Eü Angangen Einet mi Sokkolo Aücheaan October 20–November 16!
1 Poputä seni Särinfel, October 20 ngeni November 16, sipwe fiti ewe angang mi sokkolo aücheaan ren einetin ewe mineföön taropwe itelapan Ka Mochen Silei Ewe Enlet? Sia lükülük pwe ach ei angangen einet mi fis woon unusen fönüfan epwe alapalo än aramas äfänni ewe enlet.—Jon 17:17.
2 Ei taropwe a awora pölüwen mi ffataffatöch seni Paipel fän iten ekkeei wonu kapas eis mi lamot: “Kot a wesewesen tongekich?” “Epwe muchulo maun me riäfföü?” “Met epwe fis ngenikich lupwen sipwe mälo?” “Mei wor eü äpilükülük fän iten ekkewe mi mälo?” “Ifa ussun upwe iotek pwe Kot epwe aüseling?” me “Ifa ussun upwe tongeni küna pwapwa lon manauei?” Ekkewe lamalam iir tipitipin Chon Kraist rese tongeni pölüweni ekkeei kapas eis. Pwal mwo ekkewe rese äfänni lamalam ra osukosuk ren ekkeei kapas eis, nge rese silei pwe a fen ffat lon Paipel pölüwer. Ina minne, sia lükülük pwe chommong repwe pwapwaiti ewe pworaus lon ei taropwe.
3 Awesöchüelo Ewe Leenien Afalafal: Achocho le äwesöchüolo ewe leenien afalafal fän iten imw me imw. Nge ika a watte ewe leenien afalafal, ekkewe elter repwe akkota pwe kopwe tongeni chök likitatiu ewe taropwe lon ewe äeüin fansoun ka tori ekkewe imw ese wor aramas lon. Kosap mönüki le anöünöü ngeni chon orum, aramasom, chienom chon angang are chon sukul, pwal ekkewe en mi sissileer. Ka tongeni akkota om kopwe auxiliary pioneer fän October ika November. Mi wor lein noum kewe ika noum chon käeö mi feffeitä lon ar angang ngeni Jiowa repwe tongeni fitikich lon ei angangen einet ussun emön chon afalafal ese mwo papatais? Ika mi wor, ereni ekkewe elter.
4 Met Sipwe Apasa: Pwe sipwe tikeri chommong aramas ren ewe pworaus, mi lamot sipwe chök eäni afalafal mi mwochomwoch. Eisini ewe chon imw eü chök me lein ekkewe kapas eis lon ewe taropwe mwirin äiti ngeni pölüwan seni lon ewe taropwe. Ei mettoch epwe atufichi ekkewe chon afalafal ar repwe eäni afalafal mi fich ngeni ewe leeni. Makkei iten ekkewe mi pwapwaiti me akkota le liwinitiir. Lon ekkewe wiiken sipwe anöünöü ekkewe minefö chassi fiti fengen me ewe taropwe. Wesin ewe angangen einet lon November 16, sipwe anöünöü ewe puk Manau Tori Feilfeilo ika menni puk mi wor. Ika mi chüen wor lusun taropwe, sia pwal tongeni anöünöü ngeni aramas ussun chök ekkewe ekkoch taropwe.
5 Poputääni Chon Käeö: A kawor ei taropwe pwe epwe älisikich le poputääni chon käeö. Atun sipwe liwiniti ekkewe mi mochen aüseling, sipwe eisiniir menni pworaus seni ewe taropwe a aururu me akinamwe ngeni letiper? Äiti ngeni ewe kokkotun käeö mi nom lükünüppen ewe taropwe me ngeni ewe Kutta puk. Ika mi wor an fansoun, pworausfengen woon eü ika ruu parakraf woon menni lesen a pwisin filatä.
6 Jiowa a kükkütta aramas mi mochen fel ngeni lon “ngun o enlet.” (Jon 4:23, TS) Amwo kich meinisin sipwe fokkun älisatä ei angang mi sokkolo aücheaan le älisi aramas pwe repwe silei ewe enlet!