Ang Abilidad sa Lawas sa Pag-ayog Samad

USA sa daghang mekanismo nga nagpaposible sa kinabuhi mao ang abilidad sa lawas sa pag-ayog samad ug sa paghimog bag-ong mga tissue. Ang proseso magsugod dayon dihang masamad.

Hunahunaa: Ang proseso sa pag-ayo sa samad magsugod pinaagi sa sunodsunod ug komplikadong pag-obra sa mga selula:

• Ang mga platelet manapot sa mga tissue libot sa samad, nga magpaapol sa dugo ug busa masungsongan ang nangaputol nga kaugatan.

• Ang paghubag sa samad proteksiyon batok sa impeksiyon ug magkuha sa “mga hugaw” sa samad.

• Sa pipila lang ka adlaw, ang lawas magsugod pag-ilis sa nadaot nga mga tissue, pagpikot sa samad, ug pagsumpay sa nangaputol nga kaugatan.

• Sa kataposan, ayohon ug palig-onon sa kugan ang parte nga nadaot.

Tungod sa katakos sa dugo sa pag-apol, ang mga tigdukiduki nakaimbentog plastik nga “moayo” sa kaugalingon kon kini madaot. Kini nga materyal nga moayo sa kaugalingon dunay nagtapad nga gigming nga mga tubotubo nga “modugo” kon may madaot. Sa masagol ang duha ka kemikal, kini mahimong gel nga mokatap paingon sa nadaot nga bahin, busa matakpan ang mga likiliki ug mga lungag. Sa magkabagtok ang gel, kini mahimong gahing substansiya nga magpasig-uli sa orihinal nga kalig-on sa materyal. Ang usa sa tigdukiduki miingon nga kining artipisyal nga proseso sa pag-ayo nga padayon pang gieksperimentohan “susama” sa makita diha sa kinaiyahan.

Unsay imong hunahuna? Ang abilidad ba sa lawas sa pag-ayog samad mitungha pinaagig ebolusyon? O kini ba gidisenyo?