“Hupti Ninyo ang Maayong Panggawi Taliwala sa mga Nasod”

1. Nganong importante nga maayo tag panggawi panahon sa regional convention?

¹ Panahon sa mga kombensiyon, mamatikdan gyod ta sa mga tawo maong importante nga ang atong panggawi dili makapasipala sa Diyos nga atong gisimba. (Lev. 20:26) Angayng makita sa atong pamatasan, sininaan, ug pagpangareglar nga kita tinuod nga mga sumusunod ni Kristo. Sa atong pagtambong sa regional convention, unsaon nato ‘paghupot ang maayong panggawi taliwala sa mga nasod’ aron mahimaya ang atong langitnong Amahan?—1 Ped. 2:12.

2. Unsang mga kahimtang panahon sa kombensiyon nga magpakita tag Kristohanong pamatasan?

² Ipakita ang Kristohanong Pamatasan: Ang atong gugma sa usag-usa ug ang atong pagtagad “sa mga tagagawas” lahi kaayo sa tinamdan sa kalibotan. (Col. 3:10; 4:5; 2 Tim. 3:1-5) Kinahanglang buotan ta ug mapailobon dihang mangaon sa restawran, bisag duna pay motunghang problema. Apil sa maayong pamatasan ang paghatag ug tip para niadtong nagserbisyo nato.

3. Unsay pahinumdom para sa mga ginikanan, ug ngano?

³ Ang mga ginikanan kinahanglang maningkamot nga bantayan ang ilang mga anak diha sa asembliyahanan, restawran, ug sa ilang gisak-an. (Prov. 29:15) Ang manedyer sa restawran sa usa ka hotel miingon sa usa ka magtiayon: “Ganahan kaayo mi ninyo. Ang mga pamilya ug mga bata buotan kaayo ug matinahoron. Pirme mong hisgotan sa among mga empleyado, ug maayo untag nia mo kada semana.”

4. Panahon sa kombensiyon, unsay atong tagdon bahin sa atong sinina?

⁴ Kristohanong Sinina: Ang atong sinina panahon sa kombensiyon kinahanglang haom para sa Kristohanon ug makasaranganon, dili sama sa kalibotanong mga estilo. (1 Tim. 2:9) Bisan dihang manuroy sa dili pa o human sa sesyon, likayan nato ang sobra ka kaswal o dili desente nga sinina. Sa ingon dili ta maulaw magtaod sa atong badge card ug makasangyaw ta kon dunay kahigayonan. Kon desente tag hitsura ug maayog pamatasan panahon sa kombensiyon, madani ang sinserong mga tawo sa mensahe sa Bibliya ug labaw sa tanan atong malipay si Jehova.—Sof. 3:17.