Áeá Ach we Web Site le Asukula Néúmi Kewe
1. Pwata a kawor ewe kinikin itelapan “Children” wóón ach we Web site?
1 Ach we Web site, jw.org, a ffér fán iten aramas meinisin. Eú kinikin wóón ena Web site itelapan “Children” (feiló ngeni Bible Teachings > Children) a álisi ekkewe kúkkún me semer kewe me iner ar repwe ririfengen me pacheéch ngeni Jiowa. (Tut. 6:6, 7) Ifa usun oupwe áeá ena kinikin le asukula néúmi kewe?
2. Ifa usun oupwe filatá ekkewe pwóróus oupwe áeá le káé ngeni néúmi kewe alóngólóng wóón ieriir?
2 Oupwe Tipemecheres: Emén me emén semirit a wor pwisin met a lamot ngeni. (1 Kor. 13:11) Ina popun, ifa usun oupwe filatá ekkewe pwóróus oupwe áeá le káé ngeni néúmi kewe alóngólóng wóón ieriir? Oupwe pwisin eisinikemi: ‘Met epwe apwapwaai néúm kewe? Ifa úkúkún ar weweiti ewe lesen? Ifa úkúkún ar likiitú le káé ewe lesen?’ Neman oupwe áeá ekkewe pwóróus lón ewe “My Bible Lessons” wóón ach we Web site le káé ngeni ekkewe semirit úlúngát ieriir feitiw. Ekkóch famili ra pwapwaiti ekkewe pwóróus seni Paipel lón ewe kinikin “Teach Your Children.” Nge pwal ikkeei ekkóch mettóch oupwe tongeni féri.
3. Ifa usun ekkewe sam me in repwe tongeni néúnéúfichi ekkewe pwóróus fán ewe itelap “Family Worship Projects”?
3 Family Worship Projects: (Minne ewe famili epwe achocho ngeni lón ar Famili Fel) Ena mettóch epwe álisi ekkewe sam me in le káé ngeni néúr kewe kúkkún. Tiki ewe kapas “Download” me álleani ewe “Parents’ Guide” are emmwen fán iten ekkewe sam me in pwe repwe tongeni silei ifa usun repwe áeá ekkewe pwóróus me met sókkun mettóch ra tongeni féri lón ar Famili Fel. Néúnéú ewe “Picture Activity” are ekkewe lios le asukula néúmi kewe kúkkún, áwewe chék ren ekkewe page mi wor ekkewe lios repwe achona. Álisi néúmi kewe mi ekis watte ar repwe wisen féri ewe “Study Activity” are pekin káé. Meinisin ekkena lesen lón ewe “Family Worship Projects” a chék fós usun eú sókkun pwóróus are lesen seni Paipel, ina popun meinisin ekkewe nau ra tongeni eáni eú chék sókkun lesen atun ar Famili Fel.
4. Met sipwe tongeni kúna fán ewe kinikin “Become Jehovah’s Friend”?
4 Become Jehovah’s Friend: (Wiliti Chiechien Jiowa) Ekkewe kachito, kél me ekkewe mettóch ekkewe kúkkún ra tongeni féri lón ei kinikin “Become Jehovah’s Friend” wóón ach we Web site, a álisi sam me in le asukula néúr kewe kúkkún án Kot Kapas. (Tut. 31:12) Meinisin ekkewe kachito ra ámmeseik me mwochomwoch nge a menlapei usun eú lesen mi lamot. Oua tongeni féri ekkóch mettóch pwe epwe menlapei ekkena lesen. Áweweei chék ren ámi féri ewe game usun án emén kúkkún epwe kútta óch mettóch. Pokiten ekkewe kúkkún ra kan sani le kél, iwe iteitan a kan kawor ekkewe kélún mwareiti Jiowa me ekkóch kél fán iten ekkewe kúkkún. Me ekkewe kél ra tongeni álisi ekkewe kúkkún ar repwe chechchemeni met ra fen káé.
5. Pwata a lamot án ekkewe sam me in repwe iótek ngeni Jiowa pwe epwe álisiir le asukula néúr kewe ewe enlet?
5 Ámi kana sam me in, Jiowa a mochen ámi oupwe sópwéch le féri wisemi. Ina popun oupwe tingorei pwe epwe álisikemi le asukula néúmi kewe ewe enlet. (Souk. 13:8) Ren álillisin Jiowa, oua tongeni emiriti néúmi kewe pwe repwe tipachem fán iten ar repwe ‘küna manau ren ar lükü Kraist Jesus.’—2 Tim. 3:15; SalF. 4:1-4.