Lupwen Aramas Rese Nom lon Imwer
1. Ifa ewe osukosuk sia kükküna iteitan lupwen sia kan afalafal imw me imw?
1 Lon chommong leeni a weiresilo ach sipwe chuuri aramas lon imwer. Lon ei “fansoun weires,” chommong ra kan angang fite fite awa fän iten chök ar repwe atufichi manauer. (2 Tim. 3:1) Eli ekkoch rese nom lon imwer pun ra kan feilo kamö lon sitowa are ra kan kükkünöü. A ifa ussun ach sipwe tongeni chuuri ekkena aramas ren ewe kapas allim.
2. Ifa ussun sipwe tümünüöchü pwe sisap tunalo ekkewe imw esor aramas lon?
2 Tümünü Rekotun Afalafal: Ewe äeüin mettoch kopwe föri, kopwe makkei leenien ekkewe rese nom lon imwer. A fokkun lamot ena ika ka kan afalafal iteitan lon om territory. Ka makkei iten ewe sopw, nampaan ewe katoon territory, itom me ewe pwinin maram? Ka tongeni likiiti och kinikinin lon ena taropwe fän iten pwal och pworaus lupwen en ika pwal emön chon afalafal epwe liwinsefäl ngeni ekkewe imw esor aramas lon. Le muchuloon ewe fansoun afalafal, chechchemeni pwe kopwe ngeni ena rekot ewe emön a wisen eäni ewe territory, nge ika a tipeeü pwe kopwe chuuri ekkena imw esor aramas lon kopwe wisen kamwoch ena rekot. Nöünöü pwal echö taropwe fän iten chokkewe ka küna pwe ra pwapwaiti ewe pworaus pwe kopwe tüttümünür.
3. Ikkefa ekkewe pesepes pwe sipwe tongeni chuuri ekkewe aramas rese nom lon imwer?
3 Sotuni Lon Kulokun Pwal Eü Fansoun: Eli ekkoch rese nom lon imwer atun ränin angang nge eli repwe nom lon imwer lekuniol are lon Ammol me Räninfel. En mi tongeni akkota om fansoun le liwin lupwen epwe tufich? (1 Kor. 10:24) Ika esap ina, eli kopwe tongeni ngeni emön chon afalafal rekotun ekkewe imw esor aramas lon pwe epwe liwinitir lon kulokun pwal eü fansoun. Ika esap tufich ena, iwe kopwe tongeni mak ngeniir taropwe ika kökkörir lon fon. Ekkewe chon afalafal mi tufichingaü pokiten samau ra tongeni pwapwa le älisuk ren ena lapalap.
4. Menni pworaus mi pwäralo lamoten ach sipwe liwiniti ekkewe imw esor aramas lon?
4 Iei eü pworaus mi aweweei lamoten ach sipwe achocho le chuuri ekkewe aramas rese nom lon imwer atun afalafal. Mwirin an ekkewe chon afalafal ekkeniwili le liwiniti eü imw lon ülüngät ier, iwe mwiriloon ra tufichin chuuri ewe chon imw. A pwälo pwe neminewe mi käkkäeö lon eü leeni me mwan, iwe, a fen wikkitiwiti emön chon Pwäratä an epwe feito ren pwe epwe sopweilo an käeö ewe Paipel.
5. Itä inet sipwe erä pwe a unusulo angangen eü territory?
5 Awesöchüolo Unusen ewe Territory: Itä inet sipwe erä pwe a unusulo angangen eü territory? Lapengeni, lupwen sia unusen achocho ngeni le chuuri emön me lon eü me eü imw lon ewe territory. Eli, epwe mürinnö ach sipwe likitalo echö tract are chassi lon ekkewe imw esor aramas lon , iwe nge resap pwäpwälo, äkkäeüin lon ekkewe territory sise kon akkafalafal ie. Ewe territory epwe wesewesen wesilo lon ükükün rüüanü maram. Iwe, mwirin, ewe katoon territory epwe liwinto ngeni ewe emön a wisen tümünü ewe territory pwe epwe makketiu ekkewe minefon pworaus lon an rekot.
6. Pwata sipwe achocho le chuuri emön me emön lon ach territory ren ewe kapas allim?
6 Sia mochen pwe epwe chommong aramas ika mei tufich ngeniir pwe repwe käeö ar repwe kökköri iten Jiowa me küna manau. (Rom 10:13, 14) Ei epwe pachelong ekkewe aramas rese nom lon imwer lupwen sia afalafal imw me imw. Ussun chök ewe aposel Paul, a efisi pwe ina om mochen om kopwe unusen “pwarata ewe kapas allim usun ewe chenin Kot.”—Fof. 20:24.