Ang Pagkalabaw ug Bili sa Kaalam sa Diyos

¹ Naghunahuna ang ubang mga tawo nga ang mga Saksi ni Jehova kinahanglang isentro gayod ang ilang mga paningkamot maylabot sa pagtabang sa pagpagaan sa mga problema nga giatubang sa katawhan karong adlawa. Ang maong mga tawo wala makasabot sa pagkalabaw ug bili sa atong edukasyonal nga buluhaton bahin sa Bibliya. Kana maoy sama sa gisulat ni apostol Pablo: “Ang gisulti bahin sa estaka sa pagsakit maoy kabuangan alang sa mga nagakalaglag, apan kanato nga ginaluwas kini maoy gahom sa Diyos.” (1 Cor. 1:18) Sa pagkatinuod, kita nasayod nga ang Kristohanong ministeryo mao ang labing hinungdanong buluhaton nga ginahimo karon sa yuta.

² Usa ka Mas Maayong Kinabuhi Karon: Ang tawhanong mga paningkamot sa pagsulbad sa mga problema sa katawhan nakapatunghag limitado kaayong mga resulta. Ang mga balaod nga nagdili sa mga buhat sa krimen wala makasanta sa pag-usbaw sa krimen. Ang mga tratado sa kalinaw ug mga puwersa alang sa pagpatunhay sa kalinaw wala makapahunong sa gubat. Ang mga programa alang sa kaayohan sa katilingban napakyas sa pagwagtang sa kakabos. (Sal. 146:3, 4; Jer. 8:9) Sa kasukwahi, ang mensahe sa Gingharian nakapausab sa kinabuhi sa milyonmilyon pinaagi sa pagtabang kanila sa pagsul-ob ug bag-ong personalidad nga dalawaton sa Diyos. (Roma 12:2; Col. 3:9, 10) Sa pagbuhat niana, natagamtam nila ang mas maayong kahimtang sa kinabuhi karon dayon.—1 Tim. 4:8.

³ Usa ka Masanag nga Umaabot: Gawas pa sa pagtabang kanato sa pagsagubang sa mga problema sa kinabuhi karon, ang diyosnong kaalam magpaarang kanato sa pagplano nga epektibo alang sa umaabot. (Sal. 119:105) Kini makapalingkawas kanato sa paghimog kawang nga mga paningkamot sa pagreporma sa presenteng sistema sa mga butang. (Eccl. 1:15; Roma 8:20) Dako gayod ang atong pasalamat nga wala nato usiki ang atong kinabuhi sa pag-agpas sa mga tumong nga mugna lamang sa handurawan! Hinunoa, atong gisentro ang atong mga paningkamot diha sa tinuod nga saad ni Jehova nga “bag-ong mga langit ug usa ka bag-ong yuta” diin magapuyo ang pagkamatarong. Sa pag-abot sa adlaw sa paghukom ni Jehova, madayag gayod nga kadtong misalig sa diyosnong kaalam nakahimog hustong pagpili.—2 Ped. 3:10-13; Sal. 37:34.

⁴ Bisan pag ang diyosnong kaalam morag di-praktikal niadtong tumang nalinga sa “kaalam niini nga sistema sa mga butang,” kini sa pagkatinuod mao ang bugtong praktikal nga dalan nga angayng subayon. (1 Cor. 1:21; 2:6-8) Busa, magpadayon kita sa pagmantala sa tibuok yuta sa mensahe nga gikan sa Diyos, kinsa mao “ang bugtong maalamon.”—Roma 16:27.