Introduction

IEI eú puken ekkewe pwóróus mi enlet. Ra pop seni ewe Paipel, ewe puk mi aúchea seni meinisin wóón fénúfan. Ekkewe pwóróus ra áiti ngonuk uruwoon fénúfan seni atun án Kot poputá le féri mettóch, feffeito tori lón ei fansoun. Ra pwal pwóróus usun met Kot a pwonei an epwe féri lón mwachkkan.

Ei puk a áiti ngonuk masouen ewe Paipel. A kapas usun ekkewe aramas lón Paipel me ekkewe mettóch ra féri. A pwal pwáraatá ewe ápilúkúlúk mi lapalap Kot a ngeni aramas, ewe ápilúkúlúkún ar repwe kúna manaw esemuch lón eú paratisin fénúfan.

Mei wor 116 pwóróus lón ei puk. Ra imuló lón walu kinikin. Eché pekin taropwe a akkomw mwen iteiten ekkewe kinikinin meinisin a apwóróusa usun masouen ewe kinikin. Ekkewe pwóróus ra tetteliló me ren tetteliir lón uruwo. Ei napanap epwe álisuk le káé ineet atun ekkewe pwóróus ra fis lón uruwo me ifa usun ar ra ririfengen.

Ekkewe pwóróus ra mak lón kapas mi mecheres. Chómmóng lein ámi kana kúkkún, oupwe tongeni pwisin álleaniir. Ámi kana sam me in, oupwe kúna pwe néúmi kewe mi wesewesen kúkkún repwe fókkun pwapwa ren án emén epwe állea ngeniir fán fite ekkeei pwóróus. Ámi oupwe kúna pwe masouen ei puk epwe amwarar ngeni ekkewe kúkkún me ekkewe watte.

Ekkewe wokisin seni Paipel ra kan mak lesópwólóón iteiten ekkewe pwóróus meinisin. Ám aua pesekemi pwe oupwe álleani ekkeei kinikinin Paipel, ikewe ra kan popu seni ie ekkewe pwóróus. Ika ka wes le álleani eú pwóróus kopwe sótun pélúweni ekkewe kapas eis fán iten ena pwóróus. Ekkewe kapas eis ra nóm mwirin ewe Pwóróus 116.