Kapas Eis Seni Ekkewe Chon Allea

Met weween alon Paul lupwen a apasa: “Pun iteiten fansoun, lupwen ami oupwe mongo ei pret o unumi ei sepi”?

Lupwen Paul a kapas ussun poputaan Achechchemenien maloon Jises, a makkei: “Pun iteiten fansoun, lupwen ami oupwe mongo ei pret o unumi ei sepi, oupwe pwarata maloon ach Samol, tori fansoun an epwe feito.” (1 Korint 11:25, 26) Ekkoch ra meefi pwe weween ekkewe kapas “iteiten fansoun” a mak ikei ie, pwe sipwe fori ewe Achechchem iteitan, weween fan chommong. Iwe, ra fori lap seni fan eu iteiten ier. Ina weween alon Paul?

Arapakan 2,000 ier ra lo seni ewe fansoun Jises a poputaani ewe Achechchemenien an we malo. Ina popun, inaamwo ika ewe Achechchem a fis fan eu chok iteiten ier nge a fen fis fan chommong seni 33 C.E. Iwe nge, lon 1 Korint 11:25, 26, Paul ese kapas ussun, fan fitu, nge ifa ussun epwe fis ewe Achechchem. Lon kapasen Kris, Paul ese nounou ewe kapas pol·laʹkis, mi wewe ngeni “fan chommong.” Nge, a nounou ewe kapas ho·saʹkis, mi wewe ngeni “iteiten fansoun,” weween “lupwen,” “iteiten fansoun pwe.” Paul a apasa pwe: ‘Iteiten fansoun pwe oupwe fori, oupwe pwarata maloon ach Samol.’a

Iwe, fan fitu ewe Achechchemenien maloon Jises epwe fis? Epwe pwung an epwe fis fan eu chok lon eu ier. A wesewesen eu achechchem, pokiten aramas ra kan fori ekkewe achechchem fan eu chok iteiten ier. Pwal och, Jises a malo lon ewe ranin an chon Jus Pasofer, eu mettoch a fis fan eu chok iteiten ier. Ina popun Paul a eita ngeni Jises “Kraist ach we Pasofer,” pokiten an Jises malo ussun chok eu asor a suuki ewe alen manau fan iten Israel lon pekin ngun, ussun chok ewe aewin asorun Pasofer a amanaua noun Israel kewe mwanichi lon Isip me a suuki ewe aal pwe ewe muu epwe ngaselo seni fan an Isip nemenem. (1 Korint 5:7; Kalesia 6:​16) Ei riri ren an Chon Jus Pasofer a fis fan eu iteiten ier a pwal annetata pwe ewe Achechchemenien maloon Jises epwe fis fan eu chok iteiten ier.

Pwal och, Paul a riri ngeni maloon Jises me pwal eu fetelapen Jus a fis fan eu iteiten ier, ewe Ranin Achasefal. Lon Ipru 9:​25, 26, sia alleani: “Esap pwal iseta pwisin i [Jises] eu asor fan chommong, usun chok ewe samol-fel mi lapalap a tolong lon ewe leeni mi fel iteiten ier [atun ewe Ranin Achasefal] o walong cha, nge esap pwisin chaan. . . . Nge a chok iei usun, lon sopolon ewe fansoun a pwarata fan eu chok, pwe epwe omusalo tipis ren an iseta pwisin i asor.” Pokiten an Jises asor a fen siwili ewe asorun Ranin Achasefal a fis iteiten ier, ewe Achechchemenien an we malo a fis fan eu iteiten ier. Esor popun seni ewe Paipel pwe epwe fis lap seni ena.

A tipeeu ewe poraus seni ewe sou kaeo uruwo itan Laurence von Mosheim pwe ekkewe chon Kraist lon ewe oruuen senturi lon Asia Minor ra foffori ewe Achechchemenien maloon Jises “lon ewe engol me ruaanuun ranin ewe aewin an Jus maram [Nisan].” Ewe eoreni pwe epwe fis lap seni fan eu iteiten ier a chok poputa lon Kirisentom fitu ier mwirin.

[Footnotes]