Ifa Usun Kopwe Wiliti Emén mi Tinikken le Káé ewe Paipel?

Ka mochen kopwe emén mi tuppwél fán weires usun chék Taniel? Taniel a tinikken le káé Kapasen Kot kapachelong ekkewe oesini mi alóllóól. (Tan 9:2) Óm tinikken le kákkáé ewe Paipel a tongeni álisuk le amwéchú óm tuppwél. Ifa usun? A tongeni alapaaló óm lúkú pwe án Jiowa kewe pwon repwe pwénúetá. (Jos 23:14) A pwal tongeni álisuk le alapaaló óm tongei Kot, ina met epwe amwékútuk le féri minne mi pwúng. (Kf 97:10) Nge ifa usun kopwe poputá le féri óm káé? Ekieki mwo ekkeei kapasen emmwen.

• Met upwe káé? Eú káé mi múrinné a kapachelong óm akkammolnatá fán iten án ewe mwichefel kewe mwich. Kopwe kon pwapwaiti ewe álleaan Paipel iteiten wiik ika kopwe awora fansoun le kúttafichi ekkewe pwóróus kese weweiti. Pwal och, ekkóch ra filatá ar repwe alapaaló ar káé usun án Paipel oesini, ekkewe kinikinin uwaan án Kot we manaman mi fel, án ewe aposel Paulus sáifetál lón an angangen misineri me pwal mwo nge férien Jiowa kewe. Ika a wor óm kapas eis lón Paipel, iwe pwata kese makketiw me achocho le angang wóón lón pwal eú káéén Paipel ka akkóta.

• Ia upwe kútta me ie ewe pwóróus? Katol ewe video Research Tools for Discovering Spiritual Treasures fán iten ekkóch minen álillis. Kopwe sótuni ekkena minen álillis le kútta pwóróusen ekkewe mwú mi nemeni unusen fénúfan, iir kewe Taniel sópwun 7 a alélléér ngeni manmwacho.

• Epwe ifa úkúkún ttamen ai féri ai káé? Eú káé mi fiffis iteitan, ina kiien péchékkúlom lón pekin lúkú. Ka tongeni poputá ren eú káé mi mwochomwoch ika ina met a múrinné ngonuk, mwirin kopwap alangattama ewe fansoun. Kákkáé Paipel a usun itá pwe ka ttu pwúl fán iten pisek mi aúchea nge mi monomonoló, atun an lallapóló ekkewe pisek mi aúchea ka kútta, iwe a pwal lapóló óm mochen ttu pwúl! (SF 2:3-6) Óm mwoneiti Kapasen Kot epwe lallapóló me óm kákkáé Paipel iteitan epwe eú eéreniom.​—1Pe 2:2.

MET EKKEWE MANMWACHO LÓN TANIEL SÓPWUN 7 RA WEWE NGENI?

• Tan 7:4

• Tan 7:5

• Tan 7:6

• Tan 7:7

PWAL OCH KAPAS EIS:

Ifa usun a fen pwénúetá Taniel 7:8, 24?

PWAL EÚ LESEN:

Met ekkewe manmwacho lón Pwärätä sópwun 13 ra wewe ngeni?