Ang Tanan Gustong Makabaton ug Maayong Panglawas!
KAPIN sa 2,700 ka tuig kanhi, usa ka manalagna nag-ingon nga moabot unya ang panahon sa dihang ang sakit mawala na. Kining tagnaa natipigan hangtod sa atong panahon ug kini makita diha sa karaang mga sinulat ni Isaias. Siya misulat bahin sa usa ka panahon sa dihang ‘wala na unyay pumoluyo nga moingon: “Ako masakiton,”’ ug siya midugang: “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya.” (Isaias 33:24; 35:5, 6) Kining maong palaaboton gihisgotan diha sa ubang mga tagna sa Bibliya. Pananglitan, ang kataposang basahon sa Bibliya, ang Pinadayag, naghubit sa panahon sa dihang wad-on na sa Diyos ang kasakit.—Pinadayag 21:4.
Matuman kaha kining mga saara? Moabot kaha ang panahon sa dihang ang mga tawo aduna nay maayong panglawas ug ang sakit mawala na? Tinuod, daghang tawo karon mas maayo ug panglawas kon itandi sa miaging mga kaliwatan. Apan kon ang tawo mas maayog panglawas, kini wala magpasabot nga siya ekselente nag panglawas. Ang sakit nagpahinabo gihapon ug dakong pag-antos. Ang kahadlok lang nga magsakit makahatag na ug dakong kabalaka. Ug ang mapait nga kamatuoran mao nga bisan niining modernong panahon, wala gayoy makalingkawas gikan sa pisikal ug mental nga mga sakit.
Ang Imong Sagubangon
Dunay daghang problema nga motungha tungod sa sakit. Usa sa gikabalak-an pag-ayo karon mao ang dako kaayong galastohan sa dihang dunay magsakit. Pananglitan, sa usa ka tuig dili pa dugay, 500 milyones ka adlawng tingtrabaho ang nausik sa Uropa tungod sa mga problema sa panglawas. Ingon usab niana ang kahimtang sa ubang mga dapit. Gamay ra ang matapos nga trabaho ug nagkadako ang gastos sa pagpatambal, busa kini nakahatag ug pinansiyal nga problema nga nakaapektar sa tanan. Ang mga korporasyon sa negosyo ug mga gobyerno naalkanse. Aron mabawi ang alkanse, ilang pamahalan ang presyo sa ilang mga produkto ug patas-an sa mga gobyerno ang buhis. Kinsay mobayad? Sa ngadtongadto, ikaw nga pumapalit!
Ikasubo nga ang mga pobre kasagarang maglisod sa pagpatambal sa doktor, kon may doktor man ugaling. Diha sa kabos nga kanasoran, mao kanay mapait nga kahimtang sa minilyon nga maglisod sa pagpatambal sa doktor o kaha dili gayod makapadoktor. Bisan diha sa adunahang mga nasod, ang uban kinahanglang manlimbasog aron makapahiling sa maayong mga doktor. Mao kini ang kasagarang kahimtang sa kadaghanan sa 46 milyones ka tawo sa Tinipong Bansa nga walay insyurans sa pagpatambal.
Dili lang pinansiyal nga problema ang idulot sa sakit. Ang kinagrabehang sagubangon nato mao ang kaguol sa pag-antos ug makamatayng sakit, ang hilabihang kasakit sa pag-agwanta ug sugmatsugmat nga sakit, ang kasubo nga makita ang uban nga may grabeng sakit, ug ang kawalay paglaom nga bation sa dihang mamatyan ug minahal.
Ang paglaom nga magkinabuhi sa umaabot diha sa usa ka kalibotan nga wala nay sakit nindot kaayong hunahunaon. Ang tanan gustong makabaton ug maayong panglawas! Bisan ug daw dili katuohan ang maong paglaom, daghan ang nagtuo nga kini tinuod gayod. Dunay pipila nga nagtuo nga pinaagi sa teknolohiya sa tawo, sa ngadtongadto, halos tanang sakit ug balatian mawala ra. Sa laing bahin, kadtong nagtuo sa Bibliya kombinsido nga ang karaang mga tagna bahin sa usa ka kalibotan nga wala nay sakit ipahinabo unya sa Diyos. Ang tawo ba kahay makawagtang sa sakit? O ang Diyos ba? Unsay anaa sa umaabot?