Ewe Angangen Etiwetiw fán Iten ewe Áchechchem Epwe Poputá lón March 1
1. Ineet epwe poputá ewe angangen etiwetiw fán iten ewe Áchechchem, me pwata epwe ttam lón ei ier?
1 Iteiten ier sia kan etiwa aramas pwe repwe fitikich lón ewe Áchechchem. Epwe poputá ach angangen etiwetiw lón Enimu March 1. Ewe Áchechchem epwe fis March 26, weween pwe ewe angangen etiwetiw epwe ekis ttam lap seni lón ekkewe ier. Ren ena kókkót chómmóng aramas repwe ketiw, ákkáeúin ika ra nónnóm lón ewe leeni ia ewe mwichefel a nóm ie nge a watte an leenien afalafal.
2. Ikkefa ekkewe kókkótun ach angei ekkewe taropween etiwetiw me einet lón ewe leenien afalafal?
2 Akkótaéchú: Ekkewe elter repwe awora emmwen ika ifa usun sipwe einet lón ekkewe leenien afalafal kapachelong och emmwen ika sipwe likiti ewe taropween etiwetiw lón ekkewe imw ese wor aramas lón. Ika a chúen wor lusun ekkewe taropween etiwetiw mwirin ach áwesi ekkewe leenien afalafal ren imw me imw, eli ekkeei taropwe repwe einet ngeni aramas ese lifilifil. Ewe service overseer epwe ppiiéchú pwe ekkewe taropween etiwetiw a affat pwóróusen ewe Áchechchem lón, iwe, epwe nóm wóón ewe leeni ikewe puk ra nóm ie pwe ekkewe chón afalafal repwe angei néúr. Iwe nge, esap chék fán eú repwe uwawu meinisin ekkewe taropween etiwetiw. Sipwe chék angei úkúkún met sia tongeni anéúnéú lón eú wiik.
3. Met a lamot sipwe chechchemeni atun sia eineti ewe taropween etiwetiw?
3 Met Sipwe Apasa? Epwe fókkun múrinné ika esap ttam ach fós ngeni aramas pún sipwe tongeni chuuri chómmóng. A wor eú afalafal lón pekin taropwe 4 sia tongeni áeá, iwe, sia tongeni siwili pwe epwe fich ngeni ach leenien afalafal. Chechchemeni pwe sisap atapwalen ló ika ewe chón imw a chiechiéch me eáni ekkóch kapas eis. Atun sia fiti ewe angangen einet lón weekend, sipwe pwal anéúnéú ekkewe puk ika mi tufich. Iwe nge, lón March 2 sipwe chék eineti ewe taropween etiwetiw nge sisap mwo kútta ach sipwe poputááni eú káéén Paipel usun sia fen piin féfféri iteiten áeúin Ammól lón eú maram.
4. Pwata a lamot sipwe tinikken le fiti ei angangen etiwetiw?
4 Sia áneán pwe epwe chómmóng repwe fitikich lón ewe Áchechchem. Ewe afalafal epwe áweweei wesewesen ié ena Jesus. (1 Kor. 11:26) Epwe apwóróusa ifa usun an we máló a álisikich. (Rom 6:23) Iwe epwe menlapei pwata a a lamot ach sipwe chechchemeni i. (Joh. 17:3) Amwo oukich meinisin sipwe tinikken le fiti ei angangen etiwetiw!