Io A Wesewesen Samoluni Ewe Fonufan?
Chommong aramas repwe polueni ena kapas eis mi mak asan ren eu chok kapas—Kot. Iwe nge, a lamot ach sipwe silei pwe ese fokkun mak lon ewe Paipel fan eu pwe Jises Kraist are Seman we, ir wesewesen samolun ei otot. Apwi, nge Jises a era: “Ewe samolun ei fonufan epwe katowu.” A pwal apasa: “Ewe samolun fonufan epwe feito. Esor an nemenem woi.”—Jon 12:31; 14:30; 16:11.
Weween, ewe samolun ei otot a u ngeni Jises. Io ena?
Eu Minen Alillis Seni Lapalapen Ei Otot
Inaamwo ika aramas mi letip-wenechar ra achocho, nge seni lom tori ikenai, ewe fonufanen aramas a ur ren riaffou. A efisata an aramas mi mirit ekiek, usun chok ewe sou mak itan David Lawrence a pwal ekieki: “‘Kinamwe won fonufan’—lap ngeni aramas meinisin ra mochen kuna. ‘Kinamwe ngeni aramas’—arapakan aramasen fonufan meinisin ra mefi. Iwe, pwata a wor fitikoko? Met popun epwe fiffis maun nge arapakan aramas meinisin rese tipeni?”
Ina eu osukosuk, ika met? Inaamwo ika aramas ra pukun mochen manau lon kinamwe, nge ra kan koputfengen me nnifengennir—nge ren foffor mi fokkun arochongau. Ekieki watten kirikiringauen aramas mi kon ssenuk ngauen ar kewe foffor. Aramas ra fen akkaea ekkewe leenien tonkungasu (gas mi poison) pwe aramas repwe mop me kar lon tori ar repwe malo, ekkewe leenien fotek lon fansoun maun, ekkewe pisekin kokus ngeni aramas ekkei, ekkewe pakutang aramas ra kan kar ren, me pwal ekkoch pisekin efeiengau pwe repwe eriaffou aramas me nnifengennir nge ese fokkun wor ar umoumoch.
En mi luku pwe aramas mi tipeni kinamwe me pwapwa repwe tongeni pwisin ekiekieta ena ukukun watten fofforingau ngeni ekkewe ekkoch aramas? Met sokkun mettoch ra amwokutu aramas ar repwe forata ekkena foffor mi anioput, are efisata ewe sokkun lapalap mi aumwesir ar repwe efeiengaua ekkewe ekkoch? En mi fen ekieki ika a wor eu manaman mi ngau mi monomon a kan wisen etipetipa aramas ngeni foffor mi akkachofesa?
Ekkewe Samolun Fonufan Ra Sinnelo
Esor popun ach sipwe esissin usun ena mettoch, pun ewe Paipel a affataochu pwe emon mi tipatchem mi monomon a fen nennemeni aramas me muu. A apasa: “Unusen fonufan a nonnom fan nemenien ewe mi ingau.” Iwe, ewe Paipel a pwarata ion na ren an a apasa: “Ewe mi iteni Tefil me Setan . . . a otupu fonufan meinisin.”—1 Jon 5:19; Pwarata 12:9.
Fan eu, lupwen Jises a “kuna sossot ren ewe Tefil”, Jises ese apasa pwe Setan ese nemeni ewe fonufan. Ewe Paipel a awewei met a fis, a era: “Ewe Tefil a emmwenata i won eu chuuk mi fokkun tekia, o a pwar ngeni i muun fonufan meinisin me linger. O a kapas ngeni i: ‘Ekkeei mettoch meinisin upwe ngonuk, are kopwe chapetiu o asamoluei.’ Iwe, Jises a kapas ngeni i, ‘Sulo, Satan!’ ”—Mattu 4:1, 8-10.
Ekieki mwo. Satan a sotuni Jises ren an era pwe epwe fang ngeni “ekkewe muun fonufan meinisin.” Iwe nge, epwe wesewesen eu sossot ika esap Satan wesewesen ewe samolun ekkena muu? Apwi. Pwal nengeni, Jises ese apasa pwe ekkewe muun fonufan meinisin rese nom fan nemenien Satan, nge epwe fen affata ika pwe esor an Satan nemenem wor. Ina minne, Satan ewe Tefil, i wesewesen ewe sou nemenemen fonufan mi monomon! Ewe Paipel a pwal mwo nge eita ngeni “ewe koten ei otot.” (2 Korint 4:4) Iwe nge, ifa usun an a fis pwe emon mi wesewesen ngau epwe wiseni ena wis mi fokkun tekia?
Emonewe mi wiliti Satan a pin emon chonlang, forien Kot, nge a poputa le lolowoiti wisen Kot we. A appolua an Kot we pwungun nemenem. Ren an epwe fori ena, a affosa emon serepenit le otupu ewe aemonun fefin, If, iwe, a amwokutur me puluwan we, Atam, ar repwe fori minne letipan nge resap alleasochisi Kot. (Keneses 3:1-6; 2 Korint 11:3) A pwal era pwe epwe tongeni okullu seni Kot mwirimwirin Atam me If kewe meinisin resaamwo uputiu. Ina minne, Kot a mutata fansoun fan iten an Setan epwe annetata an na poraus, nge ese tongeni.—Job 1:6-12; 2:1-10.
Iwe, sipwe pwal mirititi pwe Satan ese alaemon chok le nemeni ewe fonufan. A fen angoch le etipetipa pwal ekkoch chonlang ar repwe fiti i le u ngeni Kot. Ra wiliti timon, chienan kewe ngun. Ewe Paipel a kapas usur lupwen a pesei chon Kraist: “Oupwe u ngeni ekkewe tipatchem-sola an ewe Tefil; pun saminne sipwe maun ngeni fituk me chcha, pwe . . . ngeni ekkewe chon nemeni rochopwak, pwal ngeni ekkewe chommong sokkun ngun ingau lon lang.”—Efisus 6:11, 12.
U Ngeni Ekkewe Ngun mi Ngau
Ekkena sou nemenem mi monomon mi ngau ra fokkun mochen otupu aramas meinisin, pwe repwe okullur seni ar fel ngeni Kot. Iei eu mettoch ekkewe ngun mi ngau ra fori, ra apochokkulata ewe ekiek pwe aramas rese wesewesen malo, inaamwo ika ewe Paipel a affataochu pwe ekkewe mi malo rese mefi och. (Keneses 2:17; 3:19; Isikiel 18:4; Kol Fel 146:3, 4; An Salomon Afalafal 9:5, 10) Ina minne, emon ngun mi ngau a tongeni fos ngeni mararin are chienen emon mi fen malo lon ngingin ewe soma ren emon waananu are ren “och mongungu” mi monomon. Ewe “mongungu” a usun ita nge mongungun emon mi fen malo, nge i wesewesen emon timon!
Iwe, ika och “mongungu” a fos ngonuk, kesap tupulo. Kesap etiwa minne a apasa nge kopwe chok aloni alon Jises, a era: “Sulo, Satan!” (Mattu 4:10; Jemes 4:7) Kesap mut ngeni om mochen silei poraus mi monomon an epwe amwokutuk om kopwe chiechi ngeni ekkewe ngun mi ngau. Ena sokkun chiechi a iteni angangen timon me Kot a ouroura ir kewe mi fel ngeni ar repwe su seni angangen timon meinisin. Ewe Paipel a apwungu “ir meinisin mi fori angangen pwee . . . are emon mi chuuri emon sou rong, are sou awarawar, are emon souasoma.”—Tuteronomi 18:10-12; Kalesia 5:19-21; Pwarata 21:8.
Pokiten angangen timon a anomu emon fan nemenien ekkewe timon, su seni ekkena angang meinisin, inaamwo ika ra fokkun apwapwa are amwarar. Ikkeei ekkoch me lein ekkewe angangen rong: crystal-ball gazing, aean ekkewe Ouija boards, ESP, alleani lon poun aramas (palmistry), me pween fu. Ekkewe timon ra pwal efisata akurang are pwal ekkoch foffor mi amwarar lon ekkoch imw are leeni mi nom fan nemenieer.
Pwal eu, ekkewe ngun mi ngau ra silei pwe a mecheres ngeni aramas ar repwe tittipis; ina minne, ra nounou puk, are kachito, are ekkoch program won T.V. mi pwaralo foffor mi sikepwach me fofforun mochenia-ngauen fituk ese fich ngeni aramas. Ekkewe timon ra silei pwe ekkewe ekiek mi mwaal repwe nonnom chok lon ach ekiek ika sise poutirelo, iwe, repwe tongeni amwokutu aramas ar repwe foffor-mwaal—usun chok ekkewe timon.—Keneses 6:1, 2; 1 Tesalonika 4:3-8; Juta 6.
Pwungun, chommong repwe esiita ewe poraus a era pwe ekkewe ngun mi ngau ra nemeni ei fonufan. Nge sise mairu ren ar tipemwaramwar pun ewe Paipel a era: “Satan a pwisin awilielo lapalapan usun chok emon ekkewe chonlangen saram.” (2 Korint 11:14) Ina an foffor mi nikotuputup seni meinisin, a achunalo chommong aramas pwe resap luku pwe mei wesewesen wor Setan me ekkewe timon. Nge kesap tupulo! Mei wesewesen wor ewe Tefil me noun kewe timon, iwe, a fokkun lamot om kopwe tumunuk senir fansoun meinisin.—1 Piter 5:8, 9.
A eu minen apwapwa ach sipwe silei pwe arapakan chok, Satan me chienan kewe resap chuen nom. Ewe Paipel a alukuluku: “Ewe fonufan [pachelong ekkewe timon mi nemeni] epwe morelo, nge i mi fori letipen Kot epwe nonnom feilfeilo chok.” (1 Jon 2:17) A ifa me watten ach ngaselo lupwen epwe morelo ekkena ngun mi ngau! Ina minne, amwo sipwe nom lein ir kewe mi foffori letipen Kot me pwapwaesini manau esemuch lon an Kot we fonufan sefo mi pwung.—Kol Fel 37:9-11, 29; 2 Piter 3:13; Pwarata 21:3, 4.
Ika ese fen pwa, meinisin ekkewe wokisin lon ei taropwe ra popu seni ewe New World Translation of the Holy Scriptures.
[Picture on page 4]
Satan epwe ita era pwe epwe fang ngeni Jises ekkeei muun fonufan meinisin ika rese nom fan nemenian?