Ra Lúkú Án Kot Álillis

FITE ngeréú aramas ra fiti ewe sái mi ttam seni Papilon ngeni Jerusalem. Nge lupwen ra war, Jerusalem a chúen tatakkis. Ese wor a nónnóm ie. Mi lamot pwe ekkewe chón Israel repwe aúetásefáli mettóch meinisin.

Eú me lein ekkewe mettóch ra akkomw féri, ra aúetá eú roong. Ina eú roong ra tongeni féri ar asor wóón, asorun man are liffang ngeni Jiowa. Mwirin fitu maram, ekkewe chón Israel ra poputá le aúetá ewe imwenfel. Nge chón oput ekkewe chón Israel seni ekkewe fénú mi arap ngeniir, rese mochen ar repwe aúetá. Iwe ra sótun eniwokkusur pwe repwe kaúló. Iwe mwirin, ekkewe chón oputer ra etipetipa ewe mineféén kingen Persia mi king mwirin málóón Sirus pwe epwe féri eú allúk, allúkún an epwe aúkatiw ar angangen aútáái ewe imw.

A fen 17 ier mwirin án ekkewe chón Israel liwin seni Papilon, iwe Jiowa a tiinaaló néún kewe soufós, iter Akai me Sekaraia pwe repwe ereni ekkewe aramas ar repwe poputásefál le aútáái ewe imw. Ekkewe aramas ra lúkú án Kot álillis, iwe ra álleasochisi ekkewe soufós. Ra poputásefál le kaú, inaamwo ika a wor eú allúk mi erá pwe resap kaú.

Iwe, emén néúwisin Persia itan Tatenai a feito me eisini ekkewe chón Israel ika ra angei me ie ar mumutá pwe repwe aúetá ewe imwenfel. Ekkewe chón Israel ra ereni pwe atun ra nónnóm lón Papilon, King Sirus a ereniir: ‘Iwe iei, ou feiló Jerusalem me aúetá án ámi we Kot Jiowa we imwenfel.’

Tatenai a tiinaaló eché taropwe ngeni Papilon, iwe a eis ika pwúngún pwe ina wesewesen alón Sirus. Ekiseló chék a war eché taropwe seni Tarius ewe mineféén kingen Persia. A erá pwe ina wesewesen alón Sirus. Iwe, ewe king a makkeei: ‘Mut ngeni ekkewe chón Israel ar repwe aútáái án ar we Kot we imwenfel. Iwe, ua allúk ngonuk pwe kopwe álisiir.’ A wes ewe imwenfel órun rúáánú ier, iwe ekkewe chón Israel ra fókkun pwapwa.

A luló chómmóng ier. Iei a arapakkan 48 ier mwirin wesin ewe imwenfel. Ekkewe aramas lón Jerusalem ra osupwang me ese chúen múrinné ewe telinimw me án Kot we imwenfel. Ewe chón Israel Esra a silei atun a nónnóm Papilon lamoten an epwe fférsefál án Kot we imwenfel. Iwe en mi silei met a féri?

Esra a ló chuuri Artaksasta, ewe kingen Persia me ena king mi múrinné a ngeni Esra chómmóng liffang pwe epwe uwei ngeni Jerusalem. Esra a tingorei ekkewe chón Israel lón Papilon pwe repwe álisi le uwei ekkeei liffang ngeni Jerusalem. Órun 6,000 aramas ra erá pwe repwe ló. A watte oser silifer me kolt me pwal ekkóch pisek aúchea.

Esra a lólilen pún repwe sereni aramasangaw lón ar sái. Eli ekkena aramas repwe angei seniir ekkewe silifer me kolt me pwal nireló. Iwe, Esra a emwicha ekkewe aramas, usun ka kúna lón ei lios. Iwe, ra iótek ngeni Jiowa pwe epwe túmúnúúr lón ar sáittam le liwiniti Jerusalem.

Iwe Jiowa a túmúnúúr. Ra tori Jerusalem mwirin ar sái rúáánú maram nge rese mwo nge feiengaw. Esap pwe ei pwóróus a pwáraatá pwe Jiowa a tongeni túmúnú iir kewe mi lúkú i ren an álillis?