Kition Me Néún Kewe 300 Soufiu

EN MI kúna met a fis ikeei? Ekkeei mwán meinisin, iir soufiun Israel. Ekkeei mwán mi pworetiw, ra ún konik. Iei i ewe Soukapwúng Kition, mi úkkúútá únúkúr. A kakkatol napanapen ar ei ún konik.

Nengeniéchú mwo napanapen án ekkeei mwán ún ei konik. Ekkóch ra apworaatiw meser ngeni ewe konik. Nge ei emén a úfaatá ei konik lón péún ngeni awan, pún a mochen mammasa met a kan fis únúkkún. Iei eú mettóch mi lamot, pún Jiowa a ereni Kition pwe epwe filatá ekkewe chék mwán mi mammasa atun ra ún ei konik. Kot a apasa pwe ekkewe lusun repwe liwiniti imwer. Sipwe ppii ika met popun.

Ekkewe chón Israel ra pwal nóm lón fitikoko watte. Popun, pún rese álleasochisi Jiowa. Ekkewe chón Mitian ra fen péchékkúl lap seniir me ra áweiresi ekkewe chón Israel. Iwe, ekkewe chón Israel ra sié ngeni Jiowa ren an álillis, iwe Jiowa a aúseling ngeni ar sié.

Jiowa a ereni Kition pwe epwe emwicha eú mwichen soufiu, iwe Kition a ionfengeni 32,000 soufiu. Nge úkúkún chóchóón ewe mwichen soufiu epwe maun ngeni Israel, 135,000 mwán. Iwe nge Jiowa a ereni Kition: ‘A kon chómmóng noum kana soufiu.’ Pwata Jiowa a apasa ena mettóch?

Popun, pún ika Israel a win lón ewe maun, eli repwe ekieki pwe ra win pokiten pwisin ar péchékkúl. Eli repwe ekieki pwe repwe tongeni win, nge meit ika ese wor án Jiowa álillis. Ina popun Jiowa a ereni Kition: ‘Kopwe ereni meinisin ekkewe mwán mi niwokkus ar repwe liwinló ngeni imwer.’ Lupwen Kition a féri ei mettóch, 22,000 néún kewe soufiu ra liwiniti leenier kewe. Iwe mwirin, a wor chék úkúkún 10,000 mwán lusun repwe fiu ngeni meinisin ekkewe 135,000 soufiu.

Nge aúseling mwo! Jiowa a apasa: ‘A kon chúen chómmóng noum kewe soufiu.’ Ina minne a ereni Kition pwe epwe ereni ekkewe mwán ar repwe ún ei konik lón ei chénúpupu, nge epwe tiinaaló ngeni leenier meinisin chókkewe mi apworaatiw meser ngeni ewe konik atun ra ún. Jiowa a pwonei: ‘Upwe aota pwe ámi oupwe win, ámi me ekkewe 300 mwán, iir kewe mi mammasa atun ar ún ewe konik.’

Iwe, a tori ewe fansoun maun. Kition a áimuoló néún kewe 300 soufiu lón úlúngát kúmi. A ngeni iteiten emén me emén leir efóch rappwa me eú watteen rume, nge a wor efóch téén lón. Lupwen a arap ngeni lukenipwin, ra pwelli leenien ekkewe soufiu mi oputer. Iwe, ra usi pékú néúr kewe rappwa me amékkú ar kewe rume me púchér: ‘Néún Jiowa ketilas me néún Kition!’ Lupwen ekkewe soufiu ra neló, ra osukosuk me niwokkus. Iir meinisin ra poputá le sú, iwe ekkewe chón Israel ra win lón ewe maun.