Krismas fán Iten Chón Kraist?

Fite million aramas wóón unusen fénúfan ra lúkú pwe ewe eéreni usun Krismas, ina ránin apwapwaan uputiwen Jesus Kraist. Iwe nge, ka fen mwo ekieki ika ekkewe Chón Kraist lón fansoun ekkewe aposel, chókkewe mi kon arap ngeni Jesus, ra féri apwapwaan Krismas? Ka fen mwo ppii met ewe Paipel a apasa usun ránin uputiw? Ach kútta pélúwen ekkena kapas eis a tongeni affata ngenikich ika Krismas fán iten Chón Kraist.

Áeúin, ewe Paipel ese fósun apwapwaan ránin uputiwen Jesus are pwal emén chón fel ngeni Kot mi tuppwél. A chék mak lón Paipel pwóróusen rúúemén mi féri apwapwaan ránin uputiwer. Iir me rúúemén rese fel ngeni Jiowa, ewe Kot an kapas a nóm lón Paipel. Nge lón ránin apwapwaan uputiwer kana a fis minne mi ngaw. (Keneses 40:20; Markus 6:21) Ewe Encyclopædia Britannica a erá pwe ekkewe popun Chón Kraist rese fókkun féri “apwapwaan ekkewe ránin uputiw án ekkewe chón fel ngeni kot chofona.”

Ewe Paipel ese affata menni rán Jesus a uputiw lón. Ewe puk McClintock and Strong’s Cyclopedia a erá: “Ránin uputiwen Kraist ese pwá me lón ewe Tes mi Fé are pwal mwo nge lón ekkewe pwal ekkóch puk.” Ren enletin, ika Jesus a mochen pwe néún kewe chón káé repwe féri apwapwaan ránin uputiwan, iwe epwe fen affata pwe repwe silei ewe rán a uputiw lón.

Oruuan, ewe Paipel ese fósun án Jesus are pwal emén néún kewe chón káé féri apwapwaan Krismas. Ewe New Catholic Encyclopedia, a erá pwe “ewe Chronograph of Philocalus, eú néún chón Rom pwinin maram minen lón ewe ier 336 [mwirin Kraist]” a akkomw fósun apwapwaan ránin Krismas. A ffat pwe ena mettóch a fis fite fite ier mwirin an a fen wesiló ewe Paipel me fitepúkú ier mwirin án Jesus we manaw wóón fénúfan. Ina popun, ewe puk McClintock and Strong a erá pwe “apwapwaan Krismas esap ina efisien Kot me ese pwal nóm lón ewe popun Tes mi Fé.”a

Pokiten Jesus ewe Sense mi Lap, a awora emmwen mi fataffatéch usun met a mochen néún kewe chón káé repwe féri, me ikkena met a makketiw lón ewe Paipel. Iwe nge, apwapwaan Krismas ese nóm leir. Jesus a usun emén sense ese mochen néún kewe chón sukul repwe féri met ese nóm lón ekkewe kapasen emmwen a ngeniir, nge a mochen án néún kewe chón káé repwe “chök apwönüetä mine a mak” lón ewe Paipel.​—1 Korint 4:6.

Iwe nge, mi wor eú rán mi aúchea ekkewe popun Chón Kraist ra fókkun silei usun, ina Áchechchemen án Jesus we máló. Jesus a pwisin ereni néún kewe chón káé ineet atun repwe féri ena áchechchem me a áiti ngeniir ifa usun repwe féri. Ekkena emmwen mi fataffatéch, kapachelong ewe rán a máló lón, ra nóm lón ewe Paipel.​—Lukas 22:7, 19; 1 Korint 11:25.

Usun sia fen kúna pwe Krismas ina ránin apwapwaan uputiw me ren aramas, nge ekkewe popun Chón Kraist rese fiti ena eérenien lamalam chofona. Pwal och, ewe Paipel ese fósun án Jesus are néún kewe chón káé féri apwapwaan Krismas. Iwe pokiten ekkeei pwóróus, fite million Chón Kraist wóón unusen fénúfan ra apwúngaló pwe Krismas esap fán iter.