Kition A Okkufu Ekkewe Chón Mitian

Ló, ló, ló, chón Israel ra pwal kul seni Jiowa me poputá le fel ngeni ekkewe kot chofona. Ren úkúúkún fisu ier, ekkewe chón Mitian ra solááni néún chón Israel kewe man me ataieló ar kewe atake. Ren án ekkewe chón Israel repwe sú seni ekkena chón Mitian, ra op lón ekkewe pwang me wóón ekkewe chuuk. Ra tingormaw ngeni Jiowa an epwe álisiir. Iwe Jiowa a tiinaaló emén chónláng ren emén alúwél itan Kition. Ewe chónláng a erá: ‘Jiowa a filuketá pwe kopwe emén meilapen soufiu.’ Kition a erá: ‘Ifa ussun úpwe amanawa chón Israel, nge ese wor aúcheai?’

Ifa ussun Kition a tongeni silei pwe Jiowa a filaatá? A watiw och úléúlen siip wóón ewe pwúl me a ereni Jiowa: ‘Lesossor iká ei úléúlen siip a chéchéén seni ewe amurenipwin, nge ewe pwúl a chúen pwásápwás, iwe úpwe silei pwe ka mochen úpwe seláni chón Israel.’ Sorotáán ewe soran, ewe úléúlen siip a chéchchén nge ewe pwúl a pwás! Nge mwirin Kition a pwal tingor pwe sorotáán, ewe úléúlen siip epwe pwás nge ewe pwúl epwe chéchchén. Atun a fis ena, Kition a kerán wesen lúkú pwe Jiowa a filaatá i. A ochufengenni néún kewe soufiu pwe repwe fiu ngeni ekkewe chón Mitian.

Jiowa a ereni Kition: ‘Ngang úpwe ewinna chón Israel. Nge pokiten a kon chómmóng noum soufiu, eli oupwe ekieki pwe oua winneni ewe maun pokiten ámi péchékkúl. Kopwe ereni ekkewe mi niwokkus pwe ra tongeni liwiniti imwer.’ Iwe 22,000 ra ló, nge 10,000 ra chúen nóm. Iwe Jiowa a ereni: ‘Ra chúen chómmóng ekkewe soufiu. Kopwe uweiireló ren ewe chénúpupu me ereniir pwe repwe ún ewe konik. Kopwe chék onommwaatiw ekkewe mi mammasa chón oputer atun ra ún konik.’ A chék 300 soufiu ra mammas atun ra ún konik. Jiowa a pwonei pwe ekkena fitemén soufiu repwe okkufu ekkewe 135,000 soufiun Mitian.

Lón ena pwinin, Jiowa a ereni Kition: ‘Iei a tori ewe fansoun óm kopwele fiu ngeni chón Mitian!’ Kition a ngeni néún kewe soufiu néúr rappwa me ekkewe watteen péén konik mi wor téén lón. A ereniir: ‘Oupwe nennengeniei me féri met úa féri.’ Kition a ettiki néún we rappwa, amékkú an we péén konik, kémwéch an we téén mi kkú, me púchér: ‘Ewe ketilas fán iten Jiowa, pwal fán iten Kition!’ Meinisin ekkewe 300 mwán ra pwal féri ena. Ekkewe chón Mitian ra niwokkus me ra súfetál. Nge pokiten ra fókkun osukosuk, ra poputá le pwisin fiufengen. Jiowa a pwal álisi ekkewe chón Israel le okkufu chón oputer kewe.