April 2, Einetin ewe Taropween Etiwetiw fän iten ewe Ächechchem
1. Ineet sipwe poputä le eineti ewe taropween etiwetiw fän iten ewe Ächechchem lon ei ier, me pwata a aüchea?
1 Poputä seni April 2 tori April 17, sipwe eineti ewe taropween etiwetiw fän iten Ächechchemenien än Jises mälo, ewe rän mi kon aüchea seni meinisin iteiten ier. Lon ekkewe ier ra lo, chommong ra fiti ewe Ächechchem pokiten einetin ena taropwe. Äwewe chök, lon ewe ränin Ächechchem, emön fefin a köri eü keangen ofes me a erä: “Ua kerän wareiti imwei, nge ua küna echö taropween etiwetiw ppen asamei we. Ua mochen fiti nge use silei ika kulok fite.” Iwe, pwiich we a äiti ngeni tefen ewe taropwe a mak kulokun ewe Ächechchem. Ewe fefin a pwonei, “Upwe fiti ena ächechchem lepwinei!”
2. Met sipwe apasa atun sia anöünöü ewe taropween etiwetiw?
2 Ifa Usun Sipwe Föri Ena: Sipwe chechchemeni pwe mi aükük ei fansoun einet, ina minne a öch ach sisap attama ach fos pwe sipwe tikeri meinisin ekkewe imw. Eli sipwe chök tongeni erä: “Rän allim. Äm aua mochen ngonuk me om famili ei taropween etiwetiw ngeni eü mwich mi fokkun aüchea a kan fiffis woon unusen fönüfan iteiten ier, iwe, lon ei ier epwe fis lon Räninfel, April 17. [Eiti ngeni ewe chon imw ena taropween etiwetiw.] Ina ränin Ächechchemenien än Jises mälo. Epwe wor eü afalafal epwe äweweei ifa usun sipwe tongeni feiöch seni än Jises möön kepich. Ei taropween etiwetiw a affata kulokun me leenien ena mwich.”
3. Ifa usun sipwe tufichin etiwa chommong aramas?
3 Ika a watte än ewe mwichefel leenien afalafal, eli ekkewe elter repwe akkota pwe sipwe likiti ewe taropween etiwetiw lon ekkewe imw rese nom chon, nge sipwe tümünüöch pwe aramas rete küna. Kopwe etiwa noum kewe return visit, aramasom kewe, chienom chon angang, chon sukul, me ekkewe aramas ka sissileer. Atun ka fiti ewe angangen etiwetiw lon wiikend, anöünöü ekkewe Leenien Mas ika mi tufich. Ka tongeni auxiliary pioneer fän April me alapalo om fiti ena angangen etiwetiw mi apwapwa?
4. Pwata sia mochen pwe chokkewe mi letip wenechar repwe fiti ewe Ächechchem?
4 A ifa me aüchean ewe pworaus ekkewe chon fiti repwe aüseling ngeni! Repwe rongorong usun än Jiowa tong mi lap ren an awora ewe möön kepich. (Jon 3:16) Repwe käeö ifa usun aramas repwe feiöch seni än Kot we Mwu. (Ais. 65:21-23) Ra pwal tongeni fos ngeni ekkewe chon tümünü ewe mwich me tingor pwe repwe käeö Paipel. Sia iotek pwe chommong chokkewe mi letip wenechar repwe mwöküt ren ewe angangen etiwetiw me fitikich lon ewe Ächechchem!