Noum Kewe Ra Fen Mmolnetä?
1. Pwata a lamot ngeni ekkewe chon sukul ar repwe mmolnetä?
1 Epwele poputäsefäl sukul. Ese mwääl nöüm kewe repwe küna mineföön sossot me osukosuk. Epwe pwal suuk ngeniir ar tufichin “pwärätä mine a let.” (Jon 18:37) Nge ra fen mmolnetä?
2. Met a lamot noum kewe repwe silei fän iten ar repwe mmolnetä?
2 A wesewesen ffat ngeni noum kewe met a kapachelong lon än aramas föfförün kon ätekiatääi mwuur me fiffiti apwapwaan ränin pin? Ra unusen weweiti ika pwata a mwääl ach sipwe fiffiti? Ra fen ammolnatä met repwe föri atun aramas repwe etipetiper le fiti sukul tekia, date, ün sakaw are äeämwäälli säfei? Itä repwe chök erä pwe resap föri pokiten ina allükün ar lamalam, are ra fen silei le äweweöchü minne ra lükü?—1 Pit. 3:15.
3. Ifa usun ekkewe sam me in ra tongeni äeä ar fansoun Famili Fel le älisi nöür kewe le mmolnetä?
3 Äeä Ewe Fansoun Famili Fel: Pwüngün pwe oupwe pwoppworausfengen atun epwe ppiitä mineföön osukosuk. Me mwen an epwe poputäsefäl sukul, ämi achocho le pworausfengen usun ewe sokkun osukosuk epwe tongeni ppiitä epwe alükülüküöchü noum kewe. Pwata ouse äeä eü are lap seni eü ämi fansoun Famili Fel le föri ena? Kopwe kapas eis ngeni noum kewe ika met ra aüreki atun epwe poputäsefäl sukul. Oua tongeni enniwili ekkewe pworaus oua fen piin pworaus woon me loom pun iei ra wattetä me a lapolo ar wewe. (Kölf. 119:95) Kopwe tongeni pwomweni pwe en emön sense, counselor, are chienan chon sukul. Äiti noum kewe ar repwe nöünöü Paipel le pölüweni kapas eis. Emön in a älisi nöün kewe ar repwe mmolnetä le esile ngeni nöür mineföön sense pwe iir Chon Pwäratä Jiowa.
4. Met ekkewe sam me in mi tipachem repwe föri?
4 Lon ekkeei ränin lesopwoloon, a “weires” ekkewe sossot nöüch kewe repwe küna. (2 Tim. 3:1) Sam me in mi tipachem repwe ekieki ekkewe sossot epwe tongeni tori nöür kewe, iwe, repwe älisiir le mmolnetä. (SalF 22:3) Me mwen poputään ewe mineföön ierin sukul, älisi noum kewe ükükün om tufich pwe repwe mmolnetä.