Fférútáán Ekkewe Mettóch Tori ewe Noter

Ié a féri ekkewe láng me ewe fénúfan? Ifa usun a fférútá ewe akkar, maram me ekkewe fúú, pwal pachelong ekkewe chómmóng mettóch wóón fénúfan? Ewe Paipel a awora pélúwan mi enlet atun a apasa pwe Kot a fériiretá. Ina popun, néúch ei puk a poputá ren ekkewe pwóróus seni Paipel usun fférútáán mettóch.

Sipwe káé pwe ekkewe mettóch Kot a akkomw fériir, iir chónláng usun chék I sise tongeni kúner. Nge ewe fénúfan a fférútá fán iten kich aramas. Ina minne, Kot a féri ekkewe mwán me ewe fefin, iter Atam me Efa, iwe a eleenier lón eú leeni mi lingéch. Nge ra álleasolapa Kot, iwe, a péút seniir ewe pwúngún ar repwe manaw fóchófóch.

Lón meinisin ekkewe pwóróus, poputá seni fférútáán Atam tori ewe Noter mi lap, a tori úkúkún 1,656 ier. Lón ei atun, a chómmóng mi ngaw ra manaw. Satan me néún kewe chónláng mi ngaw sise tongeni kúner ra nónnóm láng. Kain me chómmóng aramas mi ngaw, pachelong ekkóch mwán mi kkóló péchékkúler ra nóm wóón fénúfan. Nge a pwal wor aramas mi múrinné wóón fénúfan, Epel, Enok me Noa. Lón Kinikin EÚ, sipwe álleani pwóróusen meinisin ekkena aramas me minne a fis lón ewe atun.