“Aramas Repwe Afalafalafeili ewe Pworausen Manau Usun ewe Mwün Kot”
“Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.”—MATTU 24:14.
Met Weween ena Wokisin: Emön me lein ekkewe sou makken puken Kapas Allim, itan Luk, a erä pwe Jises a “saifeil lon ekewe telinimw me sopw o afalafala ewe Pworausen Manau usun Mwün Kot.” (Luk 8:1) Jises a pwisin apasa: “Upwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.” (Luk 4:43) A tiinaalo nöün kewe chon käeö pwe repwe afalafal lon ekkewe telinimw me sopw, iwe mwirin a allükü ngeniir: “Oupwe pwäriei . . . lon unusen fanüfan.”—Fofor 1:8; Luk 10:1.
Ekkewe Chon Kraist Loom Ra Afalafala ewe Kapas Allim: Nöün Jises kewe chon äppirü ra mwittir le apwönüetä met Jises a ereniir, pun “iteiten rän ra sopwela le afalafal lon ewe imwenfel pwal lon imwen aramas o aiti ngeni aramas ewe Pworausen Manau pwe Jesus ewe Kraist.” (Fofor 5:42) Ewe angangen afalafal ina wisen meinisin chon ewe mwichefel nge esap chök wisen fitemön mi kefilitä. Iei makkeien emön sou uruwo itan Neander: “Ewe äkkäemönün chon mak mi oput Chon Kraist itan Celsus a esiita pwe ekkewe chon angangen öünöünen siip, chon fför suus, chon angangen silin man, ekkewe rese sukul me ekkewe mi tekisosson lein aramas, iir chon akkafalafala ewe kapas allim.” Lon ewe puk usun uruwoon ekkewe Chon Kraist seni ewe fansoun ra kerän poputä (The Early Centuries of the Church), a erä pwe “itä wisen Chon Kraist ar repwe afalafala ewe Kapas Allim ekis meinisin ngeni aramas ese lifilifil. [Repwe afalafal] woon al, lein telinimw, me ikewe chommong aramas ra soun nom ie, me lon ekkewe imw. Inaamwo ika aramas repwe etiwer are rese etiwer. . . . [Repwe afalafal] tori unusen fönüfan.”
Iö kewe Ra Afalafala ewe Kapas Allim lon Ach Ei Fansoun? Iei alon emön nöüwisin lamalam, itan, David Watson: “Än lamalam tümününgaw lon wiser le afalafal me asukula aramas a eselipato än aramas tanechepwak lon än Kot angang.” Pwal emön nöüwisin lamalam a apasa lon nöün we puk itelapan, Why Are the Catholics Leaving? a makkeei usun mwökütükütün chon Pirostan, chon Adventist, pwal ekkewe ekkoch pwe “rese akkafalafal imw me imw.” Nge, iei alon usun Chon Pwäraatä Jiowa: “Iir ra kan akkafalafal imw me imw.”
Iei alon eü puk itelapan Cato Supreme Court Review, minen 2001 ngeni 2002: “Ach apasa ewe it Chon Pwäraatä Jiowa a efisi än chommong aramas mwittir ekieki pwe iir ekkewe chon afalafal mi chuchchuuri aramas lon imwer lon ekkewe fansoun rese fich. Me ren Chon Pwäraatä Jiowa, ar angangen föraalo chon käeö esap chök ren ar repwe äfeffeitääi ar lamalam, nge a lamot ar angang pwe epwe aunusaalo ar lükü.”