ÁN PAIPEL KEWE KAPAS EIS RA PÉLÚ

Pwata sipwe iótek pwe án Kot we Mwú epwe war?

Án Kot we Mwú ina eú nemenem me láng. Jesus a ereni néún kewe chón áppirú pwe repwe iótek pwe Mwúún Kot epwe war pwe pwúng me kinamwe epwe wor sefál wóón fénúfan. Ese wor mwúún aramas epwe tongeni unusen amóeló akkachofesá, pwúngúngaw are semmwen nge án Kot we Mwú a tongeni me epwe. Kot a filatá Néún we Jesus pwe epwe Kingen ena Mwú. Jiowa a pwal filatá eú kúmiin néún Jesus kewe chón áppirú ar repwe fiti Jesus le nemenem lón ena Mwú.​—Álleani Lukas 11:2; 22:28-30.

Ekiseló chék, Mwúún Kot epwele asopwaló meinisin chón ú ngeni án Kot we nemenem. Ina popun ewe iótek pwe án Kot we Mwú epwe war, ina eú tingor pwe án Kot nemenem epwe siwili meinisin mwúún aramas.​—Álleani Taniel 7:13, 14; Pwärätä 11:15, 18.

Pwata án Kot we Mwú epwe efeiéchú aramas?

Jesus i emén King mi múrinné pokiten i mi úméúméch. Pokiten i Néún Kot, a pwal wor an manaman le álisi meinisin mi sié ngeni Kot ren álillis.​—Álleani Kölfel 72:8, 12-14.

Án Kot we Mwú epwe efeiéchú meinisin mi enletin iótek pwe Mwúún Kot epwe war pwal etipeeúfengeni manawer ngeni letipen Kot. Sanne kopwe niamam óm kákkáé minne ewe Paipel a apasa usun án Kot we Mwú.​—Álleani Lukas 18:16, 17; Johannes 4:23.