Án Kot We Mwú​—Epwe Met Lamotan Ngonuk?

Ese mwáál ka kúna lón ekkewe lesen mwen ei pwe Chón Pwáraatá Jiowa ra fókkun aúcheani án Kot we Mwú. Me eli ka fen ekieki usun pwóróusen ekkewe feiéch ena Mwú epwe atoto, me eli ka pwal ekieki ika mi tongeni wesewesen pwénútá minne Kot a pwonei.

Ka tipachem ika kosap mwittir lúkú mettóch meinisin ka rongorong. (Än Salomon Fos 14:15) Óm túmúnúéch ren minne kopwe lúkú, ka usun ekkewe chón Perea lóóm.a Lupwen ekkewe chón Perea ra kerán rongorong pwóróusen ewe kapas allim usun án Kot we Mwú, ra etiwa ewe pwóróus esap pokiten ra chék mochen an epwe pwúng. Nge, ra etittinafichi ekkewe Taropwe mi Pin pwe repwe “kütta” are minne ra rongorong “a wesewesen pwüng.” (Föför 17:11) Weween pwe ekkewe chón Perea ra cheki ika pwóróusen ewe kapas allim a tipeeú ngeni met ewe Paipel a apasa. Iwe, ló, ló, ló, ra lúkúlúk pwe ewe kapas allim a wesewesen lóngólóng wóón án Kot we Kapas.

Chón Pwáraatá Jiowa ra etiwok óm kopwe pwal féri ena. Ren ám kókkótun káéén Paipel ese kamé, ám aua etiwok le etittina ika minne Chón Pwáraatá Jiowa ra lúkú usun án Kot we Mwú a tipeeú ngeni met ewe Paipel a apasa.

Me lúkún óm káé usun án Kot we Mwú, ka pwal tongeni káé seni Paipel pélúwen ekkewe kapas eis sia kan eáni usun manawach, áwewe chék:

• Ia sia popu seni ie?

• Met popun sia manaw?

• Pwata Kot a mutatá riáfféú?

• Met a fis lupwen sia máló?

• Epwe taló ei fénúfan?

• Ifa usun epwe fis pwapwa lón famili?

Nge lap seni meinisin, óm káé ewe Paipel epwe álisuk le “arap ngeni Kot.” (James 4:8) Iwe, óm akkarap ngeni Kot, pwal ina lapólóón óm mirititi ekkewe feiéch án Kot we Mwú epwe tongeni atoto ngonuk, esap chék iei nge tori feilfeiló chék. Jesus pwisin a apasa lón an iótek ngeni Seman we: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”​—Johannes 17:3.