Me ren Jon

2 Iwe, lón ewe aúlúngátin rán a fis eú kametipen apwúpwúlú lón Kana lón Kalili, nge inen Jises we a nóm ikena. 2 Jises me néún kewe chón káé ra pwal ketiw ngeni ewe kametipen apwúpwúlú.

3 Lupwen epwele pé ewe wain, inen Jises we a ereni: “Ese chúen wor únúmer wain.” 4 Nge Jises a ereni: “Fefin, met pwal weween ngenikich?* Esaamwo tori ái fansoun.”* 5 Inan we a ereni ekkewe chón angang: “Oupwe chék féri met a erenikemi.” 6 Iwe, a wor wonu leenien konik seni faw mi nóm ikena pún a lamot ngeni án ekkewe chón Jus allúkún elimelim, masouen eú me eú ina epwe 12 ngeni 17 kalon.* 7 Jises a ereniir: “Oupwe alélééi ekkewe leenien konik.” Iwe ra aléléér tori mesen awer. 8 Iwe a ereniir: “Oupwe úfawu och me ngeni ewe chón nemeni ei kametip.” Iwe ra waló. 9 Lupwen ewe chón nemeni ewe kametip a neni ewe konik mi wililó ngeni wain, nge ese silei ia a feito me ie (nge ekkewe chón angang mi úfawu ewe konik ra silei), ewe chón nemeni ewe kametip a kékkéri ewe mwán mi apwúpwúlú 10 me a ereni: “Aramas meinisin ra akkomw uwawu ewe wain mi múrinné, nge atun ekkewe waséla ra sakawoló ra ngeniir ewe wain ese kon éch. Ka túmúnúéchú ewe wain mi múrinné tori iei pwe kopwe ngeni ekkewe waséla.” 11 Jises a féri ei lón Kana lón Kalili, iei poputáán an kewe esissil, me a pwáraaló an ling, me néún kewe chón káé ra lúkú lón i.

12 Mwirin ei, i me inan we me pwiin kewe me néún kewe chón káé ra feitiw ngeni Kaperniom, nge fitu chék rán ra nóm ikena.

13 Iei án ekkewe chón Jus we Pasofer a arapoto, me Jises a feitá ngeni Jerusalem. 14 A kúna me lón ewe imwenfel chókkewe mi amémé kou me siip me lisom, me ekkewe chón ekkesiwil moni wóón ar kewe leenien móót. 15 Iwe, mwirin an piti efóch sáál, a áchcheewu meinisin chókkana fitifengen me néúr kewe siip me kou seni me lón ewe imwenfel me a ninatiw ekkewe féún senis néún ekkewe chón ekkesiwil me nupeni ar kewe cheepel. 16 Iwe, a ereni ekkewe chón amémé lisom: “Oupwe uwealó ekkeei mettóch seni ikeei ie! Oupwe úkútiw le eáni eú imwen amémé* imwen Semei ei!” 17 Néún kewe chón káé ra chemeni pwe a makketiw: “Ái tongei* imwom epwe ussun eú ekkei mi ngetenget me lón letipei.”

18 Iei minne, ekkewe chón Jus ra ereni: “Ifa ewe esissil ka tongeni pwáár ngenikem ren óm ei féri ekkeei mettóch?” 19 Jises a pélúweniir: “Oupwe ataietiw ei imwenfel, nge lón úlúngát rán úpwe aúetáái.” 20 Ekkewe chón Jus ra apasa: “Ei imwenfel a kaútá lón 46 ier, nge en kopwe aúetáái lón úlúngát rán?” 21 Nge an fósun ewe imwenfel, a fósun inisin. 22 Iei minne, lupwen a manawetá seni máló, néún kewe chón káé ra chemeni pwe a kan akkapasa ena. Iwe ra lúkú ewe taropwe mi pin me met Jises a apasa.

23 Nge atun a nóm Jerusalem lón ránin chulapen ewe Pasofer, chómmóng aramas ra lúkú lón i* atun ra kúna ekkewe esissil a féri. 24 Nge pokiten Jises a weweiti napanapen aramas, iwe ese unusen lúkúlúk wóór, 25 me pokiten a silei minne mi nóm lón aramas, ese pwal lamot ngeni án emén epwe ereni ussun aramas.