Usun Óm Kopwe Feiéch Seni Chón lón Óm we Kúmiin Afalafal
1. Ikkefa ekkewe feiéch seni ewe kókkótun Puk Study mi pwal kawor ngeni chón ach kúmiin afalafal?
1 Ka pwosiiti ekkóch kinikinin ewe Puk Study? Chóchóón a chék chókúkkún me napanapan a ekinamwe. A mecheres ach sipwe poputááni chiechi mi álisikich le akkamwéchú péchékkúlen ach lúkú. (SalF. 18:24) Ewe chón emmweni ewe puk study a tufichin silei urusoun are nónnómun emén me emén pwe epwe tongeni awora minen pesepes ngenikich. (SalF. 27:23; 1 Pet. 5:2, 3) Ekkena feiéch ra pwal kawor ngeni chón lón ach we kúmiin afalafal.
2. Ifa usun sipwe pwisin akkomw le mwékút pwe epwe efisi chiechiéchfengen lón ach kúmiin afalafal mi apéchékkúla ach lúkú?
2 Pwisin Akkomw le Mwékút: Lape ngeni lélléén ekkewe kúmiin chón afalafal ra usun chék ewe kúmiin puk study. Ren ach angangfengen me ekkewe ekkóch lón ewe angangen afalafal, a tongeni efisi chiechiéchfengen. (Fil. 1:27) Fitemén chón lón óm we kúmi oua fen angangfengen? Ka tongeni ‘suki letipom’ ren ena? (2 Kor. 6:13) Pwal och, neman sia tongeni etiwa emén fán ekkóch seni ach we kúmiin afalafal an epwe fitikich lón ach Famili Fel are mwéngéfengen. Lón ekkóch mwichefel ekkewe kúmiin afalafal ra ekkewiwi le awasélai ewe emén mi etto eáni afalafal lón ar we mwichefel. Ika a sereni pwe wiser lón ena wiik, chón ewe kúmi repwe mwéngéfengen me apéchékkúlafengeniir inaamwo ika ewe emén mi etto eáni afalafal lón ar we mwichefel ese tongeni fiti ar mwéngéfengen.
3. Ikkefa ekkewe fansoun sia tongeni angei pesepes seni ach kúmiin afalafal?
3 Inaamwo ika iei chón ewe mwichefel ra chék mwichfengen fán ruu lón eú wiik, nge esap weween pwe ekkewe elter repwele ekisaaló ar chuuriir pwe repwe apéchékkúler. Ekkewe chón emmweni eú me eú kúmiin afalafal repwe wisen apéchékkúla emén me emén me ákkáitiir fán iten ewe angangen afalafal. Ika noum we chón emmwen lón óm na kúmi esaamwo akkóta pwe oupwe angangfengen lón ewe angangen afalafal, pwata kese ereni pwe oupwe angangfengen? Pwal eú, ewe service overseer a kan fiti eú me eú kúmiin afalafal fán eú lón eú maram le afalafal. Lón ekkewe kúkkún mwichefel, ikewe a chék wor fitu kúmiin afalafal ie, ewe service overseer a tongeni akkóta pwe epwe chuuri eú me eú kúmi fán ruu lón eú ier. Ka akkóta óm schedule pwe kopwe fiti afalafal atun ewe service overseer a chuuri óm na kúmi?
4. (a) Ifa usun kkótun ewe mwichen afalafal? (b) Pwata sipwe ekieki ach sipwe mutawu imwach fán iten ewe mwichen afalafal?
4 Fán chómmóng epwe múrinné ngeni eú me eú kúmi ar repwe imufesen atun repwe féri ar mwichen afalafal lón weekend. An epwe wor chómmóng leeni ia epwe fis ia ewe mwichen afalafal ie mi taitap kulókun, epwe ámecheresi án ekkewe chón afalafal repwe feiló lón ena leeni me ló ngeni ewe leenien afalafal. Epwe mecheres kkótun ekkewe chón afalafal me repwe mwittir ló ngeni ewe leenien afalafal. Epwe pwal mecheres ngeni ewe chón emmweni ewe kúmi an epwe túmúnúéchú chóchóón an kúmi. Iwe nge, eli fan ekkóch ren och popun, epwe múrinné ika ekkewe ruu kúmi are lap seni repwe kochufengen. Ika unusen ewe mwichefel ra kochufengen lón ewe ewin Ammól lón eú maram are mwirin ewe káéén Leenien Mas, epwe múrinné ika eú me eú kúmi repwe mómmótfengen me mut ngeni ewe chón emmweni ewe kúmi an epwe akkóta an we kúmi me mwen epwe asopwaló ewe mwichen afalafal ren iótek. Ppii ewe pwóór “Ka Tongeni Mutawu Imwom?”
5. Inaamwo ika a fen wes ewe kókkótun Puk Study, nge met sia tongeni lúkúlúk wóón?
5 Inaamwo ika a fen wes ewe kókkótun Puk Study, nge Jiowa a sópweló le awora mettóch meinisin mi lamot pwe sipwe féri letipan. (Ipru 13:20, 21) Ren án Jiowa túmún, esor met sia osupwang ren. (Kölf. 23:1) A chómmóng feiéch mi kawor seni ach kúmiin afalafal. Ika sia akkomw mwékút le “amoratiu chommong” sipwe pwal “kini . . . chommong.”—2 Kor. 9:6.
[Pwóór lón pekin taropwe 6]
Ka Tongeni Mutawu Imwom?
Ekkóch mwichefel ra ochufengeni ekkewe kúmi fán iten afalafal lón weekend pokiten ese naf ekkewe imw ia ra tongeni chufengen ie. Ekkewe mwich fán iten afalafal ra pwal kapachelong lón kókkótun mwichefel, ina pwata ach mutawu imwach an epwe fis ewe mwichen afalafal ie, ina eú feiéch mi fókkun aúchea. Ka tongeni mutawu imwom? Ika ese kon éch imwom we, esap ina ewe minen eppet ngonuk óm kopwe mutawu imwom. Ekkewe elter repwe ekieki ia a nóm ie imwom we me repwe pwal ekieki ekkewe ekkóch mettóch ra pwal ekieki atun ra filatá ewe leenien puk study. Ika ka mochen mutawu imwom we, kopwe ereni ewe chón emmwen lón óm we kúmi.