Álisatá án Jiowa Emmwen Ren Minne mi Pwúng me Mwáál

Jiowa Kot a awora emmwen ren minne mi pwúng me mwáál fán iten aramas. Áwewe chék, a allúkú pwe ewe ririin pwúpwúlú epwe fán iten emén chék mwán me emén chék fefin me epwe nómoffóch. (Mat 19:4-6, 9) A oput meinisin sókkun tipisin lisowumwáál. (1Ko 6:9, 10) A pwal mwo nge awora emmwen fán iten úf me fout pwe néún kewe aramas repwe imuló seni ekkewe ekkóch.​—Tut 22:5; 1Ti 2:9, 10.

Lón ach ei fansoun, chómmóng ra tunaló án Jiowa emmwen. (Ro 1:18-32) Ar kefil wóón úfer me fouter, me féfférúr ra lóngólóng wóón met mi kon térú. Chómmóng ra chék pwáraaló féfféringawer me esiita chókkewe mi fiti án Kot emmwen.​—1Pe 4:3, 4.

Pokiten kich Chón Pwáraatá Jiowa, a lamot ach sipwe pwora le álisatá án Kot emmwen ren minne mi pwúng me mwáál. (Ro 12:9) Ifa usun? Sipwe tipachem le affata met a fich me ren Jiowa. Me sipwe pwal pwáraaló lón ach féffér sia féfféri lón manawach. Áwewe chék, atun sia filatá úfach me foutach, neman sipwe eisini pwisinkich: ‘Minne ua filatá a pwári pwe ua fiti án Jiowa emmwen are án fénúfan? Úfei me foutei ra esissillatá pwe ngang emén Chón Kraist mi niwokkusiti Kot?’ Are atun sipwe filatá menni kachito sipwe katol, neman sia tongeni eisini pwisinkich: ‘Jiowa epwe tipeeú ngeni ei kachito? Menni emmwen ei kachito a álisatá? Ai minen apwapwa me kunou a tongeni apwangapwangaaló ai mochen féri minne mi pwúng? (Kf 101:3) Minne ua filatá mi tongeni áchepeteki chón ai famili are ekkewe ekkóch?’​—1Ko 10:31-33.

Pwata a fókkun lamot pwe sipwe álisatá án Kot emmwen ren minne mi pwúng me mwáál? Kraist Jesus epwele ataieló ekkewe mwú me meinisin féffér mi ngaw. (Is 9:4-7) Chókkewe chék mi féfféri letipen Kot repwe manaw. (1Jo 2:15-17) Ina minne sipwe álisatá án Jiowa emmwen ren minne mi pwúng me mwáál pwe ekkewe aramas mi kúna ach féfféréch repwe elingaaló Kot.​—1Pe 2:11, 12.

KATOL EWE VIDEO BECOME JEHOVAH’S FRIEND​—ONE MAN, ONE WOMAN, MWIRIN PÉLÚWENI EKKEEI KAPAS EIS:

• Pwata a eú alen tipachem ach sipwe fiti án Jiowa emmwen?

• Met popun a lamot ekkewe sam me in repwe asukula néúr kewe seni lekúkkúnúr usun án Jiowa emmwen ren minne mi pwúng me mwáál?

• Ifa usun ekkewe kúkkún me ekkewe mi watte ieriir ra tongeni álisi aramas le kúna feiéch seni múrinnéén Kot?