa usa ka lalaki kansang kamatayon gianunsiyo sa lokal nga mantalaan. Wala ing tubag. Dayon, niadtong Nobyembre 1994, kapig 21 ka tuig sa ulahi, ang Saksi nakadawat ug sulat gikan sa anak babaye sa biyuda. Ang anak babaye misulat:
17 “Niadtong Abril 1973, misulat ka sa akong inahan aron lingawon siya sa pagkamatay sa akong amahan. Ako niadto nuybe anyos. Mituon sa Bibliya ang akong inahan, apan sa pagkakaron dili pa siya alagad ni Jehova. Bisan pa niana, ang iyang pagtuon misangpot sa kadugayan sa pagkalangkit nako sa kamatuoran. Niadtong 1988, gisugdan ko ang akong pagtuon sa Bibliya—15 anyos human sa pagkadawat sa imong sulat. Niadtong Marso 9, 1990, ako nabawtismohan. Ako mapasalamaton kaayo sa imong sulat daghang tuig kanhi ug malipayon kaayo nga ipahibalo kanimo nga kadtong mga binhi nga imong gitanom mitubo gayod, sa tabang ni Jehova. Gihatag kanako sa akong inahan ang imong sulat aron katagoan, ug gusto nako nga mailhan ka. Hinaot nga makaabot kanimo kining sulata.” Ang sulat sa anak babaye, nga naglakip sa iyang adres ug numero sa telepono, nakaabot gayod sa Saksi nga nagsulat daghan na kaayong katuigan kanhi. Tiaw na ang katingala sa batan-ong babaye sa pagkadawat niyag usa ka tawag sa telepono gikan sa Saksi—si kinsa nagsulat gihapon ug mga sulat aron ipaambit sa uban ang paglaom sa Gingharian!
Pagtubo sa Mental, Moral, ug Espirituwal nga Paagi
18. Sa kapanahonan sa Bibliya, sa unsang paagi giatiman sa mga ginikanan ang mental ug moral nga edukasyon sa ilang mga anak?
18 Ang ikatulong tumong mao nga ang balanseng edukasyon angay nga mobulig kanato sa pagtubo sa mental ug moral nga paagi. Sa kapanahonan sa Bibliya ang pag-edukar sa mga anak sa mental ug moral nga paagi giisip nga usa sa pangunang mga katungdanan sa mga ginikanan. Ang mga bata wala lamang tudloi sa pagbasa ug pagsulat kondili, labi pang hinungdanon, giedukar sa Balaod sa Diyos, nga naglangkit sa tanan nilang kalihokan sa kinabuhi. Busa, ang edukasyon naglakip sa pagtudlo bahin sa ilang relihiyosong mga obligasyon ug mga prinsipyo nga nagmando sa kaminyoon, pamilyahanong mga relasyon, ug seksuwal nga moralidad, ingon man sa ilang mga obligasyon ngadto sa ilang isigkatawo. Ang maong edukasyon nagtabang kanila nga motubo dili lamang sa mental ug moral nga paagi kondili sa espirituwal nga paagi usab.—Deuteronomio 6:4-9, 20, 21; 11:18-21.
19. Asa kita makakaplag ug edukasyon nga nagpakita kanato sa labing maayong mga sukdanan sa moral nga sundon sa kinabuhi ug nga mobulig kanato nga motubo sa espirituwal nga paagi?
19 Komosta karong adlawa? Hinungdanon ang maayong sekular nga edukasyon. Mobulig kini kanato nga motubo sa mental nga paagi. Apan asa kita makadangop alang sa edukasyon nga magpakita kanato sa labing maayong mga sukdanan sa moral nga sundon sa kinabuhi ug mobulig kanato nga motubo sa espirituwal nga paagi? Sulod sa Kristohanong kongregasyon, kita makapahimulos sa usa ka programa sa teokratikanhong edukasyon nga dili mabatonan sa bisan asa pa sa yuta. Pinaagi sa atong personal nga pagtuon sa Bibliya ug sa binase-sa-Bibliya nga mga publikasyon ingon man sa pagtudlo nga gitagana panahon sa mga tigom sa kongregasyon, mga asembliya, ug mga kombensiyon, atong madawat kining bililhon kaayo, nagpadayon nga edukasyon—ang balaang edukasyon—nga walay bayad! Unsay gitudlo niini kanato?
20. Unsay gitudlo kanato sa balaang edukasyon, ug unsay mosangpot gikan niana?
20 Sa dihang mosugod kita sa pagtuon sa Bibliya, makat-onan nato ang paninugdang mga pagtulon-an sa Kasulatan, ‘ang pangunang mga doktrina.’ (Hebreohanon 6:1) Samtang magpadayon kita, kita mokaon ug “gahing pagkaon”—nga mao, ang mas laglom nga mga kamatuoran. (Hebreohanon 5:14) Labaw pa niana, hinunoa, makat-onan nato ang diyosnong mga prinsipyo nga magtudlo kanato kon unsaon pagkinabuhi sumala sa gusto sa Diyos nga magkinabuhi kita. Pananglitan, makakat-on kita sa paglikay sa mga bisyo ug mga batasan nga ‘magahugaw sa unod’ ug magbaton sa pagtahod alang sa awtoridad ug alang sa pagkatawo ug kabtangan sa uban. (2 Corinto 7:1; Tito 3:1, 2; Hebreohanon 13:4) Dugang pa, atong mapabilhan ang kahinungdanon sa pagkamaminatud-on ug pagkamakugihon sa atong trabaho ug ang bili sa pagkinabuhi sumala sa mga sugo sa Bibliya bahin sa seksuwal nga moralidad. (1 Corinto 6:9, 10; Efeso 4:28) Samtang mouswag kita sa pagpadapat niining mga prinsipyoha diha sa atong mga kinabuhi, kita motubo sa espirituwal nga paagi, ug molalom ang atong relasyon uban sa Diyos. Dugang pa, ang atong diyosnong panggawi maghimo kanato nga maayong mga lungsoranon, bisan pa kon diin kita nagpuyo. Ug kini mahimong magdasig sa uban sa paghimaya sa Tinubdan sa balaang edukasyon—si Jehova nga Diyos.—1 Pedro 2:12.
Praktikal nga Pagbansay Alang sa Adlaw-Adlaw nga Pagkinabuhi
21. Unsang praktikal nga pagbansay ang nadawat sa mga anak sa kapanahonan sa Bibliya?
21 Ang ikaupat nga tumong sa balanseng edukasyon mao ang pagtagana sa usa ka tawo ug praktikal nga pagbansay nga gikinahanglan alang sa adlaw-adlaw nga pagkinabuhi. Ang ginikananhong pag-edukar sa kapanahonan sa Bibliya naglakip sa praktikal nga pagbansay. Ang batang mga babaye gitudloan sa mga kahanas sa panimalay. Ang kataposang kapitulo sa Proverbio nagpadayag nga kini mahimong daghan ug nagkadaiya. Sa ingon, ang batang mga babaye nasangkapan sa pagbilik, paghablon, ug pagluto ug pag-atiman sa katibuk-ang pagdumala sa panimalay, pagnegosyo, ug mga transaksiyon sa propiedad. Ang batang mga lalaki kasagarang gitudloan sa sekular nga trabaho sa ilang amahan, pagpanguma kaha o usa ka pangamot. Si Jesus nakakat-on sa pagpamanday gikan sa iyang amaama, si Jose; sa ingon, siya gitawag dili lamang “ang anak sa panday” apan “ang panday” usab.—Mateo 13:55; Marcos 6:3.
22, 23. (a) Alang sa unsa nga ang edukasyon magaandam sa mga anak? (b) Unsay angay nga atong motibo sa pagpilig dugang nga edukasyon sa dihang kana daw gikinahanglan?
22 Karong adlawa, usab, ang balanseng edukasyon naglakip sa pagpangandam aron matagan-an sa usa ka adlaw ang mga panginahanglan sa pamilya. Ang mga pulong ni apostol Pablo nga hikaplagan sa 1 Timoteo 5:8 nagpailang ang pagtagana sa pamilya sa usa maoy sagradong obligasyon. Misulat siya: “Tino nga kon si bisan kinsa wala magatagana alang kanila nga iyang kaugalingon, ug ilabina alang kanila nga mga membro sa iyang panimalay, siya nagalimod sa pagtuo ug mas daotan pa kay sa tawong walay pagtuo.” Busa, ang edukasyon angayng mag-andam sa mga anak alang sa mga responsabilidad nga ilang abagahon sa kinabuhi ingon man magsangkap kanila aron mahimong kugihang mga membro sa komunidad.
23 Unsa ka dakong sekular nga edukasyon ang atong pangagpason? Kini tingali maglainlain gikan sa usa ka nasod ngadto sa laing nasod. Apan kon ang panarbaho magkinahanglag pagbansay nga dugang pa sa minimong gipangayo sa balaod, anaa ra sa mga ginikanan ang paggiya sa ilang mga anak sa paghimog desisyon bahin sa dugang nga edukasyon o pagbansay, nga magtimbangtimbang sa lagmit nga mga kaayohan ug mga kakulian sa maong dugang nga mga pagtuon. Apan, unsay angay nga motibo sa usa sa pagpilig dugang nga edukasyon sa dihang kana daw gikinahanglan? Tino nga dili bahandi, kaugalingong himaya, o pagdayeg. (Proverbio 15:25; 1 Timoteo 6:17) Hinumdomi ang leksiyong atong nakat-onan gikan sa panig-ingnan ni Jesus—ang edukasyon angayng gamiton sa paghatag ug pagdayeg kang Jehova. Kon pilion nato ang dugang nga edukasyon, ang atong motibo angay nga mao ang tinguha nga igong masuportahan ang atong kaugalingon sa pinansiyal aron kita makaalagad kang Jehova sa bug-os kutob sa mahimo diha sa Kristohanong ministeryo.—Colosas 3:23, 24.
24. Unsang leksiyon nga nakat-onan gikan ni Jesus ang angayng dili gayod nato kalimtan?
24 Busa, magmakugihon kita sa atong mga paningkamot nga makabaton ug balanseng sekular nga edukasyon. Hinaot pahimuslan nato sa bug-os ang nagpadayong programa sa balaang edukasyon nga gitagana sulod sa organisasyon ni Jehova. Ug hinaot dili gayod kita malimot sa bililhong leksiyon nga atong nakat-onan gikan ni Jesu-Kristo, ang labing edukadong tawo nga sukad nabuhi niining yutaa—ang edukasyon angayng gamiton, dili aron paghimaya sa atong kaugalingon, kondili aron paghatag ug himaya sa kinalabwang Edukador sa tanan, si Jehova nga Diyos!
Unsa ang Imong Tubag?
◻ Giunsa paggamit ni Jesus ang iyang edukasyon?
◻ Nganong hinungdanon ang pagkat-on sa pagbasag maayo?
◻ Sa unsang paagi magamit nato ang katakos sa pagsulat aron paghatag ug pagdayeg kang Jehova?
◻ Sa unsang paagi ang balaang edukasyon mobulig kanato nga motubo sa moral ug espirituwal nga paagi?
◻ Unsang praktikal nga pagbansay ang angay ilakip sa balanseng edukasyon?
[Kahon sa panid 13]
Praktikal nga Tabang Alang sa mga Edukador
Sa “Malipayong mga Magdadayeg” Distritong mga Kombensiyon sulod sa 1995/96, ang Watch Tower Society nagluwat ug usa ka bag-ong brosyur nga nag-ulohang Mga Saksi ni Jehova ug Edukasyon. Kining 32-panid, daghang-kolor nga brosyur gipatik alang ilabina sa mga edukador. Sa pagkakaron kini nahubad sa 58 ka pinulongan.
Nganong adunay usa ka brosyur alang sa mga edukador? Sa pagtabang kanila nga mas masabtan ang mga tinuohan sa mga estudyante nga mga anak sa mga Saksi ni Jehova. Unsay sulod sa brosyur? Sa tin-aw ug positibong paagi, kini nagsaysay sa among mga hunahuna sa mga isyu sama sa dugang nga edukasyon, mga adlawng-natawhan ug Pasko, ug sa pagsaludar sa bandera. Ang brosyur nagpasalig usab sa mga edukador nga buot namong ang among mga anak magpahimulos sa labing maayo sa ilang pag-eskuyla ug kami buot gayong mokooperar sa mga edukador, nga magbatog aktibong kaikag sa edukasyon sa among mga anak.
Sa unsang paagi magamit ang brosyur nga Edukasyon? Sanglit gigama kini alang sa mga edukador, ipaambit namo kini sa mga magtutudlo, mga prinsipal, ug ubang opisyales sa eskuylahan. Hinaot kining bag-ong brosyur mobulig nianang tanang edukador sa pagsabot sa among mga hunahuna ug mga tinuohan ug kon nganong usahay kami moangkon sa katungod nga mahimong lahi. Ang mga ginikanan gidasig sa paggamit sa brosyur ingong pasikaranan alang sa personal nga pakighisgot uban sa mga edukador sa ilang mga anak.
[Hulagway sa panid 10]
Sa karaang Israel ang edukasyon gitamod pag-ayo