Kot, ewe chón “aüselinga iotek,” a pwapwa le aúselingakich.—KÖLFEL 65:2
Ikkiótek me Tingor án Kot Chen
Kot a ngeni aramas eú liffang mi kkóló aúchean, ina ewe tufichin pwóróus ngeni me pwári ngeni masouen letipach lón iótek. Ewe soufós Tafit a iótek me apasa: “En ka aüselinga iotek. Aramas meinisin repwe feito reöm.” (Kölfel 65:2) Nge ifa usun sipwe iótek pwe Kot epwe aúselingakich me efeiéchúkich?
IÓTEK SENI LETIPACH REN EÚ LETIP MI TIPETEKISON
Ach kewe iótek ra atufichikich le pwári ngeni Kot enletin masouen letipach. (Kölfel 62:8) Ewe mi Unusen Manaman a pwapwaiti ach kewe iótek seni enletin letipach.
FÉÚNI ITEN KOT WE
A chómmóng ekkewe itelap fán iten Kot, nge eú chék itan. “Ngang ewe Samol mi Lapalap [Jiowa],a iei chök itei.” (Aisea 42:8) Ewe it Jiowa a pwá arapakkan fán 7,000 lón ewe Paipel. Chómmóng ekkewe soufós ra kan féúni iten Kot we. Áwewe chék, ewe soufós Amos a apasa usun Kot: “Ewe Samol mi Lapalap [Jiowa] a aüetä imwan won ekewe läng o föri pwe läng pwölüpwölün fanüfan. . . . Itan ewe Samol mi Lapalap [Jiowa].” (Amos 9:6) Sipwe pwal féúni iten Kot we, Jiowa, atun sia iótek.
IÓTEK LÓN PWISIN FÓSUN FÉNÚOM
Kot a weweiti ach kewe ekiek me memmeef, ese lifilifil menni fós sia eáni. Paipel a alúkúlúkúkich: “Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”—Föför 10:34, 35.
Nge ren ach sipwe feiéch seni Kot, mi pwal wor met sipwe féri me lúkún iótek. Lón ekkewe lesen mwirin ei, sipwe ppii met a lamot sipwe féri.
a Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe. Iei ewe iten Kot, a fokun pin.”