Kingdom News Na. 38 Epwe Einet fán December!
1. Ikkefa ekkewe kapas eis usun máló aramas ra eáni me ifa usun ekkena kapas eis repwe pélú fán December?
1 Máló, chón oputa aramas meinisin, ese lifilifil met ra lúkú. (1 Kor. 15:26) Chómmóng ra eis ika ikkefa iir ekkewe mi máló me ika repwe kúnasefáliir. Ina popun lón úkúkún eú maram, chón ach kewe mwichefel wóón unusen fénúfan repwe fiti ewe angangen eineti ewe Kingdom News Na. 38 itelapan Ekkewe mi Máló Repwe Tongeni Wesewesen Manawsefál? Ei angangen einet mi kkóló aúchean epwe poputá December 1. Mwirin ena angangen einet, sipwe néúnéú ewe Kingdom News Na. 38 lón ewe angangen afalafal usun chék ach néúnéú ewe tract.
2. Ifa napanapen ewe Kingdom News Na. 38?
2 Napanapan: Napanapen ewe Kingdom News Na. 38 a numfengen pwe epwe pwá itelapan we mi ámmeseik fitifengen me ekkeei kapas “Met meefiom . . . ewer? aapw? neman?” Atun ewe chón állea epwe suukaaló ewe Kingdom News, epwe kúna seni Paipel pélúwen ewe kapas eis wóón itelapen ena taropwe me ifa usun án Paipel pwon epwe álisi. Epwe pwal kúna popun a tongeni lúkú ewe Paipel. A wor eú kapas eis mi múrinné lúkúnpéén ewe Kingdom News epwe ekieki usun me pesei an epwe alapaaló án káé.
3. Ifa usun ewe Kingdom News Na. 38 epwe einet?
3 Usun Anéúnéún: Ei angang epwe usun ewe angangen eineti ewe taropween etiwetiw fán iten ewe Áchechchem me ewe Mwichelap lón Summer. Ekkewe mwán mi ásimaw repwe awora emmwen seni ewe taropwe minen April 1, 2013 ren ifa usun án chón ewe mwichefel repwe angang wóón ar kewe leenien afalafal. Ekkewe mwichefel ese chómmóng ar leenien afalafal, ra tongeni álisi ekkewe mwichefel mi watte ar leenien afalafal. Atun oupwe angei néúmi we Kingdom News Na. 38, chechchemeni pwe oupwe chék angei met oua tongeni anéúnéú lón eú wiik. Atun ewe angangen einet a fiffis, nge ika ewe mwichefel a áwesaaló ar angangen einet imw me imw, iwe ra tongeni eineti ekkewe taropwe ngeni aramas ese lifilifil. Ika a it ekkewe taropwe lesópwólóón ewe maram, iwe chón ewe mwichefel repwe anéúnéú ewe puk mi fen kefilitá pwe anéúnéún fán ena maram. Lón ewe áeúin Ammól, sipwe mwo akkomwa ewe angangen einet lap seni ewe angangen poputááni káéén Paipel ngeni aramas. Lón ekkewe weekend, sipwe pwal anéúnéú ekkewe Leenien Mas atun mi fich. Ka féri óm kókkót pwe kopwe unusen fiti ei angang mi kkóló aúchean?