Kot A Poputá Le Fératá Mettóch

MEINISIN ekkewe mettóch mi múrinné mi nóm rech, ra feito seni Kot. A fératá ewe akkar pwe epwe wor rech saram lerán, iwe, a fératá ewe maram me ekkewe fúú pwe epwe wor rech saram lepwin. Iwe, Kot a fératá ewe fénúfan pwe sipwe nónnóm wóón.

Kot ese akkomw féri ewe akkar, ewe maram, ekkewe fúú me ewe fénúfan. Nge, en mi silei met a akkomw féri? Kot a akkomw fératá ekkewe chónláng. Sise tongeni kúner, usun chék ach sise tongeni kúna Kot. I a fératá ekkewe chónláng ar repwe nónnóm ren i lón láng.

Ewe áeménún chónláng Kot a fératá, a aúchea seni meinisin. I Néún Kot we mwánichi, iwe, ra angangfengen me Seman we. A álisi Kot le fératá mettóch meinisin. A álisi Kot le fératá ewe akkar, ewe maram, ekkewe fúú me pwal ei fénúfan.

A ifa usun napanapen fénúfan lón ena fansoun? Lepoputáán, esor a tongeni manaw wóón fénúfan. Esor mettóch wóón, chilóón chék eú mataw mi fókkun watte wóón unusen ewe fénú. Nge, Kot a mochen pwe aramas repwe manaw wóón fénúfan. Iwe, a poputá le ammólnatá fénúfan fán itach. Met a féri?

Iwe akkomw, a lamot an epwe wor saram. Ina minne, Kot a efisi pwe saramen ewe akkar epwe ttineeiti fénúfan. A aota pwe epwe wor pwin me rán. Mwirin, Kot a alangaatá ewe fénú seni ewe mataw.

Lepoputáán esor och mettóch wóón ewe fénú. Napanapan a usun chék met ka kúna me lón ei lios. Esor péén irá, man are irá. Ese pwal wor iik leset. A chúen chómmóng án Kot angang le ammólnatá ewe fénúfan pwe epwe wesewesen múrinné fán iten aramas me man ar repwe manaw wóón.