Nakapatungha bag Kalinaw ang Relihiyon?

ANG Church of the Holy Sepulchre sa Jerusalem giisip sa pipila ingong labing balaan nga simbahan sa Kakristiyanohan, apan nahimo usab kining sentro sa relihiyosong panagbangi. Sumala sa tradisyon, ang nahimutangan sa maong simbahan “mao kono ang dapit diin si Kristo gilubong ug gibanhaw.” Apan, niining dapit nga giisip nilang balaan nahitabo usab ang daghang mapintas nga panagbangi. Ang mga monghe ug pari sa unom ka Kristiyanong mga denominasyon magpunayg away maylabot sa katungod sa paggamit sa simbahan. Kini misamot sa di pa dugayng katuigan. Gani, dunay mga higayon nga ang mga polis nga may dalang riple kinahanglang mangilabot aron temporaryong kontrolahon ang simbahan.

Taas nga Kasaysayan sa Kapintasan

Ang mga panghitabo sa Church of the Holy Sepulchre maoy bahin sa taas nga kasaysayan sa pag-ulag dugo ug pagpinatyanay tungod sa relihiyon. Sa pagsusi sa di pa dugayng mga panagbangi sa lainlaing nasod, ang librong Violence in God’s Name nag-ingon: “Gikan sa Indonesia ngadto sa Northern Ireland, Middle East ngadto sa Kashmir, India ngadto sa Nigeria, sa mga nasod sa Balkan ngadto sa Sri Lanka, ang mga Kristiyano, Budhista, Hudiyo, Hindu, Muslim ug mga Sikh nagpakamatarong sa ilang paggamit ug kapintasan sa pagpanalipod sa ilang relihiyon ug intereses.”

Apan sa kadaghanang relihiyon, ang kalinaw ug panaghiusa maoy pangunang doktrina. Latas sa kasiglohan, ang mga prinsipyo sama sa paghigugma sa silingan ug pagkasagrado sa kinabuhi sa tawo masibotong gipasiugda sa relihiyon. Nan, dili ba angay nga manguna usab ang relihiyon sa pagpatunghag kalinaw? Maayong susihon sa sinserong mga magsisimba kining pangutanaha.