Met Kot Epwe Féri?

Ika ka nóm lón osukosuk, ese mwáál ka ekieki pwe emén chiechiom epwe féri och mettóch ren an epwe álisuk. Iwe, ekkóch ra apasa pwe Kot esap chiechiach pún ese féri och mettóch an epwe álisikich. Nge ren enletin, Kot a fen féri chómmóng mettóch fán ásengesich, nge epwe pwal mwékút pwe epwe pwákini meinisin ach kewe osukosuk me weires sia nóm faar lón ei fansoun. Met Kot epwe féri?

ASOPWALÓ MEINISIN FÉFFÉRINGAW

Kot epwe asopwaló meinisin féfféringaw ren an amóeló ewe populapan. Ewe Paipel a affata ié ena lupwen a erá: “Unusen fanüfan a nom fän nemenien Ewe mi Ngau.” (1 Johannes 5:19) “Ewe mi Ngau,” ina i ewe Jesus a eita ngeni “samolun ei fanüfan,” Satan ewe Tefil. (Johannes 12:31) Án Satan etipetipa aramas, ina populapen nónnómungawen me áweiresin ei fénúfan. Met Kot epwe féri?

Ekiseló chék Jiowa Kot epwe mwékút me ren Néún we, Jesus Kraist, epwe “atala manamanen Tefil a eäni nemenem won mäla.” (Ipru 2:14; 1 Johannes 3:8) Ren enletin, ewe Paipel a áiti ngenikich pwe ewe Tefil pwisin a silei pwe “a mochomoch chök an fansoun” me mwen an epwele ninniiló. (Pwärätä 12:12) Kot epwe pwal nieló chón féfféringaw meinisin.​—Kölfel 37:9; Än Salomon Fos 2:22.

EWILI FÉNÚFAN NGENI PARATIS

Mwirin án ach we Chón Fératá amóeló féfféringaw meinisin wóón fénúfan, epwe apwénúetá minne a tipeni me lepoputáán fán iten aramas me fénúfan. Met sia tongeni mwétéresiti?

Kinamwe me núkúnúkéch mi nómoffóch. “Ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”​—Kölfel 37:11.

Naféchún mwéngé mi múrinné. “Sokkun mongo mi chommong epwe nonnom lon ewe fonu; epwe paepaefeil won ekkewe chukuchukuta.”​—Kölfel 72:16, Testament Mi Fö.

Imw mi múrinné me angang mi aúchea. “Repwe aüetä imwer o nonom lon, repwe pwal fotuki irän wain o ochei uan. . . . Nei chon fil repwe pwapwaiti feiöchün angangen pöür fansoun langatam.”​—Aisea 65:21, 22.

Ka mwétéres le kúna ekkena sókkun feiéch? Ekiseló chék, meinisin repwele kúna ekkena esin feiéch iteiten rán.

AMÓELÓ SAMAU ME MÁLÓ

Lón ei fansoun aramas meinisin ra nóm fán nemenien samau me tipis, nge esap chúen ina usun ekiseló pwe Kot epwele apwénúetá manamanen án Jesus asorun méén kepich pwe “meinisin mi lükü i resap pöütmwälila, pwe repwe eäni manau esemüch.” (Johannes 3:16) Iwe epwe met mwirilóón?

Samau epwe móróffóchóló. “Esap wor eman chon ewe fanü epwe apasa pwe a samau. Nge än ekewe aramas tipis epwe musala.”​—Aisea 33:24.

Máló esap chúen eriáfféwú aramas. “Kot ewe Samol mi Lapalap epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin.”​—Aisea 25:8.

Aramas repwe manaw tori feilfeiló chék. “Än Kot lifang manau esemüch lon Kraist Jesus ach Samol.”​—Rom 6:23.

Chókkewe mi fen máló repwe manawsefál. “Ekewe chon pwüng me ekewe aramas mi ngau, repwe manausefäl seni mäla.” (Föför 24:15) Repwe feiéch seni án Kot liffang, ina ewe méén kepich.

Ifa usun Kot epwe apwénúetá meinisin ekkena mettóch?

FÉRATÁ EÚ MWÚ MI UNUSÉCH

Kot epwe apwénúetá minne a tipeni fán iten aramas me fénúfan ren ewe mwú lón láng, fán ewe Sounemenem Kraist Jesus mi kefilitá. (Kölfel 110:1, 2) Ina ewe mwú, Jesus a áiti ngeni néún kewe chón káé ar repwe iótek usun ren an apasa: “Semem lon läng. . . . Mwum epwe war.”​—Mateus 6:9, 10.

Mwúún Kot epwe nemenem wóón fénúfan me amóeló meinisin riáfféú me weires wóón unusen fénúfan. Ena Mwú, ina ewe mwú mi fókkun múrinné seni meinisin! Ina ewe popun Jesus a fókkun achocho le esilefeili “ewe Pworaus Allim usun ewe Mwün Kot” lón an angangen afalafal wóón fénúfan me ereni néún kewe chón káé ar repwe pwal féri ena.​—Mateus 4:23; 24:14.

Seni watteen án Jiowa Kot tongei aramas, a pwonei pwe epwe féri ekkena mettóch meinisin mi amwarar fán iter. Ena mettóch ese pwal achchúnguk le mochen silei I me arap ngeni? Ifa usun kopwe feiéch ika ka filatá le féri ena? Ewe lesen mwirin ei epwe áweweei.