Eché Taropwe Seni ewe Mwichen Soupwúngúpwúng

Ngonuk En mi Tongei Jiowa:

Iei alon Jesus: “Oupwe silei ewe let, nge ewe let epwe angasakemi.” (Johannes 8:32) A ifa me apéchékkúlen ekkena kapas! Ewer, a tufich án emén epwe silei ewe enlet, inaamwo ika lón ekkeei “ränin lesopolan” a chéúfetál chofona. (2 Timoty 3:1) Ka chemeni ewe atun ka kerán silei ewe enlet seni án Kot Kapas? A ifa me ámmeseiken ena atun!

Iwe nge, aúchean ach silei ena enlet me ach afalafala ngeni ekkewe ekkóch, a pwal ina usun aúchean ach sipwe etipeeúfengeni féfférúch ngeni ewe enlet. Ren ach sipwe féri ena, mi lamot sipwe onómu pwisin kich lón ewe tongen Kot. Met a kapachelong lón ena? A pélú ena kapas eis lón alon Jesus we lón ewe pwinin mwen an epwele máló. A ereni néún kewe aposel mi tuppwél: “Are oua aleasochisi ai kewe allük, oupwe nonom lon ai chen, usun ngang üa aleasochisi än Semei kewe allük o nonom lon an chen.”—Johannes 15:10.

Sia kúna pwe ren án Jesus álleasochisi án Seman kewe allúk, a efisi an epwe chék nóm lón ewe tongen Kot. Pwal ina usuch lón ei fansoun. Mi lamot sipwe apwénúetá ewe enlet iteiten rán pwe sipwe chék nóm lón ewe tongen Kot. Lón chék pwal ena pwinin, Jesus a erá: “Iei oua silei ekei mettoch, oupwe feiöch are oupwe apwönüretä.”—Johannes 13:17.

Aua fókkun áneán pwe ei puk epwe tongeni álisuk le akkapwénúetá ewe enlet lón manawom pwe kopwe nónnóm lón ewe tongen Kot me manaw tori feilfeiló chék.—Jutas 21.