Ifa Usun Epwe Tongeni Álisuk Ika Epwe Wor Pwisin Óm Leenien Afalafal?
1. Met weween pwisin óm leenien afalafal?
1 Met weween pwisin óm leenien afalafal? Ei sókkun leenien afalafal kopwe wisen afalafal lón, neman ikewe ie a kkan ngeni leeniom, nge ei a kawor ngeni ekkewe mwichefel mi chómmóng ar kewe leenien afalafal. Ewe Organized puk, pekin taropwe 103, a áweweei: “Kaworen pwisin óm leenien afalafal mi mecheres le tikeri epwe atufichuk le áeá watteen fansoun fán iten ewe angangen afalafal. Pwal eú, ka tongeni etiwa pwal emén chón afalafal epwe etuk le angang lón pwisin óm na leenien afalafal.”
2. Ifa usun pwisin án emén leenien afalafal epwe alapaaló án mwichefel angangen afalafal?
2 Alapaaló Án Mwichefel Angangen Afalafal: Lupwen ka eáni eú pwisin óm leenien afalafal mi kkan ngeni óm leenien angang, ka tongeni afalafal atun óm aséséén leolowas are me mwen kopwe liwiniti imwom, eli oupwe mwin me pwal emén chón afalafal mi kkanfengen ámi leenien angang. Lupwen ka eáni eú pwisin óm leenien afalafal mi kkan ngeni imwom, en me óm famili oupwe mecheres le akkóta ámi afalafal lepwin. Ika kese fiti mwich fán iten afalafal, epwe fich óm kopwe iótek fán iten án Jiowa emmwen me mwen kopwe poputá le afalafal. (Fil. 4:6) Pwal eú, a lamot óm kopwe alélléppékú ewe fansoun ka afalafal lón pwisin óm we leenien afalafal me óm álisatá an ewe mwichefel kókkótun angangen afalafal. Ákkáeúin lón Ammól me Ráninfel, pún iei atun chómmóng repwe afalafal, iwe, a fókkun múrinné óm kopwe fiti óm kúmiin chón afalafal.
3. Ifa échún an epwe wor pwisin óm leenien afalafal?
3 Échún: Lupwen a wor pwisin óm leenien afalafal, a wor ia kopwe afalafal ie ineet chék ewe fansoun a suuk ngonuk. Epwe watte óm fansoun le afalafal pún sanne epwe ttam óm sái. Ei sókkun kókkót a ámecheresaaló ngeni ekkóch ar repwe fiti auxiliary are regular pioneer. Pwal eu, a mecheres le liwiniti ekkewe mi mochen aúseling ren óm kopwe akkafalafaler me poputááni óm káé Paipel ngeniir pokiten ka chék nóm lón eú leeni. Chómmóng ra kúna pwe ar afalafal lón pwisin ar leenien afalafal a álisiir le silei chón leenier me a efisatá an chón leenier lúkúlúk wóór, ákkáeúin, ika ra tongeni angang lón ena leenien afalafal lap seni fán eú me mwen ekkóch chón afalafal repwe angang lón. Ewe angang lón pwisin óm leenien afalafal epwe álisuk me óm famili pwe oupwe unusen apwénúetá ewe angangen afalafal?—2 Tim. 4:5.