Ammolnatä me Unusen Pwapwaiti Ekkewe Mwich
1. Met epwe älisikich le pwapwaiti me küna feiöch seni ach kewe mwich?
1 Awora fansoun le ammolnatä fän iten ekkewe mwich. Eli ekkoch ra tongeni awora watteen fansoun le ammolnatä, lap seni ekkewe ekkoch. Iwe nge, inaamwo ika sia osukosuk nge a fokkun lamot sipwe ammolnatä fän iten ekkewe mwich.—1 Tim. 4:15, 16.
2-5. Ifa usun sipwe ammolnatä fän iten: (a) Än ewe Mwichefel Käeöön Paipel? (b) Sukulen Afalafal? (c) Service Meeting? (d) Käeöön Leenien Mas?
2 Än ewe Mwichefel Käeöön Paipel: Akkomw, nengeni unusen ewe lesen; ekieki itelapan me ekkewe itelap kisikis. Iwe, atun ka älleani chechchemeni ekkewe pworaus mi aüchea. Älleani ekkewe wokisin lon ewe lesen. Sotun pölüweni ekkewe kapas eis lon pwisin itiitin om kapas. Lupwen ka fen ammolnatä ewe lesen ekiekisefäli ekkewe pworaus. Achocho le chechchemeni menlapen ekkewe pworaus mi aüchea me ifa usun ra äweweei.—2 Tim. 2:15.
3 Sukulen Afalafal: Achocho le fiti ewe kokkotun älleaan Paipel iteiten wiik. (Jos. 1:8) Käeö ekkewe lesen, me uwei ekkewe puk sipwe nöünöü pwe kopwe tongeni nengeni atun ewe chon a afalafal a afalafal. Ekieki ifa usun kopwe tongeni äeä ekkena pworaus lon om angangen afalafal.
4 Service Meeting: Katol ewe schedule lon ewe Ach Angangen Afalafala ewe Mwu. Älleani ewe lesen sipwe käeö. Ika ewe pworaus a feito seni ewe Leenien Mas are ekkoch puk, sipwe pwal pii me älleani. Ika a wor pwoomw ren met sipwe apasa lon ewe angangen afalafal, ammolnatä pwe kopwe äeä lon om angangen afalafal.
5 Käeöön Leenien Mas: Älleani ewe lesen me pölüweni ekkewe kapas eis. Älleani ekkewe wokisin seni Paipel lon na lesen pwe kopwe wewefichiti. Ekiekifichi ifa usun ewe lesen a riri ngeni met ka fen silei pwe epwe alapalo om sile. Mmolnetä om kopwe uwawu meefiom lon ewe mwich ren om pölüweni eü ika ruu parakraf. Iei usun sia pwäratä pwe a wor “ach apilukuluk allim.”—Ipru 10:23 TF.
6. Met epwe pwal alapalo ach aücheani me pwapwaiti ekkewe mwich?
6 Pwapwaiti Ekkewe Mwich: Ren ach sipwe unusen pwapwaiti ekkewe mwich, a lamot sipwe warekkäi pwe sipwe fiti ewe iotekin lepoputään mi tingor än Jiowa ngün mi fel. Sipwe pwal tongeni feiöch seni ekkewe kölün mwich. Achocho le suuk ngeni ekkewe wokisin ra älleani pwe epwe älisuk le chechchemeni met ka rong. Om akkapworausa ngeni chon om famili me chienom kewe ussun met ka käeö, epwe älisuk le chechchemeni. Ika ka apwönüetä ekkeei kapasen pesepes epwe lapolo om aücheani me pwapwaiti ekkewe mwich me “eäni chen me föför mürina.”—Ipru 10:24, 25.