Padayon Silang Nag-alagad Kang Jehova Bisan sa mga Pagsupak

Ang atong mga igsoon wala magpadala sa kahadlok, ug padayon gihapon silang naghimog panagkatigom. Ang mga ansiyano mihimog pamaagi aron maprotektahan ang mga igsoon. Si Brader André Carbonneau, Canadian nga abogado nga midepensa sa atong mga igsoon kaniadto, miingon: “Dunay brader nga magbantay duol sa Kingdom Hall, nga magdalag cellphone. Kon makakita siyag mga tawo nga mosulongay sa Kingdom Hall, tawagan dayon niya ang mga ansiyano.”

Kon dunay mahitabong pag-atake, ang sangang buhatan magpadalag duha ka representante aron palig-onon ang mga igsoon. “Dili makatuo ang mga representante kay pag-abot nila sa Kingdom Hall, puno nig mga igsoon nga malipayon gihapon,” miingon si André.

Bisan kadtong wala direktang mabiktima sa pagpangatake, lakip ang mga Bible study, nagpakita sab ug lig-ong baroganan. Si André nahinumdom nga duna siyay nakaestorya nga babaye nga hapit nang mahimong dili bawtismadong magmamantala. Giingnan siya sa babaye, “Pagkakita nako sa TV nga gilutos ang mga Saksi, nakaingon ko nga lahi ra gyod ang tinuod ug ang bakak nga mga Kristohanon, ug gusto kong mahimong tinuod nga Kristohanon.”

Maisogong Gidepensahan ang mga Igsoon

Niadtong malisod nga mga tuig, ang mga igsoon nagpakitag talagsaong pagtuo ug kaisog. Padayon silang nagmakugihon sa buluhatong pagsangyaw. Kadtong miatubang sa korte aron depensahan ang atong mga igsoon nagpakita sab ug susamang kaisog.

Gibutangbutangan sa media ang mga Saksi. Ang mga balita nag-ingon nga ang mga Saksi maoy hinungdan sa pagkabungkag sa mga pamilya, dili modawat ug medikal nga pagtambal, ug mga supakero sa gobyerno. Kadtong midepensa sa atong mga igsoon atubangan sa korte andam mosakripisyo sa ilang reputasyon ingong abogado.

Si John Burns, abogado sa sangang buhatan sa Canada nga mitabang sa mga igsoon sa Georgia, nahinumdom: “Ang abogado nga mga igsoon didto mitabang dayon. Bisag posibleng madaot ang ilang propesyon, wala sila mahadlok nga moatubang sa korte ug magpaila ingong Saksi ni Jehova.” Sila nakatabang gayod nga ang maayong balita ‘madepensahan ug matukod sa legal nga paagi.’​—Filip. 1:7.

Gilabanan sa mga Georgian ang Katungod sa mga Saksi

Nagpadayon ang pagsupak ug pag-atake sa atong mga igsoon. Busa niadtong Enero 8, 2001, ang mga Saksi nag-apod-apod ug petisyon aron mahatagag proteksiyon ang mga igsoon ug masilotan kadtong mga naglapas sa ilang katungod.

Bahin sa katuyoan sa petisyon, si Brader Burns miingon: “Gusto namong ipakita nga ang kadaghanan sa mga Georgian wala mouyon sa maong pagpangatake batok sa mga Saksi ni Jehova ug ang gamayng grupo sa relihiyosong mga ekstremista mao ang responsable niadto.”

Sulod lang sa duha ka semana, dunay 133,375 ka tawo gikan sa tanang rehiyon sa Georgia​—kadaghanan mga membro sa Orthodox—​ang mipirma sa petisyon. Bisag ang maong petisyon gipresentar ngadto sa presidente nga si Shevardnadze, wala gihapon maundang ang pagpangatake sa relihiyosong mga ekstremista.

Pero padayon gihapong gipanalanginan ni Jehova ang iyang mga alagad. Bisag ginaatake kanunay sa mga ekstremista ang mga alagad sa Diyos, ginatabangan sab ni Jehova ang mga interesado aron makagula sa bakak nga relihiyon.

Nakagawas Gikan sa Bakak nga Relihiyon

Halos sa tibuok niyang kinabuhi, si Babilina Kharatishvili debotado kaayo nga membro sa Georgian Orthodox Church. Niadtong mga 30 anyos pa siya, moadto siya sa lainlaing lungsod ug barangay aron tudloan ang mga tawo bahin sa mga santos.

Pero gusto ni Babilina nga mas mailhan pa ang Diyos, maong naminaw siyag mga wali sa seminaryo sa Georgian Orthodox. Usa ka higayon, gipakita sa usa ka pari ang librong Kahibalo nga Motultol sa Kinabuhing Walay Kataposan ug gidasig ang mga nanambong nga mangayog kopya niini sa mga Saksi ni Jehova. Giingnan sila sa pari, “Kining libroha daghag ikatudlo bahin sa Bibliya.”

Nakurat si Babilina. Ginalikayan niya ang mga Saksi. Pero karon, ang pari nay nagdasig nga mokuhag libro sa mga Saksi! Nakahunahuna siya, ‘Kon sa mga Saksi ni Jehova ko makakat-on bahin sa Diyos, nag-unsa pa man ko dinhi?’ Nakigkontak dayon siyag mga Saksi sa siyudad sa Poti ug nagpa-Bible study.

Nagkadaghan ang nakat-onan ni Babilina bahin sa Bibliya, ug mihimo siyag dakong kausaban sa iyang kinabuhi. Siya miingon: “Dihang nabasa nako sa Bibliya nga sayop diay ang pagsimbag mga imahen, gilikayan na nako ang tanang matang sa idolatriya. Wa gyod ko magduhaduha adto nga desisyon.” Sa hapit na siyang mag-80 anyos, midesisyon siya nga mahimong usa sa mga Saksi ni Jehova.

Ikasubo kay niadtong 2001, nasakit si Babilina ug namatay nga wala pa mabawtismohi. Pero wala madugay, ang iyang apo nga si Izabela nagpabawtismo ug karon matinumanong nag-alagad kang Jehova.

Gusto Niyang Magmadre

Sa edad nga 28, si Eliso Dzidzishvili nakadesisyon nga magmadre. Kay wala may kombento sa iyang lungsod sa Tkibuli, mibalhin siya sa Tbilisi niadtong 2001. Samtang nangitag kasudlan nga kombento, nagtrabaho siya ingong partaym nga maestra. Duna siyay estudyanteng babaye nga anak sa usa ka Saksi nga si Nunu.

Si Eliso miingon: “Kanunay ming maghisgot bahin sa Bibliya. Maisogon nakong gidepensahan ang Orthodox nga relihiyon, pero mapailobon kong gibasahan ni Nunu ug mga teksto. Usa ka adlaw, iya kong gibasahan ug brosyur nga Unsay Gikinahanglan sa Diyos Kanato? Samtang gitun-an namo ang mga parapo ug gibasa ang mga teksto sa Bibliya, nakat-onan nako nga ang pagsimbag imahen supak gayod sa sugo sa Diyos.”

Wala madugay, miadto si Eliso sa lokal nga simbahan. Daghan siyag gipangutana sa pari. Nakita niya sa mga tubag sa pari nga ang pagtulon-an sa simbahan wala gibase sa Bibliya. (Mar. 7:7, 8) Kay kombinsido siya nga ang mga Saksi nagtudlog kamatuoran, nagpa-Bible study dayon siya ug nagpabawtismo sa ulahi.

Pagpanukod ug Kingdom Hall Bisan sa mga Pagsupak

Niadtong 2001, nagkadaghan ang mga kongregasyon maong gikinahanglan ang dugang tigomanan. Gibanabana nga mga 70 ka Kingdom Hall ang gikinahanglan. Busa, gihimo ang programa sa pagpanukod ug Kingdom Hall sa maong nasod bisan sa mga pagsupak.​—Esd. 3:3.

Giremodel sa mga construction volunteer ang bilding nga gigamit kanhi sa mga kongregasyon sa Tbilisi. Dayon, duha ka Kingdom Hall ang gitukod​—sa Tbilisi ug sa Chiatura, sa western Georgia.

Si Brader Tamazi Khutsishvili, nga nagboluntaryo sa proyekto sa Chiatura, nahinumdom: “Kinse mi ka buok nga nagtrabaho sa sayt kada adlaw. Nasayran sa mga tawo sa lungsod nga magtukod mig bag-ong Kingdom Hall. Usahay, makadungog mig mga estorya nga gustong gub-on sa mga magsusupak ang Kingdom Hall.”

Bisan sa mga pagsupak, nganong milampos ang proyekto sa pagpanukod? Si Tamazi miingon: “Gipadayon namo ang proyekto ug nahuman namo ang Kingdom Hall sulod sa tulo ka bulan. Bisag daghan ang mihulga, wa man poy miadto sa sayt aron samokon mi.”a

Ang Dugay Nang Gipaabot nga Tabang

Niadtong Oktubre 2003, gisugdan ang proyekto sa pagtukod ug Kingdom Hall sa Samtredia. Gihulga na sab ang atong mga igsoon sa relihiyosong mga ekstremista. Gani, miadto sila sa sayt ug gibungkag ang bungbong nga bag-o pa lang nahuman ug basa pa ang minasa.

Pero pagka-Nobyembre 2003, dunay kausaban sa nasod sa Georgia nga nakatabang sa atong mga igsoon. Kay lahi nay milingkod sa gobyerno, giila na ang katungod sa mga relihiyon. Ingong resulta, giaresto ang daghang membro sa ekstremistang grupo sa Orthodox nga miatake sa mga Saksi ni Jehova.

Daghang Panalangin sa Katawhan sa Diyos

Wala madugay human maundang ang pagsupak, ang mga alagad ni Jehova sa Georgia nakadawat ug daghang panalangin. Sa 2004 nga distritong kombensiyon, gi-release ang New World Translation of the Christian Greek Scriptures sa pinulongang Georgian.

Dayon sa 2006, dunay dili malimtang panghitabo panahon sa “Ang Kaluwasan Haduol Na!” Distritong Kombensiyon. Eksayted kaayo ang tanang delegado kay si Brader Geoffrey Jackson, membro sa Nagamandong Lawas, ang mohatag ug pakigpulong. Puwerte nilang lipaya dihang gi-release ni Brader Jackson ang kompletong New World Translation of the Holy Scriptures sa pinulongang Georgian!

Nanglugmaw ang luha sa mga delegado tungod sa ilang kalipay ug pagpasalamat. Usa ka sister ang miingon: “Puwerte gyod nakong lipaya pagkadawat namo sa kompletong Bibliya. . . . Di gyod to namo malimtan nga okasyon.” Kapin sa 17,000 ang mitambong sa maong kombensiyon. Usa gyod to ka dili malimtang panghitabo sa kasaysayan sa mga Saksi ni Jehova sa Georgia.