Nakat-onan Nako Kon Unsa ka Bililhon ang Kinabuhi
BUNTAG KADTO SA ABRIL 16, 2007. Mikober ko sa suok sa usa ka opisina sa ikatulong andana sa Norris Hall sa Virginia Polytechnic Institute and State University, o Virginia Tech. Nianang higayona napahinumdoman na sab ko nga angay gayod natong pasalamatan ang matag bililhong adlaw sa atong kinabuhi.
Anaa ko sa akong opisina ug moadtoay na sa ikaduhang andana aron kuhaon ang akong sulat. Apan, gihangyo ko sa usa ka propesor sa pag-adto sa iyang opisina aron ayohon ang iyang kompiyuter. Pagsulod namo sa iyang opisina, nakadungog mig mga buto sa pusil sa ikaduhang andana. Kay wala man mi mahibalo kon unsay nagakahitabo, midalidali mig tago. Among gisirad-an ang pultahan nga gikulbaan pag-ayo samtang naniid kon unsay sunod mahitabo. Mitago ko sa usa ka suok ug miampo kang Jehova nga unta iya kong tabangan kon magkinaunsa man ugaling.
Samtang nagtago mi ug naniid kon unsay mahitabo, nakahinumdom ko sa nahitabo kanako 15 ka tuig na ang milabay. Mekaniko ko sa usa ka talyer. Usa ka adlaw niana, misilaob ang gasolina diha sa sudlanan nga gigunitan sa akong kauban. Tungod kay natarantar, iya kanang nasablig sa akong nawong! Nahanggab nako ang kalayo ug grabe gayod ang pagkapaso sa ibabaw nga bahin sa akong lawas. Gisakay kog helikopter paingon sa usa ka ospital ug kritikal ang akong kahimtang mao nga tulo ko ka bulan ug tunga sa ICU. Human sa lima ka bulan nga pagtambal ug pag-atiman, nakagawas ko sa ospital ug sa balay na ko nagpaayo. Nagpasalamat ko nga ako buhi gihapon. Tungod niining panghitaboa, nakat-onan nako kon unsa ka bililhon ang matag adlaw sa atong kinabuhi. Natukmod usab ako sa paggugol sa akong kinabuhi sa pag-alagad sa usa nga naghatag niana kanako, si Jehova nga Diyos, ingong usa sa iyang mga Saksi.—Salmo 90:12; Isaias 43:10.
Kay dili na man ko makahimo sa pagmekaniko, nagtuon kog kompiyuter ug nakatrabaho ko sa Virginia Tech. Kini ang hinungdan kon nganong atua ko sa Norris Hall nianang buntaga.
Samtang nagpadayon ang butobuto, wala gyod miy kalibotan nga nagakahitabo diay sa silong ang kinangilngigang pagpamusil sa kasaysayan sa Amerika. Human patya ang 32 ka tawo, gipusil sa kriminal ang iyang kaugalingon. Mga 20 minutos human magsugod kining panghitaboa, nadunggan namo ang mga polis sa pasilyo. Nangayo mig tabang ug ila ming gidala sa luwas nga dapit.
Kining makalilisang nga kasinatian nagtudlo kanako nga dili gayod nato matag-an ang mahitabo sa atong kinabuhi. (Santiago 4:14) Hinungdanon gayod nga mosalig kita sa Maghahatag sa kinabuhi, si Jehova nga Diyos, ug isipon nato ang matag adlaw ingong bililhong regalo gikan kaniya!—Salmo 23:4; 91:2.
[Picture Credit Line sa panid 30]
AP Photo/The Roanoke Times, Alan Kim