Mga Pangutana Gikan sa mga Magbabasa
Unsang “hunahuna” ang hapit nang ibutang ni Jehova sa kasingkasing sa mga nasod?
Bahin sa pagsugod sa dakong kasakitan, ang Pinadayag 17:16, 17 nag-ingon: “Ang 10 ka sungay nga imong nakita ug ang pintas nga mananap, kini sila magdumot sa pampam ug maglaglag ug maghubo kaniya, ug ilang kaonon ang iyang unod ug ugdawon siya sa kalayo. Kay gibutang kini sa Diyos sa ilang kasingkasing aron buhaton ang iyang hunahuna, oo, aron buhaton ang ilang usa ra ka hunahuna pinaagi sa paghatag sa ilang gingharian ngadto sa pintas nga mananap.” Kaniadto, ang atong mga publikasyon nag-ingon nga ang “hunahuna” nga ibutang ni Jehova sa kasingkasing sa mga nasod mao ang paglaglag sa bakak nga relihiyon.
Pero kinahanglan natong usbon ang atong pagsabot. Ang “hunahuna” nga ibutang ni Jehova sa kasingkasing sa mga nasod mao ang ilang paghatag “sa ilang gingharian ngadto sa pintas nga mananap.” Aron masabtan kon sa unsang paagi ni matuman, konsideraha ang mosunod nga mga pangutana.
Kinsay mga gihisgotan niini nga tagna? Ang “pampam,” nga gitawag pod ug “Bantogang Babilonya,” nagtumong sa tibuok kalibotang imperyo sa bakak nga relihiyon. Ang “hayag-pula nga pintas nga mananap” nagtumong sa organisasyon nga nagsugod niadtong 1919 ingong League of Nations, ug gitawag na karon ug United Nations. (Pin. 17:3-5) Ang “10 ka sungay” nagtumong sa tanang gobyerno nga nagsuportar sa pintas nga mananap.
Unsay koneksiyon sa pampam ug sa hayag-pula nga pintas nga mananap? Ang pampam “nagsakay” sa pintas nga mananap. Nagpasabot ni nga iyang gisuportahan ug giimpluwensiyahan ang mananap. Iya pa gani ning gikontrol aron himoon niini kon unsay iyang gusto.
Unsay mahitabo sa pampam? Ang pintas nga mananap ug ang 10 ka sungay nga nagsuportar niini “magdumot sa pampam.” Tungod sa ilang kalagot, ilang hutdon ang tanan niyang kabtangan ug ipadayag ngadto sa tanan kon unsa siya ka daotan. Dayon ilang ipahamtang ang paghukom ni Jehova sa pampam, sa ato pa, ila siyang laglagon. (Pin. 17:1; 18:8) Oo, bug-os nang malaglag ang tanang bakak nga relihiyon. Pero sa dili pa na mahitabo, palihokon ni Jehova ang mga nasod sa paghimog usa ka butang nga wala pa gyod mahitabo sukad sa pagmando sa tawo.
Unsay himoon sa mga nasod? Ilang himoon ang “hunahuna” ni Jehova nga iyang gibutang diha sa ilang kasingkasing—‘ihatag nila ang ilang gahom ug awtoridad ngadto sa [hayag-pula nga] pintas nga mananap,’ ang United Nations. (Pin. 17:13) Hunahunaa ni: Kaugalingon kahang ideya sa mga gobyerno nga ihatag ang ilang gahom ug awtoridad ngadto sa pintas nga mananap? Dili. Gipakita sa tagna nga ang Diyos mismo ang magpalihok nila sa paghimo niana. (Prov. 21:1; itandi ang Isaias 44:28.) Anam-anam ba nilang ihatag ang ilang gahom? Dili. Kalit ning mahitabo. Human ana, ang pintas nga mananap, nga nahimo nang gamhanan, magpahamtang sa paghukom ni Jehova pinaagi sa paglaglag sa tanang bakak nga relihiyon.
Busa unsay atong madahom? Dili ta kinahanglang mag-atang ug mga balita nga anam-anam nang nagkadaghan ang mga gobyerno nga nagsuportar sa United Nations. Hinuon, kini ang atong madahom: Kalit nga ibutang ni Jehova sa kasingkasing sa mga nasod ang paghatag sa ilang gahom ug awtoridad ngadto sa pintas nga mananap. Dihang mahitabo na kana, kabalo ta nga hapit nang magsugod ang dakong kasakitan. Maong “pabilin kitang magmata ug huptan ang maayong panghunahuna” kay naay kalit nga mga kausaban nga hapit nang mahitabo!—1 Tes. 5:6.