Lesen 14

Ifa Kokkotun Noun Jiowa kewe Chon Pwarata

Lon ach ei fansoun, ineet noun Jiowa kewe Chon Pwarata ra poputa? (1)

Mei fet lapalapen an Chon Pwarata Jiowa kewe mwich? (2)

Ia a feito me ie monien alillis mi atufichi ewe angang? (3)

Io kewe repwe wisen emmweni eu me eu mwichefel? (4)

Ikkefa ekkewe mwich watte mi fiffis iteiten ier? (5)

Ifa ewe angang mi fis lon ar ofesilap me ekkewe branch ofes? (6)

1. Lon ach ei fansoun, noun Jiowa kewe Chon Pwarata ra poputa orun 1870. Iwe, ra akkom iteni Chon Kaeo Paipel. Nge lon 1931 ra angei ewe it mi popu seni Paipel, Chon Pwarata Jiowa. (Aisea 43:10) Seni le poputaan mi kisikis, ewe mwicheich a mammaarita ngeni fitu milion Chon Pwarata, iwe, ra angang weires lon ewe angangen afalafal lon lap seni 230 fonuen fonufan.

2. Lap ngeni ekkewe mwichefelin Chon Pwarata Jiowa meinisin ra mwichfengen fan ulungat iteiten wiik. Ra etiwok om kopwe fiti ekkeei mwich. (Ipru 10:24, 25) Ewe Paipel, ina longolongun minne repwe kaeo. Ekkewe mwich repwe suuk me muchulo ren iotek. Lon lap ngeni ekkewe mwich meinisin repwe kan eani ekkewe “kolun lamalam” mi popu seni letiper. (Efisus 5:18, 19) Ese kamo ach sipwe fiti, me esap wor fesin moni.​—Mattu 10:8.

3. Lap ngeni ekkewe mwichefel meinisin ra mwich lon eu Kingdom Hall (iten ewe leenien mwich). Lap ngeniir meinisin, imwen mwich mi kauta ren Chon Pwarata Jiowa mi fangefatelo ar fansoun me tufich nge rese kamo. Kesap kuna och uluulun, irapenges, are pwal ekkoch pisek ussun chok ekkeei lon ewe Kingdom Hall. An aramas awora monien alillis a kan pwakini liwinin ekkewe imwen mwich. Mei wor eu pworun asor fan iten ir kewe mi mochen awora och monien alillis.​—2 Korint 9:7.

4. Lon iteiten mwichefel meinisin, mei wor ekkewe elter are chon mas. Ra wisen asukula chon ewe mwichefel. (1 Timoti 3:1-7; 5:17) Ra kuna alillis seni ekkewe ministerial servant. (1 Timoti 3:8-10, 12, 13) Ekkeei mwan rese atekiata pwisin ir won ekkewe ekkoch lon ewe mwichefel. (2 Korint 1:24) Rese eani ekkoch itelap mi sokkolo aucheaar. (Mattu 23:8-10) Rese ufouf och sokkun uf mi sokko seni ufen ekkewe ekkoch. Esap pwal wor peioffur pokiten ar angang. Seni lon letiper ekkewe elter ra pwakini osupwangen chon ewe mwichefel lon pekin ngun. Repwe tongeni aururur me emmwenir lon fansoun osukosuk.​—Jemes 5:14-​16; 1 Piter 5:2, 3.

5. Iteiten ier ekkewe Chon Pwarata Jiowa repwe pwal fori ekkoch mwichelap. Lon ekkena fansoun chommong mwichefel repwe mwichfengen fan iten eu kokkotun kaeoon Paipel mi sokkolo aucheaan. Lon iteiten mwichelap meinisin, epwe kan fis an ekkewe minefoon chon kaeo papataiselo.​—Mattu 3:13-17; 28:19, 20.

6. Ewe ofesilapen Chon Pwarata Jiowa won unusen fonufan a nonnom lon New York. A pwal nonnom ikewe ie ewe mwichen sou pwungupwung, eu mwichen elter mi lipwakoch mi emmweni ekkewe mwichefel won unusen fonufan. Won unusen fonufan mei pwal wor lap seni 100 branch ofes. Lon ekkena leeni, ekkewe chon alillis ra peresei me tiinalo ekkewe puken aweween Paipel. Ra pwal awora emmwen fan iten kokkotochun ewe angangen afalafal. Pwata kese akkota om kopwe feilo katol ewe branch ofes mi kan ngonuk?