Ar Fétek lón Papilon Tori an a Fférsefál ewe Ttitin Jerusalem

Lupwen ekkewe chón Israel ra fétek lón Papilon, a toriir chómmóng sóssótun ar lúkú. Satrak, Mesak me Apetneko ra kóturulong lón eú leenien kek mi fókkun pwichikkar, nge Kot a selániir. Iwe mwirin án Papilon kkuf ren ekkewe chón Metia me Persia, Taniel a kóturulong lón eú leenien laion nge Kot a pwal túmúnú ren an éppúngaaló awen ekkewe laion.

Iwe mwirin, ewe kingen Persia itan Sirus a angasaaló ekkewe chón Israel. Ra liwiniti wesetáán fénúer 70 chék ier mwirin ar we eoló Papilon. Eú me lein ekkewe mettóch ra akkomw féri lupwen ra liwiniti Jerusalem, ra poputá le aúetá án Jiowa we imwenfel. Iwe nge mwirin ekis fansoun, ekkewe chón oput iir ra aúkatiw ar angang. Iwe órun 22 ier mwirin ar liwiniti Jerusalem, ra áwesaaló ewe imwenfel.

Mwirin sipwe káé usun án Esra liwiniti Jerusalem pwe epwe elinga ewe imwenfel. Ei a fis 47 ier mwirin wesin ewe imwenfel. Iwe 13 ier mwirin án Esra sái, Nehemia a wisen álillis lón angangen fférsefálin ewe ttittin Jerusalem mi tatiw. Kinikin NIMU a uruwooni uruwoon met a fis lón 152 ier tori fférsefálin ttittin Jerusalem.