Ka Fen Mmolnetä fän iten Om Sukul?
1. Ifa ewe mettoch a suuk ngonuk lupwen kopwe poputä om sukul?
1 Inaamwo ika kopwe kerän tolong are kopwe sopwelo om sukul, en me chienom kewe chon Kraist oupwe küna sossot lon sukul. Nge a suuk ngonuk om tufichin “pwärätä mine a let” ngeni chommong aramas. (Jon 18:37) Ka fen ammolnataöchü om kopwe afalafal?
2. Pwata kopwe tongeni erä pwe ka fen mmolnetä fän iten sukul?
2 A fen watte ewe käit ka küna seni Jiowa, seni semom kewe me inom me seni ewe chon angang mi tuppwel o tipatchem pwe kopwe sopwöch lon meinisin kinikinin manauom. (SalF. 1:8; 6:20; 23:23-25; Ef. 6:1-4; 2 Tim. 3:16, 17) Ese mwääl, iei ka fen silei ekkewe sossot repwe tongeni toruk lon sukul. Pokiten ka fen käeö met Kot a kutta senikich me ka silei nonnomun om sukul, kopwe ammolnoketä le afalafal ngeni chon sukul. (SalF. 22:3) Kopwe ekiekiöchü ekkewe kapasen emmwen me pesepes mi älillisöch seni Paipel lon ekkewe ruu puk itelapan Young People Ask me pwal ekkewe pworaus mi weneiti ekkewe kukkun me sarafö lon Awake!
3. Ifa ussun epwe tongeni suuk ngonuk om kopwe tufichin afalafal?
3 Mi kkolo aüchean ewe sukul ussun om leenien afalafal pun mi suuk ngonuk om tufichin afalafal ngeni chommong aramas fan sokkopaten napanap. Lupwen ekkewe ekkoch repwe küna pwe a fokkun öch ufom, foutom, föfförüm, om fos, om süföliti chienom kewe chon sukul me ekkewe sense, pwal mwo angangöchum lon sukul, repwe esinna pwe ka fokkun lükülüköch lon manauom. Iwe, eli ekkoch repwe eis, “Pwata en mi sokkolo seni ekkoch?” (Mal. 3:18; Jon 15:19;1 Tim. 2:9, 10) Lon ei atun a suuk ngonuk om kopwe afalafal me aweweei ussun om kewe lükü. Lon unusen ier neman kopwe küna sossot ren ränin apwapwaan fönüfan me ekkewe föfförün fel fän iten ewe mwu. Ika emön a eisinuk: “Pwata kese fiti ewe apwapwa are ar mwokutukut?” Kopwe ereni pwe ina allükün ach lamalam are kopwe fen aweweei ussun Jiowa? Ika ka ammolnatäfichi fän emmwenien Jiowa, iwe epwe ammolnoketä pwe kopwe angöch le afalafal ngeni nöüm kewe sense, chienom kewe chon sukul me pwal ekkewe ekkoch.—1 Pit. 3:15.
4. Pwata kopwe lükülük pwe kopwe tongeni sopwöch lon sukul lon ei ier?
4 Inaamwo ika ka ekis lolilen om kopwe fiti sukul, nge kopwe lükülük pwe mi chommong chon älisuk, iir mi enletin mochen kopwe sopwöch lon om sukul lon ei ier. Pwal och, äm aua etuk lon om pwapwa pwe a suuk ngonuk chommong atun om kopwe afalafal lon pwisin om leenien afalafal mi kkolo aüchean. Ina minne, kopwe apworok me mmolnetä fan iten ewe sukul!