Ifa Ussun Sipwe Älisi Chon Fiti ewe Ächechchem?
1. Ifa ewe afalafal mi kkü letipen aramas epwe katowu lon March 22, 2008?
1 Lon March 22, 2008, fite milion aramas woon fönüfan repwe rongorong eü afalafal mi kkü letiper. Ekkewe mi fiti ewe Ächechchem repwe rongorong pworausen än Jiowa tong mi lapalap ren an awora ewe möön kepich fän iten aramas. (Jon 3:16) Repwe pwal käeö ussun ewe mwu me ifa ussun Jiowa epwe äeä ena mwu le apwönüetä letipan woon unusen fönüfan. (Mt. 6:9, 10) Repwe pwisin küna ewe tong me tipeeü lein nöün Kot kewe aramas me ar etiwaöchü aramas.—Kolf. 133:1.
2. Ifa ussun sipwe älisi ekkewe chon käeö ra fiti ewe Ächechchem?
2 Ekkewe Chon Käeö Paipel: Ekkoch ekkewe chon fiti ra kerän chök poputä le käeö ewe Paipel rech. Paniir ngeni pwiich kewe pwe repwe kapong me apasa iter. Awewe ngeniir ekkewe mwich mi fiffis iteiten wiik, me äiti ngeniir ewe leenien mwich. Atun ewe afalafal, ewe chon eäni ena afalafal epwe pesei ekkena chon käeö ar repwe sopwelo le feffeitä lon pekin ngün. Ka tongeni äeä an kewe pworaus le apöchökküla nöüm we chon käeö.
3. Ifa ussun sipwe apöchökküla ekkewe rese chuen akkafalafal nge ra fiti ewe Ächechchem?
3 Ekkewe Rese Chuen Akkafalafal: Ekkoch chon fiti ewe Ächechchem ir rese chuen akkafalafal. Sipwe akkom le kapong ngeniir me sisap pwal kapas eis ren met epwe äsäuer. Mwirin chök ewe Fääf, ekkewe elter repwe chuuri chokkewe rese chuen akkafalafal mi fiti ewe Ächechchem, pwe repwe apunga ar achocho me etiwasefalliir ngeni pwal eü mwich.
4. Ifa ussun kich meinisin sipwe älisi ekkewe wasöla?
4 Ekkewe Wasöla: Ekkewe ekkoch chon fiti, iir chienach kewe are chon ach famili ekkewe sia pwisin etiwer. Eli ekkoch sia etiwer atun ewe kampein. Nge ika ka küna ekkoch kose sisiler, kopwe akkom kapong ngeniir me awasölaöchür, pun eli a kerän iei äeüin ar fiti. Lon ämi pworausfengen neman kopwe tongeni silei ifa ussun kopwe chuurisefallir. Ka tongeni pwisin chuuriir are fos ngeniir woon fon fitu chök rän mwirin ewe Fääf, iwe kopwe peseer ar repwe alapalo ar sile me etiwer pwe repwe käeö Paipel.
5. Met sipwe tongeni apasa ren ach sipwe poputä le käeö ngeni aramas?
5 Sia tongeni äeä ewe pworaus a katowu lon ewe afalafal atun ewe Ächechchem lupwen sia äiti ngeni ewe Sile puk ngeni ekkewe sia chuurisefällir. Ren chök awewe, ewe chon afalafal lon ewe Ächechchem epwe älleäni Aisea 65:21-23. Lupwen kopwe liwinsefäl, ka tongeni kapas ussun ewe afalafal me apasa, “Upwe äiti ngonuk ekkoch feiöch ewe möön kepich a tongeni awora.” Mwirin nengeni pekin taropwe 9-10 lon ewe Sile puk. Ika ka tongeni apasa, “Chommong aramas ra ekieki ika inet sipwe küna pwönüetään ewe oesini lon puken Aisea.” Mwirin, nengeni parakraf 1-4 lon sopwun 11. Sipwe pwal tongeni apworausa met ewe chon afalafal lon ewe Ächechchem a aweweei, mwirin sipwe chök äiti ngeni ewe Sile puk me pwomweni napanapen ach käeö ngeni aramas.
6. Lupwen sia apwönüetä än Jises allük me fiti ewe Ächechchem, met a suuk ngenikich ren ach sipwe älisi aramas?
6 Amwo emön me emön leich epwe nengeniöchü ewe fansoun mi suuk ngenikich ach sipwe älisi ekkewe chon fiti ewe Ächechchem, awewe chök ren ekkewe chon käeö, ekkewe rese chuen akkafalafal, me ekkewe wasöla. (Luk 22:19) Jiowa epwe fokkun efeiöchü ach achocho le alapalo ach angang fän itan.