Gamita ang Imong “Espirituwal nga Gasa”

Malipay ug madasig gyod ta kon kauban nato ang mga igsoon. Pero aron mahimong mas makapadasig ang atong panag-ubanay, naa tay kinahanglang buhaton. Ang Bibliya nag-ingon nga kinahanglang palig-onon nato ang pagtuo sa atong mga igsoon pinaagi sa atong “espirituwal nga gasa.” (Roma 1:​11, 12) Unsaon nato na paghimo?

Dasiga sila pinaagi sa imong maayong mga pulong. Pananglitan, diha sa mga tigom, paghatag ug mga komento nga nagpokus kang Jehova, sa iyang Pulong, ug sa iyang katawhan, imbes sa imong kaugalingon. Dihang makig-estorya ka sa mga igsoon, paghisgot ug makapadasig nga mga topiko.

Dasiga sila pinaagi sa imong mga buhat. Pananglitan, ang uban midesisyon nga magpadayon sa bug-os panahong pag-alagad bisag nag-atubang ug lisod nga mga situwasyon. Ang uban pod naningkamot nga motambong gyod sa midweek nga tigom bisan pag busy sila sa trabaho o naay problema sa panglawas.

Imo bang ginahatagan ug espirituwal nga gasa ang mga igsoon—sa ato pa, imo ba silang ginadasig pinaagi sa pulong ug buhat? Ug abtik pod ba kang makamatikod ug modawat ug mga pagdasig gikan sa uban?