Nimu Alen Kúnékún Chón Káé Paipel
1. Ika a weires ach sipwe kúnékún néúch chón káé lón ach we leenien afalafal, met sipwe féri me pwata?
1 A weires óm kúna emén kopwe káé Paipel ngeni? Sópweló le kút. Jiowa epwe efeiéchú chókkewe rese fangetá le féri letipan. (Kal. 6:9) Ikkeei ekkewe nimu kapasen emmwen repwe álisuk.
2. Ifa usun sia tongeni poputááni káé ren ach mwittir eis?
2 Mwittir Eis: Chómmóng ra silei pwe sia kan akkanéúnéú Ewe Leenien Mas me Awake!, nge neman rese silei pwe aramas ra ketiw ar repwe káé Paipel rech. Atun ka fiti afalafal imw me imw, pwata kese sótun mwittir eisini aramas ika ra mochen káé Paipel? Ka pwal tongeni eisini ekkewe aramas ka kan chuuriir nge iir mi sani le aúseling, ika ra mochen ar repwe káé Paipel. Ika rese mochen ka tongeni sópweló le likitatiw ekkewe puk me ámááraatá ar mochen aúseling. Emén chienach mwán a fen chuchchuuri eú pean pwúpwúlú fitu ier ren an epwe anéúnéú ngeniir ekkewe puk. Mwirin an likit ngeniir ewe eú mineféén puk, a kululó pwe epwele ló nge a cheme ngeni an epwe eisiniir: “Oua mochen káé Paipel?” A máirú lupwen ra apasa ewer. Iwe iei ra fen papatais.
3. Itá sipwe ekieki pwe a fen wor mi kákkáé Paipel ngeni chókkewe sia kan kúkkúner ar fiti mwich? Áweweei.
3 Ekkewe Mi Fiffiti Mwich: Kosap ekieki pwe a fen wor mi kákkáé Paipel ngeni chókkewe mi pwapwaiti le aúseling nge ka kúkkúner ar fiffiti mwich. Iei alón emén chienach mwán: “Ua fen poputááni lape ngeni nei kewe chón káé seni lein chókkewe mi fen piin fiffiti mwich.” Emén chienach fefin a meefatá an epwe fós ngeni inen ekkewe nengngin mi papatais mi nóm lón an we mwichefel nge iner na mi nisássáú. A fen fiffiti mwich órun 15 ier. Nge iteitan, a wareiti ewe Leenien Mwich mwen chék epwe poputá me a mwittir ló ika a sár. A tipeeú ngeni an epwe káé me ekiseló a chóni ewe enlet. Iei alón chienach we fefin: “Ua niamam ren ai witi mwirin 15 ier upwap eisini ika a mochen káé!”
4. Ifa usun sipwe tongeni kúna emén chón káé ren ach eisini ekkóch ika ra pwal sissilei emén mi mochen káé?
4 Eis Pwal Ekkóch: Emén chienach fefin a achocho le fiti ekkewe ekkóch le chuuri néúr kewe chón káé. Nge lemúchúlóón ewe káé, neminna a tingorei ewe mi emmweni ewe káé pwe epwe eisini ewe chón káé ika mi sissilei emén mi pwapwaiti an epwe wor pwisin an káé. Atun ka anéúnéú ewe puk Paipel A Apasa ngeni emén ka kan chuuri, neman ka tongeni eisini: “Ka silei ié epwe pwal pwapwaiti le néúni eú ei puk?” Fán ekkóch nónnómun ekkewe chón afalafal are ekkóch pioneer ese mut ngeniir ar repwe pwal káé ngeni ekkewe ra chuuri lón ewe leenien afalafal. Ina pwata, esilei ngeniir pwe ka tufichin néúni emén chón káé.
5. Pwata sipwe kapas eis ngeni pwúlúwen pwich kewe resaamwo fitikich ika ra mochen sipwe káé ngeniir?
5 Pwúlúwen Pwiich Kewe Resaamwo Fitikich: Mei wor chón lón óm we mwichefel pwúlúwer kewe resaamwo fitikich? Ekkóch me leir rese mochen pwe pwúlúwer kewe Chón Kraist repwe fós ngeniir usun ewe Paipel nge repwe mochen etiwa emén me lúkún ar we famili. Fán chómmóng a mmen éch ach sipwe akkomw fós ngeni pwich kewe me mwen ach sipwe fós ngeni pwúlúwer kewe resaamwo fitikich pwe sipwe silei met sókkun napanap mi fókkun múrinné sipwe eáni.
6. Ifa úkúkún lamoten ewe mettóch iótek atun kopwe kútta emén chón káé?
6 Iótek: Kosap ekieki pwe ese kon manaman ewe mettóch iótek. (Jas. 5:16) Jiowa a pwonei pwe epwe aúselinga ach tingor ika a tipeeú ngeni letipan. (1 Joh. 5:14) Emén chienach mwán mi fókkun tawengaw a poputá le iótek pwe epwe wor emén néún chón káé. Pwúlúwan we a pwal ekieki ika epwe ifa usun án pwúlúwan na epwe awora an fansoun ngeni néún chón káé, ákkáewin ika a tori ena chón káé chómmóng osukosuk. Ina popun neminna a esilei ngeni Jiowa an na lólilen atun a ióteki pwe epwe wor néún pwúlúwan we chón káé. Mwirin ruu wiik a pélú ar iótek atun emén pioneer lón ar we mwichefel a chuuri emén mwán mi mochen káé Paipel me a ngeni chienach na mwán. Iei makkeien pwúlúwen chienach na mwán: “Ngenikemi chókkewe oua meefi pwe a chou ámi oupwe néúni emén chón káé, iei alói: Oupwe tichik lón ámi iótek me ousap fang le ikkiótek. Ause fókkun ekieki pwe epwe iei esin ám pwapwa.” Fán likiitú, kopwe pwal tongeni kúna emén noum chón káé me kúna pwapwa ren óm álisi emén wóón ewe “al ngeni manau.”—Mat. 7:13, 14.