Lesen 10
Ifa Ussun Kopwe Kuna Ewe Lamalam Mi Enlet
Ika en mi mochen chiechioch me Kot, kopwe wiisen fiti ewe lamalam Kot a pwapwa ren. Alon Jises “ekkewe chon fel mi let” repwe fel ngeni Kot lon “enlet.” ( Jon 4:23, 24) Mei wor eu chok alen fel ngeni Kot mi enlet. (Efisus 4:4-6) Lamalam mi enlet a emmwen ngenikich manau esemuch, me lamalam mi chofona a emmwen ngenikich kiteter.—Mattu 7:13, 14.
Kopwe tongeni esinna lamalam mi enlet ren om atola ekkewe chon fiti. Pun Jiowa mi murinno, chokkewe mi fel ngeni lon enlet ir aramas mi murinno. Ussun efoch ira kurukur mi murinno epwe uwani kurukur mi murinno, ewe lamalam mi enlet a uwani aramas mi murinno.—Mattu 7:15-20.
Chiechien Jiowa ra eani sufol mi alollol ngeni ewe Paipel. Ra silei pwe ewe Paipel a popu seni Kot. Ra etiwa met a mak lon ewe Paipel le emmweni manauer, pwakini ar kewe osukosuk, me alisiir le kaeo ussun Kot. (2 Timoti 3:16) Ra sotun le fori alon minne ra afalafala.
Chiechien Jiowa kewe ra tongeefengenniir. Jises a pwaralo an tongei aramas ren an asukuleer ussun Kot, me ren an appochokkula chokkewe mi semmwen. Ir mi fiti ewe lamalam mi enlet ra pwal pwaralo ar tongei aramas. Ussun chok Jises, rese atekiareta seni ekkewe mi woungau seniir me ekkewe mi sokkolo ar lewo. Jises a apasa pwe aramas repwe esinna noun kewe chon kaeo ren ewe tong ra pwaralo lefiler.—Jon 13:35.
Chiechien Kot kewe ra asamolu iten Kot we, Jiowa. Ika emon ese mochen nounou itom, ita kopwe eani ekiek pwe ena emon a chiechioch ngonuk? Aapw! Ika mei wor chienach, sia kan nounou itan me sia apasawu mettoch mi murinno ussun. Iwe, chokkewe mi mochen chiechioch me Kot repwe nounou itan me apasawu porausan ngeni aramas. Jiowa a mochen ach sipwe fori ena mettoch.—Mattu 6:9; Rom 10:13, 14.
Chiechien Kot kewe ra ussun chok Jises le asukula aramas ussun Muun Kot. Muun Kot ina ewe muu lon lang epwe siwili ei fonufan ngeni eu paratis. Chiechien Kot kewe ra esile ngeni aramas ewe kapas allim ussun Muun Kot.—Mattu 24:14.
Chon Pwarata Jiowa ra achocho le chiechioch me Kot. Ra sufoliiti ewe Paipel me ra tongeefengenniir. Ra nounou me asamolu iten Kot me asukula aramas ussun Muun Kot we. Chon Pwarata Jiowa ra eani ewe lamalam mi enlet won fonufan ikenai.