Pagkamainiton ug Pagbati

ANG emosyon maoy pundamental nga bahin sa kinabuhi sa tawo. Sa dihang ipadayag sa usa ka tawo ang iyang mga emosyon, ibutyag niya kon unsay sulod sa iyang kasingkasing, ang matang sa iyang pagkatawo sa kinasuloran, ug kon unsay iyang bation bahin sa mga kahimtang ug mga tawo. Tungod sa mapintasong mga kasinatian sa ilang mga kinabuhi​—ug sa pipila ka kahimtang, tungod sa kultural nga mga impluwensiya​—daghang tawo moluom sa ilang mga emosyon. Apan si Jehova nagdasig nga ugmaron nato ang positibong mga hiyas sa sulod nga pagkatawo ug dayon ipadayag sa tukma kon unsay anaa sa kasingkasing.​—Roma 12:10; 1 Tes. 2:​7, 8.

Sa dihang kita mosulti, ang mga pulong nga atong gamiton mahimong magpaila sa mga emosyon sa hustong paagi. Apan kon ang atong mga pulong dili ipahayag nga may nahiangayng pagbati, silang maminaw kanato basin magduhaduha sa atong kasinsero. Sa laing bahin, kon ang mga pulong ipahayag nga may nahiangayng pagbati, ang atong mga pulong mahimong matahom ug lumo nga basin makatandog sa mga kasingkasing sa mga tawong maminaw.

Pagpakitag Pagkamainiton. Ang mainitong mga pagbati sagad ilangkit sa mga panghunahuna bahin sa mga tawo. Busa, sa dihang kita mosulti bahin sa hamiling mga hiyas ni Jehova ug sa dihang ipahayag nato ang atong pagpabili sa pagkamaayo ni Jehova, ang atong tingog angayng mainiton. (Isa. 63:7-9) Ug sa dihang makigsulti sa mga isigkatawo, ang atong paagi sa pagsulti kinahanglang magpakitag makapadaning pagkamainiton.

Usa ka sanlahon miduol kang Jesus ug nagpakiluoy nga ayohon. Handurawa ang tono sa tingog ni Jesus sa dihang siya miingon: “Buot ko. Mamahinlo ka.” (Mar. 1:​40, 41) Handurawa, usab, ang talan-awon sa dihang usa ka babaye nga gitalinug-an sulod sa 12 ka tuig mihinok pagduol kang Jesus gikan sa likod ug mihikap sa sidsid sa iyang panggawas nga besti. Sa pagkaamgo nga siya namatikdan, ang babaye miduol nga nagpangurog, miluhod sa tiilan ni Jesus, ug mibutyag atubangan sa tanang tawo kon nganong gihikap niya ang besti ni Jesus ug kon sa unsang paagi siya naayo. Hunahunaa ang paagi sa pagsulti ni Jesus kaniya: “Anak, ang imong pagtuo nakapaayo kanimo; lakaw nga malinawon.” (Luc. 8:42b-48) Ang pagkamainiton nga gipasundayag ni Jesus sa maong mga okasyon makatukbil sa atong mga kasingkasing hangtod karon.

Kon, sama kang Jesus, kita maluoy sa mga tawo ug kon kita buot gayong motabang kanila, kini makita sa atong paagi sa pagpakigsulti kanila. Kana nga ekspresyon sa pagkamainiton maoy sinsero, dili hinobra. Ang atong pagkamainiton makaapektar ug dako kon unsay pagsanong sa mga tawo. Ang kadaghanan nga atong isulti diha sa ministeryo sa kanataran makaabag aron makab-ot kining matanga sa ekspresyon, ilabina sa dihang kita mangatarongan, magadasig, magaawhag, ug mosimpatiya.

Kon ikaw adunay mainitong pagbati sa uban, ipakita kana sa imong nawong. Kon ipakita nimo ang pagkamainiton, madani nimo ang imong mamiminaw ingon sa kalayo sa matugnaw nga kagabhion. Kon ang pagkamainiton dili dayag diha sa imong nawong, ang imong mamiminaw basin dili motuo nga ikaw sinserong may pagtagad kanila. Ang pagkamainiton dili ikasul-ob samag maskara​—kini kinahanglang tiunay.

Ang pagkamainiton angayng madayag usab diha sa imong tingog. Kon ikaw adunay gahi, basag nga tingog, ang pagkamainiton basin lisod ipakita diha sa imong sinultihan. Apan sa paglabay sa panahon ug pinaagi sa pagkugi, ikapadayag mo ang pagkamainiton. Ang usa ka butang nga tingali makatabang, kon teknik ang hisgotan, mao ang paghinumdom nga ang kalitkalit, putolputol nga paglitok makahimo sa sinultihan nga daw inarteng paminawon. Kat-oni nga padugayon ang mas maluming nga tingog sa mga pulong. Motabang kini nga magmainiton ang imong pagsulti.

Bisan pa niana, mas hinungdanon ang sentro sa imong interes. Kon ang imong mga hunahuna sa kasinsero nasentro sa mga tawo nga imong pakigsultihan ug ikaw may idlot nga tinguha sa pagpasag impormasyon nga makahatag nilag kaayohan, ang maong pagbati mabanaag diha sa imong paagi sa pagsulti.

Ang buhi nga pakigpulong makapadasig, apan ang malumong pagbati kinahanglanon usab. Dili kanunay igo nga atong madani ang hunahuna; palihokon usab nato ang kasingkasing.

Pagpahayag sa Ubang mga Pagbati. Ang mga emosyon sama sa kabalaka, kahadlok, ug depresyon mahimong ikapahayag sa usa ka tawong anaa sa kaguol. Ang kalipay maoy emosyon nga angayng mopatigbabaw sa atong mga kinabuhi ug nga madagayaon natong ipadayag kini sa pagpakigsulti sa uban. Sa laing bahin, ang ubang mga emosyon kinahanglang pukgoon. Kini wala mahiuyon sa Kristohanong personalidad. (Efe. 4:​31, 32; Filip. 4:4) Ang tanang matang sa emosyon ikapahayag pinaagig mga pulong nga atong pilion, tono sa atong tingog, gikusgon sa atong pagsulti, atong panagway, ug mga pagkompas.

Ang Bibliya nagsaysay sa tanang tawhanong mga emosyon. Usahay nganlan lamang niini ang mga emosyon. Sa ubang mga higayon kini moasoy sa mga hitabo o mokutlog mga pulong nga magbutyag sa mga emosyon. Kon basahon nimog kusog ang maong materyal, mas dako ang epekto niini, para kanimo ug sa mga magpatalinghog kanimo, kon ang imong tingog magsumbalik-silaw sa maong mga emosyon. Aron mahimo kana angay nimong hunahunaon nga ikaw mao ang gihisgotan diha sa imong ginabasa. Hinuon, ang pakigpulong dili usa ka pasundayag sa teatro, busa pagbantay nga dili ka maghinobra. Isilsil ang mga teksto diha sa alimpatakan sa mga maminaw.

Nahiangay sa Materyal. Sama sa kadasig, ang pagkamainiton nga ipakita nimo sa imong ekspresyon ug ubang mga emosyon nga imong ipadayag, mag-agad pag-ayo sa imong isulti.

Paklia ang Mateo 11:28-30, ug matikdi ang gisulti niini. Dayon basaha ang paghukom ni Jesus sa mga eskriba ug mga Pariseo, segun sa natala sa Mateo kapitulo 23. Kita dili makaingon nga gipahayag niya kining mapait nga mga pulong sa paghukom sa luya ug gilaay nga paagi.

Sa imong hunahuna unsang matanga sa pagbati ang gikinahanglan diha sa asoy sama nianang sa Genesis kapitulo 44 bahin sa pangaliyupo ni Juda alang sa iyang igsoong si Benjamin? Matikdi ang gipahayag nga emosyon sa bersikulo 13, ang gipakita sa bersikulo 16 kon unsay gibati ni Juda labot sa hinungdan sa katalagman, ug kon sa unsang paagi misanong si Jose, sumala sa giingon sa Genesis 45:1.

Busa, kon kita nagabasa o nagasulti, aron mahimo kana nga epektibo angay natong palandongon dili lamang ang mga pulong ug mga ideya kondili usab ang mga pagbati nga angayng iduyog niini.