TUN-ANAN 6

Tin-aw nga Pagpadapat sa Kasulatan

Juan 10:33-36

SUMARYO: Ayaw lang basta basaha ang teksto ug dayon mohisgot sa sunod nga punto. Seguroa nga tin-aw sa imong mamiminaw ang koneksiyon sa teksto nga imong gibasa ug sa punto nga gusto nimong ipasiugda.

KON UNSAON PAGHIMO:

Ipasiugda ang importanteng mga pulong. Human mabasa ang teksto, ipasiugda ang mga pulong nga direktang nagtumong sa imong pangunang punto. Mahimo nimo kini pinaagi sa pagsublisubli sa maong mga pulong o sa pagsuknag pangutana nga makatabang sa imong mamiminaw nga mahibaloan ang importanteng mga pulong.

Kon mogamit kag lahi nga mga pulong aron hisgotan pag-usab ang ideya sa teksto, seguroa nga makita gihapon sa imong mamiminaw ang koneksiyon sa mga pulong nga gigamit sa teksto ug sa imong pangunang punto.
Ipasiugda ang punto. Kon isulti nimo ang klarong rason kon nganong basahon nimo ang teksto, ipatin-aw kon sa unsang paagi gisuportahan sa importanteng mga pulong sa teksto ang maong rason.

Samtang hisgotan nimo ang teksto, ayaw itiklop ang imong Bibliya. Pinaagi niini, makita sa imong mamiminaw nga ang imong gisulti konektado sa teksto nga gibasa.
Himoang simple ang pagpadapat sa teksto. Ayaw komentohi ang dili importanteng mga detalye nga walay kalabotan sa pangunang punto. Base sa nahibaloan na sa imong mamiminaw bahin sa topiko, pilia lang ang mga impormasyon nga makatabang sa mamiminaw nga klarong masabtan ang punto.